DIOSMAN ASUYKUYCHIK
“Mañakuptikichikqa Diosqa qosunkichikmi”
‘Señor, yachaykachiwaykuyá Dios mañakuyta’ (Lucas 11:1). Chaynatam Jesusta nirqa huk kaqnin qatiqnin. Jesusñataqmi iskay rikchanachiywan yachachirqa Dios uyariwananchikpaq imayna mañakunamanta. ¿Haykapipas tapukurqankichu mañakusqaykita Dios uyarisqanmanta? Chayna kaptinqa, yachaytachá munanki Jesuspa nisqanta (leey Lucas 11:5-13).
Punta kaq rikchanachiyqa, mañakuq runamantam rimachkan (Lucas 11:5-8). Huk runamanmi chawpi tutata watukuq chayarurqa amistadnin, paypaqa manam imanpas karqachu mikuykachinanpaq. Ichaqa qonanpunim karqa. Llumpay tutaña kaptinpas huk amistadninpatam rirqa kimsa tantata aynikamunanpaq. Chay amistadninqa manam hatariyta munarqachu familianta mana rikcharichinanrayku. Ichaqa hinallam hikutarqa hatarinankama, hinaptinmi tukuy ima necesitasqanta qoykurqa. a
¿Imatam kaywan yachachwan Dios mañakuymanta? Hinallam mañakunanchik, maskananchik hinaspa qayakunanchikpas (Lucas 11:9, 10). ¿Nichkanchu kaywanqa mana uyariy munaq Diospa punkunta takachkaq hina mañakusqanchik kasqanta? Manamá. Diosqa munachkanmi qoyta iñiywan imapas mañakusqanchiktaqa, ichaqa paypa munasqanman hinam mañakunanchikqa. Iñiyninchiktam qawachinchik sapa kuti mañakuspaqa. Achka kutikama imatapas mañakuspam necesitasqanchiktapuni qawachinchik chaynataq Dios qowananchikmanta seguropuni kasqanchiktapas (Marcos 11:24; 1 Juan 5:14).
Huknin rikchanachiypim qawachin mañakuyta Jehova Dios uyarisqanmanta (Salmo 65:2). Jesusmi tapurqa: “Churikichikmanqa ¿yaqachum culebrata qoykuwaqchik challwata mañakusuptikichik otaq atoq-atoqta runtuta mañakusuptikichik?”, nispa. Manamá mayqan tayta-mamapas churinmanqa qonmanchu mana allinninpaq kaqtaqa. Chaymantam Jesusqa nirqa: ‘Churikichikmanqa allin kaqkunatam qonkichik pantaq tayta-mama kachkaspaykichikpas ¿chaychu mañakuqkunamanqa hanaq pachapi kaq Taytaykichik mana qosunkichikman allin kaqkunata?’, nispa (Lucas 11:11-13; Mateo 7:11). b
Diosqa munachkanmi qoyta iñiywan imapas mañakusqanchiktaqa
Kay rikchanachiywanmi Jesusqa yachachiwanchik Jehova Diosqa mañakusqanchikta uyariq kasqanta, kuyakuq Tayta hinam payqa munachkan imapas necesitasqanchikpi yanapawayninchikta. Chaymi Jehova Diosta yupaychaqkunaqa mana iskayrayaspa sonqonkupa munasqanta mañakunmanku. Chaymantapas allinninkupaq munasqanta yachaspankum, Diospa qosqantaqa kusikuywan chaskikunku munasqankuman hina mana kaptinpas. c
a Jesuspa rikchanachisqanqa qawachinmi chay tiempopi costumbrekunata. Judiokunapaqqa samaykachiymi imamantapas ancha allinqa karqa. Paykunaqa huk punchawllapaqmi tantataqa ruwaqku, tukuruptinqa vecinonkumantam aynikamuqku. Chaymantapas wakcha familiakunaqa huk cuartollapim llapanku puñuqku esterapa hawanpi, chaymi huk kaqninku hatarispaqa wakintapas rikcharirachinman karqa.
b Jesusqa achka kutipim runakunata yuyaymanachirqa rikchanachiykunawan, hinaspam niq ‘chaychu mana’ nispa. Huk estudioso runam nirqa: “Punta rimasqan cheqap kaptinqa, qatiqninman rimasqanqa aswanraqchiki”, nispan.
c Diosta imayna mañakuymanta astawan yachayta munaspaqa, qaway ¿Imatapunim Bibliaqa yachachin? niq libropa 17 yachachikuyninta, kayqa Jehova Diospa testigonkunapa ruwasqanmi.
