Éxodo 15:1-27
15 Chay kutipin Moisesqa Israel runakunawan kuska Jehová Diosman takirqan:+
“Jehová Diosniymanmi takisaq, paymi ancha jatunchasqa Diosqa.+
Caballokunatan runakunantinta lamar-qochaman wijch’uykun.+
2 Jehová* Diosmi kallpaypas atiyniypas, paymi salvaqniyqa.+
Paymi Diosniyqa, paytan alabasaq.+ Paymi taytaypa Diosninqa,+ paytan jatunchasaq.+
3 Jehová Diosqa kallpasapa maqanakuqmi.+ Paypa sutinmi Jehová.+
4 Lamar-qochamanmi qatiykun faraonpa* carretankunata soldadonkunatapas.+
Allichachaq soldadonkunan Puka lamar-qocha ukhuman chinkaykapun.+
5 Aytikushaq unun paykunata millp’uykapun, rumi jinan unu ukhuman chinkaykapunku.+
6 Jehová Diosníy, paña makiykiqa ancha atiyniyoqmi.+
Diosníy Jehová, paña makiykiqa enemigokunata ñut’uqmi.
7 Jatun atiyniykiwanmi qan contra sayariqkunata atipanki.+
K’araq phiñakuyniykitan kacharinki, chaytaq ichhuta jina paykunata rupharparin.
8 Senqaykiq samarisqanwanmi unukuna jatarirqan;mana kuyurispan perqa jina chaypi sayarqan.
Aytikushaq unukunan lamar-qocha sonqopi tikayarqan.
9 Enemigoykin nisharqan: ¡Qatipasaqmi! ¡Ayparusaqmi!
¡Kaqninkutan qechusaq, ima munasqaytan jap’ikapusaq!
¡Espadaytan orqosaq! ¡Makiymi paykunata chinkachinqa!,+ nispa.
10 Qanmi phukurimurqanki, lamar-qochataq paykunata millp’uykurqan.+
Plomo* jinan manchakuy unu ukhuman chinkaykurqanku.
11 Jehová Diosnilláy, ¿mayqen diostaq qan jina kanman?+
¿Pin qan jina ch’uyay-ch’uya kanman?+
Qanqa manchakuna Diosmi kanki,takikunawan jatunchana Diosmi kanki,admirana ruwaykunata ruwaqmi kanki.+
12 Paña makiykitan jaywarimurqanki, jinan jallp’aqa paykunata p’ampapurqan.+
13 Mana tukukuq munakuywanmi* libramusqayki llaqtata pusamurqanki.+
Kallpaykiwanmi paykunata pusanki ch’uya tiyanaykiman.
14 Llaqtakunan chayta yachanqaku,+ jinaspa manchakuymanta khatatatanqaku.*
Filistea runakunatan sinchi nanay jap’inqa.*
15 Edom llaqta umallikunan sinchita mancharikunqaku.
Moab llaqtapi kamachiqkunan khatatatanqaku.+
Canaán runakunan pisi kallpayanqaku.+
16 Manchakuymi khatatataymi paykunaman chayamunqa.+
Makiykiq atiyninta rikuspan qaqa jina mana kuyurinqakuchu.
Llaqtaykiq pasanankaman,+ Jehová Diosnilláy, chhayna kanqaku,qanpa jatarichisqayki llaqtaq pasanankaman chhayna kanqaku.+
17 Qanmi llaqtaykita pusamunki, qanpa orqoykimanmi paykunata churanki.+
Diosníy Jehová, tiyanaykipaq preparasqaykimanmi paykunata churanki.
Jehová Diosníy, makiykiq ruwasqan ch’uya cheqasmanmi paykunata churanki.
18 Jehová Diosqa wiñay-wiñaypaqmi rey kanqa.+
19 Faraonpa carretankuna, caballopi soldadonkuna iman lamar-qochaman jaykurqan,+Jehová Diostaq unukunata kaqta kutiykachirqan, jinaspa paykunata millp’uchirqan.+
Israel runakunan ichaqa unuq chaupinta ch’aki pampanta purirqanku”,+ nispa.
20 Aaronpa panan profetisa Miriamtaq panderetata jap’irqan, chayta tocaspan payqa tususpa lloqsimurqan. Paypa qhepantan llapa warmikunapas panderetantinkama tususpa lloqsimurqanku.
21 Miriamqa takispan qharikunaq takisqanman kutichiq:
“Jehová Diosman takiychis, atipasqanwanmi ancha jatunchasqa kashan.+
Caballokunatan soldadokunantinta lamar-qochaman wijch’uykun”,+ nispa.
22 Chaykuna qhepatan Moisesqa Puka lamar-qochamanta llapa Israel runakunata Shur nisqa ch’in ladoman pusarqan. Chaypin kinsa p’unchay purirqanku unuta mana tarispa.
23 Chayllamanmi Mará*+ nisqaman chayarqanku, chaypi karqanña unu chaypas, manan tomayta atirqankuchu chay unu p’osqo kasqanrayku. Chaymi chayneqtaqa Mará nispa suticharqanku.
24 Chaypin Israel runakunaqa Moisés contra rimayta qallarirqanku:+ “¿Imatan kunan ujasun?”, nispa.
25 Jinan Moisesqa Jehová Diospa yanapayninta mañakurqan.+ Jehová Diostaq juj sach’aman pusarqan. Chaytan Moisesqa chay p’osqo unuman wijch’uykurqan, jinan chay unuqa misk’i unuman tukupurqan.
Chaypin Diosqa paykunata pruebaman churarqan+ kasukuqchus kanqaku icha manachus chayta yachananpaq. Chaypi imachus pasasqanqa kamachikuy jinan paykunapaq karqan chayman jina kausanankupaq.
26 Diosmi nirqan: “Tukuy yuyaywanchus noqa Jehová Diospa simiyta kamachisqaykunatapas kasukunkichis, sonqoypaq jinataqchus imatapas ruwankichis chayqa,+ manan Egipto runakunaman chayachisqay ima onqoytapas chayachimusaykichischu.+ Noqa Jehová Diosniykichisqa qankunatan allinyachishaykichis”,+ nispa.
27 Chaymantataq Israel runakunaqa Elinman chayarqanku. Chaypin karqan chunka iskayniyoq pujyukuna, qanchis chunka palmera sach’akunapiwan. Chaypin paykunaqa unuq ladonpi karpakurqanku.
Uraypi willakuykuna
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
^ Egipto reykunatan “faraón” nispa niqku.
^ Plomotaqa “titi” nillankutaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Khatatataytaqa “kharkatiy” nillankutaqmi.
^ Hebreo rimaypi “onqokuy nanay jap’inqa” ninmi.
^ Mará sutiqa “jaya” otaq “p’osqo” ninantan nin.
