Isaías 44:1-28
44 ”Kunanqa kamachiy Jacob, uyariway,ajllakusqay Israel,+ ninriykita kichariy.
2 Kamaqniyki, ruwaqniyki+ Jehová Diosmi,nacesqaykimantapacha yanapaqniyki Diosmi niyki:
Kamachiy Jacob, ama manchakuychu,+ajllakusqay Jesurún,* ama khatatataychu.*+
3 Ch’akisqa jallp’amanmi unuta jich’aykamusaq,+ch’aki pampakunapin unuta purichisaq.
Mirayniyki runakunamanmi espirituyta* jich’aykamusaq,+qanmanta jamuq runakunamanmi bendicionta churamusaq.
4 Plantakuna jinan sumaqta wiñarinqa,+unuq purisqanpi álamo sach’akuna jinan munayta wiñanqa.
5 Jujninmi ninqa: Noqaqa Jehová Diospan kani,+ nispa.
Juj kaqtaq Jacob sutiwan sutichakunqa,juj kaqtaq makinpi qelqakunqa: Jehová Diospa kaqnin, nispa.
Israel sutitan payqa apanqa, nispa.
6 Israelpa reynin+ Jehová Diosmi,Israelta rantiq+ ejercitokunata kamachiq Jehová Diosmi nin:
Noqan ñaupaq kaqpas qhepa kaqpas kani.+
Manan noqamantaqa juj Diosqa kanchu.+
7 ¿Pin noqa jina kanman?+
¡Kan chayqa rimarichun, niwachun, rikuchiwachun!+
¿Kanchu pipas llaqtata paqarichisqaymantapacha kausaq?
¿Pin willanman imachus pasananña kashan chayta?
¿Pin ninman imachus qhepakunaman pasanqa chayta?
8 Ama mancharikuychischu, ama khatatataychischu.+
¿Manachu sapankaykichisman willarqaykichis?
¿Manachu ñaupaqmantaña willarqaykichis?
Qankunan testigoykunaqa kankichis.+
¿Kanmanchu noqamanta juj Dios?
Manan, manan noqa jina pakaqniyki qaqaqa kanchu,+yachasqayman jinaqa manan pipas kanchu, nispa”.
9 Thupasqa idolokunata ruwaqkunaqa llapankun yanqa kanku,ancha respetasqanku idolokunapas manan imapaqpas servinkuchu.+
Chay idolokunaqa manan testigayta atinkumanchu, manan imatapas rikunkuchu, manan imatapas yachankuchu,+chaykuna ruwaqkunaqa p’enqaypin tarikunqaku.+
10 Mana yuyayniyoq runallan idolotaqa ruwanman,¿imapaqmi servinman chay metal idolokuna?+
11 ¡Paykunawan puriqkunaqa* llapankun p’enqaypi tarikunqaku!+
Idolokunata ruwaqkunaqa runallan kanku.
Llapanku juñukamuchunku jinaspa maypichus kanankupi sayachunku.
Chaypin llapanku mancharichisqa kanqaku, p’enqaypin tarikunqaku.
12 Fierro takaqqa sansapin fierrota parichin,*martillowan takaspan juj idolota paqarichin,makinwanmi kallpanwanmi chayta rijurichin.+
Mijunata mana mijuspan, unuta mana tomaspan chayta ruwan,kallpan pisiyanankaman chayta takan.
13 K’ullupi llank’aqqa medina waskhatan chutarin, chaytataq puka tizawan marcan;reglawan marcaspan juj dibujota ruwan, chaytataq cincelwan thupan.
Runaq rijch’aynintan ruwan,+munay rijch’aymanmi tukuchin juj wasiman* churananpaq.+
14 Cedro sach’awan llank’aqqa juj sach’atan ajllan, roble sach’atan ajllan;allinta wiñanankaman qhawashallan,sach’akuna ukhupi allinta poqonankaman rikushallan.+
Chaymantapas laurel sach’atan plantan, chaytataq para wiñachin.
15 Sach’aq k’aspinwanmi runaqa ninata jap’ichin,wakin k’aspiwanmi ninata raurachin q’oñikunanpaq,wakinwantaq hornota parichin t’antata ruwananpaq.
