Astawan yachay munaqkunapaq
2 Tesalonicenses 3:14 nisqanman hinaqa, ¿punta apaqkunachu niwananchik mana kasukuq iñiqmanta cuidakunapaq, icha sapakamamantachu?
Apostol Pablom Tesalonica iñiqmasinkunaman qillqarqa: “Sichum kay cartapi nimusqaykuta pipas mana kasukuptinqa, chay runamanta cuidakuychik”, nispa (2 Tes. 3:14, qaway willakuyninta). Ñawpaqtam entienderqanchik pi iñiqmantapas cuidakunapaq punta apaqkuna niwananchikta. Pipas achka kutikama consejasqa kachkaspanpas bibliapa nisqanta mana kasukuptinqa huknin punta apaqmi huñunakuypi discursota quq. Chay discursota uyariruspanchikmi chay iñiqmasinchikwanqa manaña hukllawakuqchu kanchik nitaq ima kusirikuymanpas kuskaqa riqchu kanchik.
Kunanmi ichaqa entiendenchik pi iñiqmantapas cuidakunapaq sapakama tantiakunamanta Pablo consejasqanta. Chayraykum pi iñiqpapas mana allin ruwasqanmantaqa manaña punta apaqkunaqa discursotaqa qunankuchu. ¿Imanasqam chaynataña entiendenchik? Qatiqninpiyá yachaykusun.
Pablom cuentata qukururqa Tesalonicapi iñiqkunamanta wakinqa mana allin kawsasqankuta, consejaptinpas manam kasukurqakuchu. Ñawpaqta visitaspanmi nirqa: “Pipas mana llamkay munaqqa amataqyá mikuchunchu”, nispa. Chaynata niptinpas wakinninkuqa atichkaspankupas manam mantienekunankupaq llamkayta munaqkuchu. Chaymantapas, hukkunapa vidanmanmi chapukuchkarqaku. ¿Imaynam kananku karqa chayna iñiqkunawan? (2 Tes. 3:6, 10-12).
Pablom nirqa: “Chay runamanta cuidakuychik”, nispa. Chaywanqa nichkarqa mana allinman aparunanmanta cuidakunankumantam. Pablopa chayna nisqanqa karqa Tesalonica llaqtapi lliw iñiqkunapaqmi, manam punta apaqkunallapaqchu (2 Tes. 1:1; 3:6). Chayraykum iñiqkunaqa pipas bibliapa nisqanta mana kasukusqanmanta cuentata qukuruspankuqa sapakama tantiakunanku karqa chay iñiqwan ‘manaña hukllawakunankupaq’.
¿Pabloqa nichkarqa qarqusqa kaqwan hina manaña hukllawakunamantachu? Manam. Paymi nirqa: “Hinallayá iñiqmasikichikta hina rimapayaychik”, nispa. Iñiqkunaqa hukllawakunmankum karqa huñunakusqankupiqa hinaspa Diosmanta willakusqankupiqa. Ichaqa, sapakamam tantiakunanku karqa kusirikuspanku utaq imatapas ruwaspanku chay iñiqwan mana hukllawakunankupaqqa. ¿Imanasqa? Pablom nirqa: “Chaynapi pinqakunanpaq”, nispa. Kunanpas mana kasukuq iñiqwan imakunapi mana hukllawakuptinchikqa mana allin ruwasqanmanta pinqakuspanmi cambianman (2 Tes. 3:14, 15).
¿Imaynatam Pablopa nisqanta kasukuchwan? Pi iñiqmasinchikwanpas manaña hukllawakunapaqqa puntatam Pablopa nisqanman hina seguro kananchik mana allin kawsakusqanmanta. Wakin iñiqmasinchikkunaqa manam ñuqanchik hinachu imatapas tantianmanku, utaqmi mana gustonchikpaq hinachu imatapas ruwanmanku. Manam chaymantachu Pabloqa nichkarqa, manataqmi rimachkarqa sientirachiwaqninchik iñiqmasinchikkunamantachu. Payqa rimachkarqa mana allin ruwasqanmanta rimapayachkaptinkupas disyuntaña mana kasukuq iñiqmantam.
Kunanpas mayqin iñiqmasinchikpas Diosta mana kasukuyta munasqanmanta cuentata qukuspaqa kusirikuykuna kaptin mana hukllawakunapaqmi sapakama tantiakusun. a Chayna tantiakusqanchikmantaqa wasinchikpi kaqkunallawanmi rimananchik. Chaywanpas chay iñiqmasinchikwanqa hinallam hukllawakunanchik huñunakuypiqa chaynataq Diosmanta willakuypiqa. Mana allin ruwasqanta cambiaruptinmi ichaqa tukuy imapiña kaqmanta hukllawakuchwan.
a Yaqapaschá mayqin iñiqpas mantienekunanpaq mana llamkayta munanmanchu atichkaspanpas. Wakinñataqmi consejachkaptinkupas mana iñiqwan casarakunanpaq riqsinakuchkanman. Wakinñataqmi bibliapa nisqanpa contranpi utaq punta apaqkunapa tantiasqankupa contranpi rimayta qallaykunman utaqmi cuento qipi kaspan hukkunata sientichinman (1 Cor. 7:39; 2 Cor. 6:14; 2 Tes. 3:11, 12; 1 Tim. 5:13). Chayna kasqanta mana cambiayta munaspanqa ‘mana allintam kawsakuchkan’.
