¿Pitaq kamachichkan kay pachapi?

MANAPASCHÁ haykapipas reqsirqankichu runakunata wañuchiq organizacionpa jefentaqa. Ichaqa, ¿chayraykuchu nichwan chay runa mana kasqanta? Paykunaqa tukuytam ruranku pim kasqanta pipas mana yachananpaq. Wakinqa carcelmantam mana allin negociokunatapas dirigenku. Periodicokunapim noticiakuna sapakuti yuyarichiwanchik droga rantikuqkuna wañuchinakusqankumanta, chuchumikata servichikuspa qollqe rurasqankumanta hinaspa runamasinta rantikusqankumantapas. Paykunata mana rikuptinchikpas sutillam qawakun runamasinchikta imayna ñakarichisqankupi.

Chaynallataqmi Diablota mana rikuptinchikpas Diospa Palabranpim niwanchik payqa kawsaq kasqanmanta. Diabloqa, runakuna wañuchiq organizacionpa jefen hinam imaymanata llullakuspan munasqankunata ruran. Chaymantapas Bibliapa nisqanman hinam payqa, ‘tikrakun achkirichkaq angelman’ (2 Tesalonicenses 2:9, 10; 2 Corintios 11:14). Chayna kaptinpas rurasqankunam sutillata reqsichin. Hinaptinqa, ¿imanasqataq achka runakuna sasachakunku Diablo kasqanta creenankupaq? Pantasqa yachachikuykuna kasqanraykum. Chay yachachikuykunamantayá wakinta qawasun, Diablomanta Bibliapi ima willawasqanchikta manaraq yachachkaspa.

▪ “Diabloqa manam kanmanchu, manachá kuyakuq Diosqa chaynataqa unanchanmanchu karqa.” Bibliapa nisqanman hina, Dios mana pantaq, allin ruraq kasqanwanqa manach tupanmanchu Diablota unanchaptinqa. Bibliapiqa manataqmi yachachinchu chayna mana allin kaq unanchasqanmantaqa. Aswanmi Bibliaqa Diosmanta nin: “Payqa hatun rumi hina amparaqninchikmi. Paypa rurasqankunaqa alli-allinmi. [. . .] Payqariki confiakunapaq Diosmi. Paypiqa manam kanchu mana allinqa. Allinninpi derecho ruraqmi payqa”, nispa (Deuteronomio 32:4; Salmo 5:4).

Hinaptinqa, ¿imaynataq Diabloqa rikurimurqa? Yachanapaqyá qawasun, ¿pipas mana pantaq kachkaspa ruranmanchu mana allinkunata? Diosqa manam maquinakunata hinachu unanchawarqanchik, aswanqa imatapas kikinchik tanteakunapaqmi. Chaynam, mayqen unanchasqanpas kikinmi tanteakunan allin kaqta otaq mana allin kaqta rurananpaq. Allin ruraykunaqa sutillam qawakun, angelpas otaq runapas ima rurananpaq akllaptinqa.

Sutillam, kikinkumanta tanteaspanku akllanankupaq unanchachkaspanqa, manam Diosqa harkanmanchu mana allin ruranankumantaqa. Chaymi, mana pantaq unanchasqakunaqa kikinkum tanteanku Satanas hina mana allinta ruranankupaq. Jesusmi paymanta nirqa “cheqappi mana takyasqanmanta” (Juan 8:44, NM). Chayna nisqanmi qawachiwanchik qallariypiqa mana pantaq espiritu kasqanta, huk tiempom “cheqappi” takyarqa. * Ichaqa, ¿imanasqataq Jehová Diosqa kikinkumanta tanteaqta unancharqa? Kuyasqanrayku  hinaspa paykunapi confiaspanmi (recuadropi kayna yachachikuyta qaway:  “¿Yaqachu mana pantaq kachkaspan pantarunman?”).

▪ “Diabloqa Diospaqmi llamkan.” Wakinmi kaynata piensanku Job librota leespanku. Biblia leemusqanmanta huk runapa nisqanman hinaqa, ‘Allpa pachata [. . .] muyumusqanmanta’ Diablopa nisqanqa, willachkan Persia nacionpi wateqaqkunamantam, paykunam enteron nacionninta riqku imakuna pasasqanmanta reyninkuman willanankupaq (Job 1:7). Ichaqa piensarisun: sichum Diablota ninman karqa wateqaq rinanpaq, ¿willakunmanchu karqa ‘allpa pachanta [. . .] muyumusqanmanta’? Job libropi Diablomanta nispanqa, manam qawachinchu Diospa yanapaqnin kasqantaqa, aswanmi enemigon kasqanta. ¿Imaynatam yachanchik? Job libropim sutichan Satanas nispa, chayqa contranpi sayaq ninanmi (Job 1:6). Chaynaqa, ¿imanasqataq piensanku Diabloqa, Diospaq llamkasqanta?

