Diospa Palabranmanta yachay

¿Imataq Diospa Gobiernonqa?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa, Jehová Diospa testigonkunam kay tapukuykunamanta yachanaykipaq yanapasunkiman.

1. ¿Imataq Diospa Gobiernonqa?

Hanaq pachamanta kamachikamuymi, chay gobiernom runakunapa gobiernonta chinkachinqa hinaptinmi Diospa munaynin rurakunqa kay Pachapi chaynataq hanaq pachapipas. Diospa Gobiernontam llapallanchik necesitanchik. (Leey Daniel 2:44; Mateo 6:9, 10.)

Lliw gobiernom necesitan kamachiqninta, chaymi Jehová Dios nombrarqa Churin Jesucristota Gobiernonpi kamachinanpaq. (Leey Lucas 1:30-33.)

2. ¿Imanasqataq Jesusqa allin gobernante?

Diospa Churinqa allin gobernantem kuyapayakuq, allin ruraq hinaspa runakunata yanapananpaq atiyniyoq kasqanrayku (Mateo 11:28-30). Jesusqa kawsariruspanmi hanaq pachaman kutirqa, ichaqa manam chayllachu kamachikamurqa (Hebreos 10:12, 13). Diospa alliqninpim suyarqa gobiernananpaq atiyta chaskinankama. (Leey Daniel 7:13, 14.)

3. ¿Sapallanchu Jesusqa gobiernanqa?

Bibliam nin hukkunapiwan gobiernananmanta. Daniel 7:27 sutichan sapaqchasqakuna otaq santo, nispa. Punta sapaqchasqakunaqa karqa Jesuspa allin apostolninkunam. Diosmi kunankama akllachkan payman sonqo kaqkunata. Paykunapas Jesus hinam hanaq pachapi kanankupaq espiritu hinaña kawsarinku. (Leey Juan 14:1-3; 1 Corintios 15:42-45.)

¿Haykataq hanaq pachaman rinqaku? Jesusmi paykunata suticharqa aslla ovejakunawan (Lucas 12:32). 144.000 runakunallam Jesuswan kuska kay Pachata gobiernamunqaku. (Leey Apocalipsis 5:9, 10; 14:1.)

 4. ¿Haykapitaq Diospa Gobiernonqa qallarirqa?

Jesusmi gobiernananpaq nombrasqa karqa 1914 * watapi. Chay qepallantam Satanastawan demonionkunata hanaq pachamanta kay Pachaman qarqomurqa (Apocalipsis 12:7-10, 12). Chaymantapacham astawan sasachakuy kachkan. Guerrakuna, muchuykuna, onqoykuna, hinaspa tukuy mana allinkuna kasqanmi Bibliapa nisqanman hina qawachin tukupay tiempopiña kasqanchikta (2 Timoteo 3:1-5). Diospa Gobiernonpi kawsay munaqkunaqa Jesustam kasukunanku. (Leey Lucas 21:7, 10, 11, 31, 34, 35.)

5. ¿Ima ruraytam atinqa Diospa Gobiernonqa?

Enteron Pachapi predicaywanmi lliw nacionkunamanta wara-waranqantin runakunata yanapachkan Diospa kamachikuyninmanta yachanankupaq (Mateo 24:14). Chaymantapas, tukuy mana allinkunata chinkachispanmi, Jesuspi iñiq “achka-achkallaña” runakunata amparanqa. (Leey Apocalipsis 7:9, 10, 13-17.)

Waranqa wata kamachisqanpim, Allpa pachata pisi-pisimanta sumaq huertaman tikrachinqa. Chaymantam Jesusqa Gobiernonta Taytanman kutichinqa (1 Corintios 15:24-26). ¿Reqsinkichu pitapas kay Gobiernomanta yachay munaqta? (Leey Salmo 37:10, 11, 29.)

Astawan yachayta munaspaqa qawariy ¿Imatapunim Bibliaqa yachachin? libropa 8 hinaspa 9 kaq yachachikuyninkunata, kay libroqa Jehová Diospa testigonkunapa rurasqanmi.

[Willakuy]