Juj partenwantaq diosta ruwakun, chaytan yupaychan,juj k’ulluta llaqllaspan idolota ruwakun, chaymanmi qonqorikun.+
16 Kuskan k’ulluwanmi ninata raurachin,chaypin aychata kankan, sajsanankaman chayta mijun.
Chay ninapi q’oñikuspataq nin:
“May allinmá nina qayllapi kayqa, kusatan q’oñishawan”, nispa.
17 Wakinwantaq juj diosta ruwakun,chayman k’umuykuspataq yupaychan,mañakuspataq nin:
“Qanmi diosniyqa kanki, salvaway”,+ nispa.
18 Chaykunata ruwaqkunaqa manan imatapas yachankuchu, manan imatapas reparankuchu,+paykunaq ñawinqa tapasqan kashan, manan rikunkuchu,sonqonkupas manan imatapas reparanchu.
19 Manan mayqenninkupas reparakunchu,manan pipas cuentata qokunchu,manan jujpas yuyayman kutispa ninchu:
“Kuskanwanmi ninata raurachini,chay sansawanmi aychatapas t’antatapas chayachini.
¿Imaynapitaq wakinwanri kay idolota ruwayman?+
¿Imaynapitaq kay sach’amanta ruwasqa k’ullutari yupaychayman?”, nispa.
20 Payqa usphatapas mijushanman jinan.
Sonqonwanmi mana allinman apachikapun.
Payqa manan salvakuyta atinchu, manataqmi:
“¿Manachu noqaqa yanqa k’ulluta jap’ishani?”, ninchu.
21 Diosmi nin: “Jacob, aman chaykunata qonqankichu,Israel, qanqa noqaq kamachiymi kanki.
Noqan qantaqa ruwarqayki, kamachiymi kanki.+
Israel, manan jayk’aqpas qonqasaykichu.+
22 Juchaykikunatan yana phuyu jina pakasaq,+pantasqaykikunatan pacha phuyu jina p’ampasaq.
Noqaman kutimuway, noqan rantikapusayki.+
23 ¡Cielokuna, kusikuymanta qapariychis,Jehová Diosmi imachus ruwananta ruwan!
¡Jallp’a ukhukuna, kusikuymanta qapariychis!
¡Qankunapas orqokuna, sach’a-sach’akuna kusikuymanta qapariychis!+
Jehová Diosmi jujmanta rantikapun Jacobta,Israelwanmi rikuchin jatun atiyniyoq kasqanta”,+ nispa.
24 Rantiqniyki Jehová Diosmi,+mamaykiq wijsanpi ruwaqniyki Diosmi nin:
“Noqan Jehová Diosqa kani, noqaq kamasqaymi tukuy imapas.
Noqa sapallaymi cielotaqa mast’arirqani,+noqan kay pachatapas aysarirqani.+
¿Pin chay ratu noqawan kasharqan?
25 Noqan falso profetakunaq rimasqanta qolluchini,noqan watuqkunata mana yuyayniyoqta jina purichini,+noqan yachayniyoqkunata pantachini,yachayninkutan mana valeqman tukuchini.+
26 Noqaqa kamachiykunaq siminta junt’aqmi kani,kachasqaykunaq rimasqanta junt’aqmi kani.+
Jerusalenmantan nini: Jujmantan runakuna chaypi tiyanqa,+ nispa.
Judapi llaqtakunamantan nini: Wajmantan perqasqa kanqa,+llapa thunisqa kaqkunatan jujmanta jatarichisaq,+ nispa.
27 Noqan unukunata nini: Ch’akipuychis,mayuykikunatan ch’akichisaq,+ nispa.
28 Ciromantan+ nini: Payqa ajllakusqay michiqmi,paymi imachus munasqayta junt’anqa,+ nispa.
Jerusalenmantan nini: Jujmantan perqasqa kanqa, nispa.
Templotataq nini: Cimentacionniykikunan churasqa kanqa,+ nispa”.
Uraypi willakuykuna
^ Jesurún sutiqa “ch’uya kausaq runa” ninantan nin. Chay sutiwanmi Israelqa jatunchasqa kaq.
^ Khatatataytaqa “kharkatiy” nillankutaqmi.
^ Chaypiqa yaqapaschá “Idolokunata ruwaqkunaqa” nillanmantaq.
^ Parichiytaqa “q’oñichiy, q’olachiy” nillankutaqmi.
^ Chaypiqa “idolokuna churana wasiman” nillanmantaqmi.
