Éxodo 12:1-51
-
Pascua Fiestata ruwakunanmanta (1-28)
-
Yawarta punkuq k’aspinkunaman ch’aqchunanku (7)
-
-
Chunka kaq plaga: Phiwi wawakuna, ñaupaq wachay uywakunapas wañusqanmanta (29-32)
-
Egiptomanta Israel runakuna lloqsisqankumanta (33-42)
-
Tawa pachaj kinsa chunka watakunaq tukupusqan (40, 41)
-
-
Pascua Fiesta imayna aparikunanpaq kamachikuykunamanta (43-51)
12 Egipto llaqtapin Jehová Diosqa Moisesta Aarontawan nirqan:
2 “Kay killan qankunapaq ñaupaq kaq killa kanqa, kay killawanmi qankunapaq wata qallarinqa.+
3 Llapan Israel runakunata nimuychis: Diosmi nin: Kay killapin chunka kaq p’unchaypi sapanka familia juj ovejata alistanqa,+ sapanka wasipaqmi juj oveja kanqa.
4 Mayqen familiapas juch’uylla kanqa juj ovejapaq chayqa, cercapi kaq wasimasinwan kuskan mijunqa. Chay ovejataqa jayk’achus kasqankuman jinan rakinakunqaku, may tukuytachus sapankapas mijunqa chayman jinan rakinakunqaku.
5 Chayta ruwanapaqqa watayoq qhali orqo ovejatan ajllankichis.+ Ichaqa kanmanmi orqo cabrachapas.
6 Chaytan cuidankichis kay killapi chunka tawayoq p’unchaykama.+ Jinaspa tutayaykuyta jina* Israelpi sapanka familia chayta ñak’ankichis.+
7 Chay ovejaq yawarnintan maypichus mijunkichis chay wasiq punkunpa iskaynin sayaq k’aspinman, chakasqa k’aspinmanwan ch’aqchunkichis.+
8 ”Chaymantapas chay aychataqa ninapi kankaspan chay tuta llapanta mijunkichis.+ Mana levadurayoq t’antata,+ jaya verdurakunatawanmi mijunkichis.+
9 Aman aychaq imallantapas jankutaqa ni t’impusqatapas mijunkichischu; llapantan umantinta, patasninkunantinta, wijsantinta kankankichis.
10 Aman chay aychaq imantapas qhepantin p’unchaypaqqa puchunkichischu, puchunqa chayqa llapantan ruphachipunkichis.+
11 Mijuspaykichisqa lloqsinaykichispaq jinan listollaña mijunkichis,* usut’aykichis churasqa taunaykichis jap’iykusqa ima. Chaymantapas apurayllan mijunkichis. Chay Pascua Fiestaqa noqa Jehová Diospaqmi ruwasqa kanqa.
12 Chay tutan noqaqa lliu Egiptota purisaq jinaspa llapa phiwi* wawakunata wañuchisaq. Ñaupaq wachay uywakunatapas wañuchisaqmi.+ Egiptopi llapa yanqa dioskunatan juzgaspa castigasaq.+ Noqaqa Jehová Diosmi kani.
13 Yawarmi may wasipichus kashankichis chaypaq señal kanqa. Yawarta rikuspaymi noqaqa jawallanta pasasaq. Egiptota castigaspaqa manapunin qankunataqa imanasaykichispaschu.+
14 ”Chay p’unchayqa yuyarina p’unchaymi kanqa, chay p’unchaymi qankunaqa noqa Jehová Diospaq fiestata ruwankichis. Chaymantapas chay p’unchaytaqa wiñaypaqmi yuyarinkichis qankunapas llapa mirayniykichiskunapas. Kay kamachisqayqa wiñaypaqmi kanqa.
15 Qanchis p’unchaymi mana levadurayoq t’antata mijunkichis,+ chaymi qankunaqa ñaupaq p’unchaymantapacha levadurayoq masata wasiykichismanta wijch’unkichis. Pipas chay qanchisnintin p’unchaymanta mayqen p’unchaypas imatapas levadurayoqta mijuqqa wañuchisqan kanan.
16 Ñaupaq kaq p’unchaypas qanchis kaq p’unchaypas noqata adorawanaykichispaqmi juñukunkichis. Aman chay p’unchaykunaqa imapipas llank’ankichischu.+ Chay p’unchaypi mijunallaykichispaqmi wayk’ukunkichispas.