Ñam punta pachak watapiqa wakin qellqakunapi (Qumran llaqtapi kaq judiokunapa libronkupi) qawachirqakuña Diabloqa Dioswan tanteasqanta chaynataq Diospa munasqanta rurananmantapas. Chayna piensaymi unay karqa. Ñawpa tiempomanta estudiaq J. B. Russellmi Martín Luteromanta nirqa: Luteropaqmi Diabloqa “huertapi llamkananpaq Diospa rastrillon hina” nispa. Luteropaqmi chay ‘rastrilloqa mana allin qorakunata aspispan  kusikun’. Diospa makinpi chayna kaspanqa Diospa munasqantam rurachkanman. Chay yachachikuyta Juan Calvino qatipakusqanmi allin ruray munaq Diospi iñiqkunata sientechirqa. Mana allinkuna pasananmanta kuyakuq Dios imanasqa saqesqanmanta entiendeypi sasachakuptinkupas astawanraqmi iskayrayarqaku Diospuni mana allinkuna kananpaq kallpanchasqanmanta (Santiago 1:13). Kay yachachikuykuna hinaspa pachak wata pasasqankunapi tukuy mana allin pasasqankunaraykum kunanqa achka runakuna manaña creenkuchu Diospi nitaq Diablopipas.

▪ “Diabloqa mana allinpa rikchayllanmi.” Chayna kaptinqa manach entiendechwanchu Bibliapi wakin textokunataqa. Qawasun chaypaq Job 2:3-6, nisqanta. Chaypiqa, ¿piwantaq Diosqa rimarqa? ¿Mana allin ruraykunapa rikchayllanwan? Otaq, ¿kikinpa mana allin kayninwan? Diosqa, ñataq Jobpa allin runa kasqanmantaqa rimarqaña, ¿imanasqataq qatiqllanpi Jobtaqa pruebaman churanman karqa? Mana allinkunamanta tumpaspaqa, rumi sonqo mana kuyapayakuq kasqantam Diosmanta nichkanchikman, allin ruraq kasqanta qawachinamantaqa (Salmo 92:15). Diosqa manam Jobtaqa imawanpas ñakarichirqachu. Kaywanqa nichwanmi, Diabloqa manam mana allinkunapa rikchayllanchu nitaq Diospa mana allin kaynintaqchu. Aswanqa Diospa contranpi churakuq angelmi.

¿Pitaq kay pachapi munaychakun?

Achka runakunam piensanku, Diablopi creeyqa ñawpa abuelokunapa creesqanmi nispanku. Ichaqa tukuy mana allinkuna pasasqanmi qawachin Diabloqa kawsaq kasqanta. Diablo mana kasqanta piensaspankum achka runakuna Diosta qepanchanku hinaspa nisqankunatapas mana kasukunkuchu.

Charles-Pierre Baudelaire sutiyoq runapa nisqanpim “Diabloqa sacrellaña kaspan pim kasqanta pakan”. Pim kasqanta pakaspanmi Diospi creenankumanta runakunata iskayrayachin. Chaymantapas, Diablo mana kawsaptinqa Dioschiki huchayoq kanman tukuy mana allinkuna pasasqanmantaqa. Chayna piensanankutam Diabloqa munan.

Diabloqa, runakunata wañuchiq organizacionpa jefen hinam pim kasqanta pakan. ¿Imanasqa? Bibliapunim willawanchik: “Yuyayninkuta Diablo tutayarachiptinmi paykunaqa mana iñikunkuchu, achkirichkaq allin noticiataqa manam rikuytapas atinkuchu, manataqmi entiendenkuchu Cristopa sumaq kayninmanta willakuytapas. Cristoqa Diospa rikchayninmi”, nispa (2 Corintios 4:4).

Kaykunata yacharuspapas tapukuchwanraqmi: ¿Imatam Jehová Diosqa ruranqa tukuy ñakariykuna kallpanchaq Diablota?, nispa. Qatiqnin yachachikuypim chaymanta qawasun.

[Willakuy]

[5 kaq paginapi suti rikuylla kaq willakuy]

¿Diospa serviqninchu icha enemigonchu Diabloqa?

[6 kaq paginapi dibujo hinaspa recuadro]

 ¿Yaqachu mana pantaq kachkaspan pantarunman?

Diosqa mana pantaqtam unancharqa runakunata hinaspa angelkunatapas ichaqa manam llapanpi munasqankuman hina kawsanankupaqchu. Adanqa mana pantaqmi karqa. Chayna kaptinpas cuidakunanmi karqa peligrokunamanta. Ejemplopaq, manam allinninpaqchu kanman karqa rumita, allpata hinaspa kullukunata mikuyninqa. Manataqmi piensanmanchu qaqa patamanta pawaykuspa mana imanakunantaqa.

Chaynataqmi, pipas Diospa kamachisqanta mana kasukuspanqa manam ninmanchu imawanpas mana ñakarinantaqa. Pipas libre kayninta mana allinta servichikuspanqa pantaruspanmi huchallikurunman (Genesis 1:29; Mateo 4:4).