KAY revistapa qaranpi tapukuyqa, ¿hukmanyachisunkichu? Wakinqa hukmanyankum, wakinmi ichaqa piensanku Diosqa mana llakipayakuq kasqanmanta.

Hatun desgraciakuna pasaptin librakuqkunam wakinqa kaynata tapukunku: “¿Imanasqataq Diosqa saqen kayna pasananta? ¿Mana llakipayakuq kaspanchu?”, nispa.

Wakinñataqmi Noeypa tiemponpi sinchi paramanta Bibliapi leesqankuwan piensanku Diosqa mana llakipayakuq kasqanmanta. Tapukunkum: “¿Imaynamá kuyakuq Diosqa achkallaña runakunata wañurachirqa? ¿Mana llakipayakuq kasqanraykuchu?”, nispa.

¿Haykapipas chaynata tapukurqankichu? ¿Pipas chaynata tapusuptikiqa atiwaqchu contestayta? Imayna kaptinpas qatiqninpi willakuykunam yanapasunki.

Manam, Diosmi unanchawarqanchik ‘kikinman rikchakuqta’ chaymi runakunaqa cuentata qokunchik allin kaqmanta chaynataq mana allin kaqmanta (Genesis 1:27). Chayraykum munanchik allin ruwaykunalla kananta. Pipas mana allin ruwasqanwan runamasinta ñakarichiptinqa manam allinpaqchu qawanchik, Diosqa astawanraqchá mana allinpaq qawan.

Chayna kasqanmantam Biblia nin: ‘Kawsayniyqa ancha allinmi qamkunapa kawsaynikichikmantaqa. Chaynataqmi piensasqaykunaqa ancha allinmi qamkunapa piensasqaykichikmantaqa’, nispa (Isaias 55:9). Chayna nisqanpa contranpichá rimachwan Diosqa mana llakipayakuqmi nispaqa, chaymantapas nichkachwanchá Diospa piensayninmantaqa piensayninchik aswan allin kasqanta. Chaynata manaraq piensachkaspam allintaraq yachananchik. Diosqa mana llakipayakuqmi nispa piensananchikmantaqa reparananchikmi imanasqa wakin runakunata castigasqanpi. Puntatayá yachasun mana llakipayakuq ninanqa ima ninan kasqanmanta.

Pimantapas mana llakipayakuq nispaqa imanasqa chayna ruwasqanmantam rimachkanchik. Mana llakipayakuqqa kusikunmi hukkunapa ñakarisqanwan otaq imawan ñakariptinpas manam llakipayanchu. Sientichinanrayku churinta corrigeq taytaqa mana llakipayakuq kasqanpaqmi qawanchik. Kuyasqanrayku yachachinanpaq corregiptinmi ichaqa allin tayta kasqanpaq qawanchik. Wakinpiqa manam yachanchikchu imanasqa chayna ruwasqankumanta ichaqa mana piensarispam chaylla juzganchik.

Kay yachachikuypa qallariyninpi yachamusqanchikman hinam hatun desgraciakuna kaptin otaq Diospa castigonmanta Bibliapi leesqankuwan wakinqa piensanku Diosqa mana llakipayakuq kasqanmanta. ¿Chaykunachu qawachin Diosqa mana llakipayakuq kasqanta?