Familiapaq consejokuna

Qosaykita otaq señoraykita respetay

Guillermom nin: * “Raquelmi, piñakuruspanqa llumpayta waqan. Parlapayaptiyqa astawanmi piñakun hinaspam rimayta mana munanchu. Manam ima ruraytapas atinichu. Chaywanmi wakinpiqa hukmanyani”.

Raquelmi nin: “Waqachkaptiymi Guillermo wasiman chayaramurqa. Imanasqa waqasqaymanta willakuyta manaraq tukuchkaptiymi niwarqa yanqamanta waqasqayta. Chaymi astawanraq sientechiwarqa”.

¿GUILLERMOWAN Raquel hinachu sientekunki? Iskayninkum parlayta munanku ichaqa manam atinkuchu. ¿Imanasqataq chayna tarikunku?

Qariwan warmiqa manam chaynallatachu rimanku ima piensasqankumantapas. Warmiqa ichapas imayna sientekusqanmanta sapakuti willakuyta munan. Qarikunañataqmi ima sasachakuytapas hawkalla kanankupaq chaylla allichanku ichaqa llumpay rabiananpaq hina kaptinqa manam rimayta munankuchu. ¿Imaynatam atipawaq qosaykiwan otaq señoraykiwan parlanaykipaq chayna sasachakuyta? Respetanakuspam atinki.

Respetakuqqa hukkunatam chaninchan chaymi kallpanchakun imayna sientekusqankumanta entiendenanpaq. Yaqapaschá warmacha kasqaykimanta yachachisurqanki autoridadniyoqta otaq yuyayniyoqkunata respetanaykipaq. Casado vidapim ichaqa sasachakunki vida pasaqmasiki respetaypi. Pusaq wataña casarasqa Lindam nin: “Felipeqa pacienciakuspa hinaspa kuyapayaspam pitapas uyarin. Ñoqawanpas chayna kanantam munarqani”. Yaqapasmi amistadnikikunawan otaq mana reqsinakusqaykiwan rimaspaqa allinta uyarinki hinaspa respetowantaq rimankipas. Ichaqa, ¿chaynatachu rimanki qosaykiwan otaq señoraykiwan?

Casado vidatam llumpayta sasachan mana respetanakuyqa. Rey Salomonmi qellqarqa: “Chaki tantallatapas mikuspa hawka kawsakuymi aswan allinqa fiestakunata ruraspa peleollapi kawsaymantaqa”, nispa (Proverbios 17:1). Bibliam qosata consejan señoranta respetananpaq (1 Pedro 3:7). Chaynallataqmi  ‘warmipas qosanta respetanan’ (Efesios 5:33).

¿Imaynatam atinmanku respetowan rimanakuyta? Qawasunyá Bibliapi wakin consejokunata.

Qosayki otaq señorayki rimaptin

¿Imanasqataq sasa? Wakin runakunataqa rimaymi gustan uyariymantaqa. ¿Qampas chaynachu kanki? Bibliapa nisqanman hinaqa ‘manaraq allinta uyarichkaspa rimayqa’ mana tanteoyoq kaymi (Proverbios 18:13). ¿Imanasqataq manaraq rimachkaspa allinta uyarina? 26 wataña casarasqa Kara sutiyoq warmim nin: “Ima sasachakuyniytapas qosay chaylla allichanantachuqaya munani. Manataqmi piensasqayman hina piensanantachu nitaq imanasqa sasachakuy kasqanpi piensanantachu munaniqa, aswanqa imayna sientekusqaymanta uyariwaspa entiendewanallantam”, nispa.

Wakin qarikunapas hinaspa warmikunapas hukmanmi sientekunku qosan otaq señoran rimananpaq hikutaptin. Chayraq casarasqa Lorenam cuentata qokurun, qosanqa ima sasachakuyninmantapas mana chaylla rimaq kasqanmanta. Pacienciakuspaymi suyani imayna sientekusqanmanta kikin rimananta.