17 ”Chay p’unchaymi noqaqa Egiptomanta llapaykichista orqosaykichis, chayraykun qankunaqa Mana Levadurayoq T’anta Fiestata ruwankichis.+ Chaymantapas chay p’unchaytaqa wiñaypaqmi yuyarinkichis wawaykichiskunapas wawaykichiskunaq wawankunapas. Kay kamachisqayqa wiñaypaqmi kanqa.
18 Ñaupaq killapin qankunaqa mana levadurayoq t’antata mijunkichis chunka tawayoq p’unchay tardeyaykuymanta iskay chunka jujniyoq p’unchay tardeyaykuykama.+
19 Qanchis p’unchaymi wasiykichispiqa mana kanqachu poqosqa masa. Mayqen runapas imatapas levadurayoqta mijunqa chayqa, Israel runaña kanqa chaypas, forasteroña kanqa chaypas wañuchinkichismi.+
20 Amapunin imatapas levadurayoqtaqa mijunkichischu. May tiyasqaykichispipas mana levadurayoq t’antatan mijunkichis, nispa”.
21 Jinan Moisesqa kaq ratu Israelpi llapa umalliqkunata* wajachimurqan,+ jinaspa nirqan: “Sapankaykichis familiaykichispaq juj malta animalta* ajllamuychis, jinaspa ñak’amuychis Pascua Fiesta sacrificiopaq.
22 Hisopo plantata jap’ispan puruñapi* jap’isqaykichis yawarwan ch’aqchunkichis punkupi iskaynin sayaq k’aspikunata, punku chakatawan. Qhepantin p’unchaykaman ama pipas wasimanta lloqsimunqachu.
23 Jehová Dios Egipto runakunata castigaq jamuspa punkuykichispi iskaynin sayaq k’aspikunapi chakasqa k’aspipiwan yawarta rikunqa chayqa, jawallantan Jehová Diosqa chay punkukunata pasanqa. Manan pitapas chay wasipi kaqtaqa wañuchinqachu.+
24 ”Chay fiestataqa ruwallankichispunin, chaytan kamachiykichis qankunatapas wawaykichiskunatapas. Chay kamachisqayqa wiñaypaqmi kanqa.+
25 Jehová Diospa prometesqan jallp’aman jaykuspaykichispas ruwashallankichismi chay fiestataqa.+
26 Wawaykichiskuna tapusunkichis, ¿imaraykutaq kay fiestatari ruwankichis?,+ nispa chayqa,
27 ninkichismi: Kay sacrificioqa Jehová Diospaq Pascua Fiesta ruwanapaqmi. Paymi Egipto runakunata castigashaspa Israel runakunaq wasinpa jawallanta pasarqan. Chhaynapin familianchiskunata librarqan, nispa”.
Chayta uyarispan Israel runakunaqa qonqoriykukuspa pampakama k’umuykurqanku.
28 Chaymantataq Israel runakunaqa imaynatachus Jehová Dios Moisesta Aarontawan kamachirqan chayman jina ruwarqanku.+ Arí, paypa kamachisqanman jinapunin ruwarqanku.
29 Kuska tutatan Jehová Diosqa Egiptopi llapa phiwi wawakunata wañuchirqan.+ Tronopi tiyaq faraonpa* phiwi wawanmanta carcelpi preso runaq phiwi wawankama. Uywakunaq ñaupaq wachaynintapas llapantan wañuchirqan.+
30 Jinan chay tuta faraonpas, serviqninkunapas, llapa Egipto runakunapas sayarirqanku, jinaspa qaparirqanku, sinchitapunin waqarqanku. Manan juj wasipas mana wañuqniyoqqa karqanchu.+
31 Chay tutapachan faraonqa Moisesta Aarontawan+ wajachimuspa nirqan: “¡Ripuychis kaymanta! Llaqtay ukhumanta lloqsiychis qankunapas llapa Israel runakunapas. Nisqaykichisman jina Jehová Diosniykichista adoramuychis.+
32 Nisqaykichisman jina ovejakunantin wakakunantin ripuychis.+ Ichaqa Diosniykichismanta mañapuwaychis bendeciwananpaq”, nispa.
33 Egipto runakunaqa usqhayta ripunankupaqmi Israel runakunata valekurqanku.+ Chaymi nirqanku: “¡Mana ripuqtinkuqa llapanchismi wañusunchis!”,+ nispa.
