WAKINMI NINKU: “Diosqa kay pachatam kamachin, paymi mana llakipayakuq kasqanrayku hatun desgraciakunawan castigawanchik”, nispa.

BIBLIAPA NISQAN: ‘Kay pachapi mana allin kaqkunaqa Diablopa makinpim kachkan’ (1 Juan 5:19). Bibliapa nisqanman hinam Satanas Diabloqa mana allin ruwaq (Mateo 13:19; Marcos 4:15). ¿Cheqapchu kanman Bibliapa chayna nisqanqa? Kaykunapi reparay: Satanasqa kay pachapi munaychakuq kasqanwanmi runakunata kallpanchan pay hina mana llakipayakuq, kikillankupaq munaq kanankupaq. Chayna kasqankuwanmi allpantinpi qachachanku wayrata, yakuta hinaspa tukuy imatapas purmachinku. Yachayniyoq runakunam ninku chayna qachachasqankuwan otaq purmachisqankuwan tukuy hatun desgraciakuna astawan yapakusqanmanta.

¿Imanasqam Diosqa saqen kay pachata Diablo kamachinanpaq? Kay tapukuyta contestanapaqqa puntatam yachananchik Adantawan Evata imam pasasqanmanta. Paykunam Diospa contranpi churakurqaku otaq manam kasukurqakuchu, chaymantapacham yaqa lliw runakuna Jehova Diosta mana kasukunkuchu. Chaymi runakunaqa Satanaspa munaychakusqanpi tarikunku. Chayraykum Jesuspas nirqa: Diabloqa ‘kay pachatam kamachichkan’, nispa (Juan 14:30). Ichaqa manam wiñaypaqchu kamachinqa.

Satanaspa tukuy mana allin ruwasqanqa Jehova a Diospa sonqontam nanachin. Israelitakuna sasachakuypi tarikuptinku Dios imayna sientekusqanmantam Biblia nin: ‘Runankunapa tukuy ñakarisqankunapim paypas ñakarirqa’, nispa (Isaias 63:9). Jehova Diosqa ancha kuyapayawasqanchikraykum Churin Jesucristota nombrarun kamachiwananchikpaq. Paymi Satanaspa gobiernontaqa chaylla chinkachinqa.

IMATAM ENTIENDENCHIK: Satanasqa hatun desgraciakunamantam runakunata mana amparanchu, Jesusmi ichaqa amparanqa. Kay Pachapi kaspanmi qatiqninkunata sinchi wayra paramanta ampararqa. Bibliam willakun: ‘Wayrata qaqchasqanmanta. Qochatapas hawkayananpaq’ kamachisqanmanta. Chayna kamachisqanwan tukuy ‘hawkayaruptinmi’ discipulonkunaqa admirasqallaña ninakurqaku: “¿Pimá kay runaqa wayrapas yakupas kasunanpaqqa?”, nispa (Marcos 4:37-41). Jesuspa chayna ruwasqanmi qawachiwanchik Diosta kasukuqkunataqa hamuq tiempopi amparananpaq kasqanta (Daniel 7:13, 14).