¿Pitaq Diosmanta yachachinan?

“Manam pipas yachachiqninmanta aswan allin reqsisqaqa kanmanchu. Chaywanpas astawan yachaspanqa yachachiqnin hinam kanqa” (LUCAS 6:40).

YAQAPASCHÁ wakin tayta-mamaqa warmankuman Diosmanta mana yachachiy atisqankupaq hapikunku. Ichapas piensanku mana ancha educacionniyoq kasqankuta otaq religionmanta pisillata yachasqankuta. Chaynata piensaspam saqenku pipas religionmanta yachaq otaq ayllunku yachachinanta.

Ichaqa, ¿pitaq wawa-churikunaman religionmanta hinaspa imayna kawsakuymanta allinta yachachinman? Bibliapa nisqantayá qawasun hinaspa yachayniyoq runakunapa nisqanwan tupachisun.

¿Imatam taytaqa rurananpuni?

Bibliapa yachachisqan: “Tayta-mamakuna, qamkunapas wawa-churikichiktaqa amayá piñachiychikchu, aswanqa kasukuqtayá uywaychik Señorninchikpa yachachikuyninman hina” (Efesios 6:4).

Yachayniyoq runakunapa nisqanku: ¿Imaynatam taytata yanapan Diosmanta allin yachasqanqa? Yachayniyoq runakunam 2009 watapi qellqarqaku kaynata nispa: “Religionniyoq kayqa runatam yanapanman allin tayta kananpaq.  Religionpi kayqa yanapanmi hukkunawanpas chaynataq kikinpas allinta kawsananpaq”, nispa (Fathers’ Religious Involvement and Early Childhood Behavior).

Churinta uywananpaq hinaspa yachachinanpaqmi Bibliaqa taytata kallpanchan (Proverbios 4:1; Colosenses 3:21; Hebreos 12:9). ¿Yanapanchu chayqa kay tiempopipas? Universidad de Florida nisqankum 2009 watapi qellqarqa taytakuna warmankuta imayna yanapasqankumanta. Chay yachayniyoq runakunam cuentata qokunku taytakuna warmankuman yachachiptinqa, warmankunam allinpaq hapikunku hinaspam hukkunapaqpas allinninta munanku. Qari warmakunam allinta portakunku, warmi kaqkunañataqmi piensayninkupipas allin kanku. Kaymi qawachin Bibliapa yachachisqanqa kay tiempopipas hinalla yanapasqanta.

¿Imatam mamaqa rurananpuni?

Bibliapa yachachisqan: “Amayá qonqaychu mamaykipa yachachisusqaykitaqa” (Proverbios 1:8).

Yachayniyoq runakunapa nisqanku: Warmakuna imayna portakusqankumanta estudiaqkunam 2006 watapi huk qellqapi nirqaku, taytamantaqa mamam sapa wawanpaq astawan tiempochakun, chaynam pasan achka nacionkunapipas (Handbook of Child Psychology). Wawanwan kuska kasqanraykum, mamapa rimasqan hinaspa imatapas imayna rurasqanmi wawanta yanapan allin wiñananpaq.

Tayta-mamakuna wawa-churinkuman Diosmanta cheqapta yachachispaqa iskay regalotam qochkanku. 1) Jehová Dioswan amistad rurananpaq, chayqa wiñaypaqmi yanapanqa. 2) Tayta-mamapa allin kaqta ruranankupaq yanapanakusqankuta qawananpaq (Colosenses 3:18-20). Tayta-mamata pi yanapaptinpas kikinkum warmankumanqa yachachinanku Diosmanta chaynataq kamachikuyninkunamantapas, chaynapi kusisqa wiñaypaq kawsanankupaq.

Chaynaqa, ¿imaynatam yachachinanku? ¿Imakunawanmi yanapachikunmanku?