¿Imataq yanapasunkichikman? Imapas chaylla sasachasuqnikichikmanta rimanaykichik kaptinqa hawka kaspaykichikyá rimaychik. ¿Rimarinanpaq hukniki sasachakuptinqa? Entiendenaykim, “Pozopi uku-uku yaku hinam runapa tanteayninqa. Imayna horqoytapas yachanmi entiendeq runaqa” (Proverbios 20:5). Pozo ukumanta yaku huntayoq baldeta chaylla horqospaqa usurachiwaqmi. Chaynam kanman qosaykita otaq señoraykita rimananpaq hikutaptikiqa manam munanqachu willakuyta hinaptinmi mana yachankichu imam piensasqanta. Chayna ruranaykimantaqa sumaqllata hinaspa respetowan tapuy, munasqaykiman hina chaylla mana rimaptinpas pacienciakuy.

Mayqennikichikpas rimaspaqa “chaylla uyariqyá kaychik, rimaychikpas allinta tanteaspayá, amataqyá piñakuqllañaqa kaychikchu” (Santiago 1:19). Allin uyariqqa sonqonwanmi uyarin. Chaynaqa kallpanchakuy vida pasaqmasiki imayna sientekusqanta entiendenaykipaq. Imayna uyarisqaykimantam payqa cuentata qokunqa respetasqaykita otaq mana respetasqaykitapas.

Jesusmi yachachiwarqanchik imayna uyarinamanta. Yanapananta munaspanmi huk runa Jesusman asuykurqa, ichaqa manam chayllachu yanaparqa. Puntataqa uyarirqam hinaspam sonqonpi llakikurqa, chaymantañam sanoyachirqa (Marcos 1:40-42). Jesus hina chay kimsanta ruray. Qosayki otaq señoraykiqa entiendenaykitam munan manam sasachakuyninta chaylla allichanaykitachu. Chaynaqa allinta uyariy hinaspa imayna sientekusqanmanta entiendey, chaymantaña imayna yanapanaykipaq piensay. Chaywanmi qawachinki respetasqaykita.

KAYTAPAS RURAWAQCHIKMI. Qosayki otaq señorayki imamantapas rimachkaptinqa kallpanchakuy chaylla mana contestanaykipaq. Suyay rimayta tukunankama, allinta entienderuspaykiña contestay. Hinaspa, ratoneqmanña tapuykuy: “¿Ima ninkitaq, atencionwanchu uyarirqayki?”, nispa.

Qam rimaptiki

¿Imanasqataq sasa? Lindam nin: “Televisionpim familiamanta asikunapaq kaqta ruraspankuqa qosanta otaq warminta penqachinanpaq hina rimanku, burlakunku otaq kaminku”, nispa. Chaymantapas mana respetanakuq familiapim achka runakuna wiñanku. Chayna wiñasqankum sasachan casarakuspa familiapi allin kawsakuyninkuta. Canadá nacionpi kaq Ivy sutiyoq warmim willakun: “Burlakuq, qaqchakuq hinaspa millay sutikunawan sutichakuq familiapim wiñarqani”, nispa.

¿Imataq yanapasunkichikman? Qosaykimanta otaq señoraykimanta rimaspaqa ‘allin kaqkunallatayá rimay chaynapi uyarisuqnikipas  allinninpaq kaptin aswan-aswan wiñananpaq’ (Efesios 4:29). Qosaykimanta otaq señoraykimanta rimaspaqa sumaq kayninkunata qawachiy.