34 Jinan Israel runakunaqa mana levadurayoq masata, masa ruwanankutawan q’epichaspa rijrankupi aparikurqanku.
35 Chaymantapas Israel runakunaqa Moisespa nisqanman jinan Egipto runakunamanta qolqe cosaskunata, qori cosaskunata, p’achakunatawan mañakurqanku.+
36 Jehová Diosmi Israel runakunata Egipto runakunawan allinpaq qhawarichirqan, jinan chay Egipto runakunaqa llapa imachus mañakusqankuta qorqanku. Israel runakunaqa lliutan Egipto runakunata ch’utirqanku.+
37 Chaymantataq Israel runakunaqa Ramesés+ llaqtamanta Sucoj+ ladoman puririrqanku. Paykunaqa soqta pachaj waranqa jinan karqanku, wawakunaqa manan yupasqachu karqanku.+
38 Paykunawan kuskan rillarqankutaq juj runakunapas,* chay runakunapas askhallañan karqanku.+ Chaymantapas Israel runakunaqa ovejakunantin, cabrakunantin, wakakunantin iman lloqsirqanku. Qatisqanku uywakunaqa askhapunin karqan.
39 Egiptomanta apasqanku masawanmi paykunaqa mana levadurayoq muyu t’antakunata ruwakurqanku. Egiptomanta usqhayta lloqsinanku kaqtinmi paykunaqa manaña masaman levadurata churarqankuchu, manataqmi mijunata alistakunankupaqpas tiemponku ayparqanñachu.+
40 Egiptomanta lloqsiq Israel runakunaqa tawa pachaj kinsa chunka watañan forastero jina jujpa llaqtanpi tiyasharqanku.+
41 Tawa pachaj kinsa chunka wata junt’akusqan p’unchay kikinmi Jehová Diospa llaqtanqa* Egiptomanta lloqsimpurqan.
42 Chay tutan Jehová Diosqa Israel runakunata Egiptomanta orqorqan. Chayta yuyarispan Israel runakunaqa Jehová Diospaq fiestata ruwananku karqan.+ Wiñaypaqmi paykunapas llapa mirayninkupas chayta yuyarinanku karqan.
43 Jehová Diosmi Moisesta Aarontawan nirqan: “Pascua Fiestaqa kayman jinan aparikunqa: Manan pi forasteropas Pascua Fiesta sacrificiotaqa mijunqachu.+
44 Piña esclavota rantikurqan chaypas, qhari kaynin qarachatan kuchunan,+ chayñan chay esclavoqa chay sacrificiota mijunqa, mana chayqa manan mijunqachu.
45 Manan llaqtaykichispi tiyapakuq runapas, ni waj llaqtayoq llank’apakuq runapas chay sacrificiotaqa mijunqachu.
46 Chay aychataqa juj wasillapin mijukunqa. Aman chay aychamanta imatapas jawamanqa orqomunkichischu nitaqmi ima tulluntapas p’akinkichischu.+
47 Llapa Israel llaqtan Pascua Fiestataqa ruwanqa.
48 Llaqtaykichispi tiyaq waj llaqtayoq runa noqa Jehová Diospaq Pascua Fiestata ruwayta munanqa chayqa, familianpi llapa qharikunaq qhari kaynin qarachatan kuchunan. Chayta ruwaspallan payqa chay fiestata ruwayta atinman. Chaymantapas payqa Israel llaqtayoq runa jinan kapunqa. Pipas mana qhari kaynin qaracha kuchusqachu kashan chayqa, manan mijunqachu Pascua Fiesta sacrificiotaqa.+
49 Israel runakunapas qankuna ukhupi tiyaq waj llaqtayoq runakunapas kay kamachikuyman jinan ruwanqaku”,+ nispa.
50 Israel runakunaqa imaynatachus Jehová Dios Moisesman Aaronmanwan kamachirqan chayman jinan llapankupas ruwarqanku. Arí, paypa kamachisqanman jinapunin ruwarqanku.
51 Chay kikin p’unchaymi Jehová Diosqa llapa Israel runakunata Egiptomanta orqomurqan.
Uraypi willakuykuna
^ Hebreo rimaypiqa “iskaynin tardenta” ninmi. Yaqapaschá chaytaqa nishan inti jaykuywan tutawan tupayta.
^ Chaypiqa “cinturaykichis watasqan mijunkichis” nillanmantaqmi.
^ Chaypiqa “kuraq runakunata” nillanmantaqmi.
^ Chaypiqa malta ovejamanta otaq malta cabramantan rimashan.
^ Puruñaqa manka jinan.
^ Egipto reykunatan “faraón” nispa niqku.
^ Chaypiqa wakin Egipto runakunamanta waj llaqtayoq runakunamantawanmi rimashan.
^ Hebreo rimaypiqa “Jehová Diospa ejercitonkunaqa” ninmi.
