JEHOVA DIOSMI kamachispan Israel runakunaman nirqa palomata utaq kullkuta qunankupaq (Lev. 1:14; 12:8; 14:30). ¿Imaynanpitaq chayqa ancha allin karqa? Wakinpiqa sasa tariymi karqa kullkuqa. Qatiqninpiyá chaymanta astawan yachaykusun.

Kullkukunaqa rupay tiempollapim Israel nacionpiqa kaq. Chiri tiempopiqa huklawmanmi ripukuq. Chaymi Israel runakunapaqqa sasa karqa chiri tiempopi kullkuta Jehova Diosman apayqa (Cant. 2:11, 12; Jer. 8:7).

Palomakunatam ichaqa tukuy tiempo Israel runakunaqa uywaqku. Chaymi palomataqa ima killapipas apaqku (tupachiy Juan 2:14, 16 nisqanwan). Huk qillqam nirqa palomataqa yaqa lliw runakuna wasikunapa uchkunkunapi uywasqankumanta (tupachiy Isaias 60:8 nisqanwan).

¿Imatam kaywanqa Jehova Diosmanta yachanchik? Payqa ancha kuyakuq kasqanraykum Israel runakunamantaqa mañarqa imapas quy atisqallankuta, manam mañaqchu mana quy atisqankutaqa.