Iskayllaykichik kaspapas ama nanay simiwanqa nitaq kaminakuspaqa rimaychikchu. Rey Davidtam warmin Mical piñakuspa hinaspa despreciaspan nirqa: ‘Mana penqakuq qalalla runa hinam qawachikamurqanki’, nispa. Chayna nisqanwanqa manam qosallantachu sientechirqa, Diostapas manam agradarqachu (2 Samuel 6:20-23). ¿Imatam kayqa yachachin? Qosayki otaq señorayki rimaptinqa allinta uyariy imam nisqanta (Colosenses 4:6). Pusaq wataña casarasqa Felipem reqsikun imawanpas kunankama sasachakusqankuta. Wakinpiqa imamantapas rimaspa astawan sasachakusqantam cuentata qokurqa: “yacharunim rimaypi atipanakuyqa yanqapaq kasqanta. Aswan allinqa entiendenakuymi”.

Ñawpa tiempopi huk viudam llumchuyninkunata nirqa: ‘Casarakuspayá wasikichikpi hawkayayta tariychik’, nispa (Rut 1:9). Casado vidankupi respetanakuqqa wasinkupim ‘hawkayayta tarinku’.

KAYTAPAS RURAWAQCHIKMI. Kaypi consejokunata kuska leespaykichik tapuy: “Hukkunapa qayllanpi qanmanta rimaptiy ¿imaynataq sientekunki? ¿Imaynatam aswan allinta rimayman?”. Chaymantañataq allinta uyariy rimasqanta hinaspa nisusqaykita ruray.

Mana kaqlla piensasqaykichikta reqsikuychik

¿Imanasqataq sasa? Chayraq casarasqakunam hapipakunku Bibliapi kayna nisqanman: ‘Huk runa hinallañam kanqaku’, chaywanmi piensanku imayna kayninkupi hinaspa piensayninkupi kaqlla kasqankuta (Mateo 19:5). Ichaqa chayllam cuentata qokunku mana chayna kasqanmanta. Chaymi tiempopa risqanman hina qaqchanakustin kawsanku. Lindam nin: “Felipeqa manam ñoqa hinachu imamantapas preocupakun. Wakinpiqa payqa hawkallam kakun, ñoqañataqmi llumpayta preocupakuni hinaptinmi rabiakuni ñoqa hina mana preocupakusqanta qawaspay”.

¿Imataq yanapasunkichikman? Imayna kasqaykichikta respetanakuspa aguantanakuychik. Rikchanachisun: Ñawiwan rinriqa manam chaynallachu kanku ichaqa iskayninmi yanapawanchik mana imanakuspalla calleta chimpanapaq. Yaqa kimsa chunka wataña casarasqa Adrianam nin: “Diospa Palabranpa contranpi piensasqayku mana kaptinqa reqsikunikum chaynalla mana piensasqaykuta. Casarasqa kaspaykupas manam kaqlla piensaqchu kaniku”, nispa.

Vida pasaqmasikipa imayna kasqanwan otaq piensasqanwan piensasqayki mana tupaptinqa, imayna sientekusqanpi piensay, ama kikikipapichu (Filipenses 2:4). Adrianapa qosan Fabianmi nin: “wakinpiqa manam señoraypa nisqantaqa entiendenichu nitaq pay hinachu piensani. Ichaqa yuyarinim, piensasqaymantaqa señorayta kuyasqay aswan allin kasqanta. Señoray kusisqa kaptinqa ñoqapas kusisqam kani”, nispa.

KAYTAPAS RURAWAQCHIKMI. Vida pasaqmasikipa rurasqankunawan piensasqankuna qampamanta aswan allin kaqkunata listapi churay (Filipenses 2:3).

Respetanakuyqa ancha allinpunim casado vidapi kusisqa kawsakunapaq. Lindam nin: “Casado vidapi respetanakuspaqa hawkayaytawan kusikuytam tarinchik. Chaypaq kallpanchakuyqa allinpunim”, nispa.

[Willakuy]

YUYAYMANANAPAQ TAPUKUYKUNA

▪ ¿Imaynatam familiayta yanapan qosaypa otaq señoraypa imayna kasqan?

▪ ¿Imanasqataq qosaypa otaq señoraypa piensasqantaqa allinpaq hapinay Diospa Palabranpa contranpi mana kaptinqa?