Isaías 45:1-25
-
Ciro Babiloniaman jaykunanpaq ajllasqa kasqanmanta (1-8)
-
“¿T’uru llut’aqninta ninmanchu: ¿Imatan ruwashanki?, nispa?” (9-13)
-
Juj nacionkuna Israelta may respetowan qhawarinankumanta (14-17)
-
Diosqa confianapaq kasqanta kamasqakuna rikuchisqanmanta (18-25)
-
Kay pachaqa runaq tiyananpaqmi kamasqa karqan (18)
-
45 Noqa Jehová Diosmi Cirota ajllakuni,+paña makinmantan payta jap’ishani,+paypa ñaupanpin nacionkunata tukuchisaq,+paypa ñaupanpin reykunata k’umuchisaq,paypa ñaupanpin punkukunata kichasaq,manan mayqenpas wisq’asqachu kanqa, paytan noqa nini:
2 “Noqan ñaupaykita risaq,+moqokunatan pampaman tukuchisaq,cobre punkukunatan ñut’usaq,fierro trancanakunatan p’akisaq.+
3 Laqhayaq* ukhupi waqaychasqa qhapaq kaqkunatan qosayki,allin pakasqa qorikunatan qosayki,+chhaynapin noqa Jehová Dios kasqayta yachanki.
Noqaqa Israelpa Diosninmi kani, noqan qanta sutiykimanta wajamuyki.+
4 Kamachiy Jacobraykun, ajllakusqay Israelraykun,qanta sutiykimanta wajamuyki.
Manaña reqsiwankichu chaypas, noqan qanman jatun sutita qoyki.
5 Noqaqa Jehová Diosmi kani, manan jujqa kanchu.
Noqamantaqa manan ima Diospas kanchu.+
Manaña reqsiwankichu chaypas, noqan qanman kallpata qosayki.
6 Chhaynapin runakuna yachanqaku noqalla Dios kasqayta,inti lloqsimuy ladomanta inti jaykuy ladokamapas noqallapuni Dios kasqayta.+
Noqaqa Jehová Diosmi kani, manan jujqa kanchu.+
7 Noqan k’anchaytapas+ laqhayaqtapas ruwani,+noqan thaj kaytapas+ ñak’ariytapas apamuni.+
Noqa Jehová Diosmi llapa chaykunata ruwani.
8 Cielokuna parachimuchun,+phuyukuna justiciata jich’aykamuchun,jallp’akuna salvacionta wiñachichun,justiciatawan kuskata wiñachichun.+
Noqa Jehová Diosmi chaykunataqa kamarqani”, nispa.
9 ¡Ay imaraqmi kanqa ruwaqninwan discutiqmanta!*
Payqa t’urullan, pampapi t’urukunamanta jujnillanmi.
¿T’uru llut’aqninta ninmanchu: “¿Imatan ruwashanki?”,+ nispa?
¿Ima llank’asqaykipas ninmanchu: “Paypaqa manan makin kanchu”, nispa?
10 ¡Ay imaraqmi kanqa juj taytata “¿imatan kayta churiyarqanki?” niqmanta!
¡Imaraqmi kanqa juj mamata “¿imatan kayta wachakurqanki?” niqmanta!
11 Israelpa ch’uya Diosninmi,+ kamaqnin Jehová Diosmi nin:
“¿Tapupayawankichu imakunachus qhepaman jamunqa chaymanta?
¿Qanchu kamachiwanki imatachus wawaykunawan ruwasaq chayta?+
¿Qanchu niwanki imatachus kamasqaykunawan ruwasaq chayta?
12 Noqan jallp’a pachataqa kamarqani,+noqan chaypi kaq runatapas ruwarqani.+
Noqan cielotapas makiywan mast’arirqani,+chaypi kaqkunataqa* noqan llapankuta kamachini”,+ nispa.
13 “Chanin kayniypin juj runata rijurichimuni,+ñanninkunatan rectoyachisaq.
Paymi llaqtayta perqanqa,+paymi llaqtaymanta apasqa runakunata kacharichimunqa,+mana imata pagaspan libramunqa”+ ninmi ejercitokunata kamachiq Jehová Dios.
14 Jehová Diosmi nin:
“Egipto nacionpa pagonkuna* Etiopía suyuq qhatunkunan* qanman jamunqa,Sebá runakunaq qhatunkunapas jatunkaray runakunapas qanpan kapunqa.
Paykunaqa qanpa qhepaykitan cadenawan watasqa purinqaku.
Qanman jamuspan ñaupaykipi qonqorikunqaku.+
May respetowanmi nisunkiku: Qanwanpunin Diosqa kashan,+manan jujqa kanmanchu, manapunin juj Diosqa kanmanchu, nispa”.
15 Qespichiq Dios,+ Israelpa Diosnin,qanqa manan llapa ruwanaykikunatachu willanki.
16 Llapankun p’enqachisqa k’umuchisqa kanqaku,idolokunata ruwaqkunaqa sarunchasqan ripunqaku.+
17 Israelmi ichaqa librasqa kanqa, Jehová Diosmi wiñaypaq libranqa.+
Qankunaqa manan jayk’aqpas p’enqachisqachu, pisichasqachu kankichis.+
18 Cielota kamaq Jehová Diosmi,+ cheqaq Diosmi,kay pachata kamaqmi, kay pachata allinta tajyachiqmi,+mana yanqa kananpaq kamaqmi,runakuna chaypi tiyananpaq ruwaqmi+ nin:
“Noqaqa Jehová Diosmi kani, manan jujqa kanchu.
19 Manan pakapichu rimarqani,+ manan tutayaq jallp’apichu rimarqani,manan Jacobmanta jamuq runakunataqa nirqanichu:
Maskhawaychis ichaqa yanqan kanqa, nispaqa.
Noqaqa Jehová Diosmi kani, cheqaqtan imatapas rimani, chanintapunin imatapas willani.+
20 Juñukuychis jinaspa jamuychis,nacionkunamanta ayqekamuqkuna llapaykichis jamuychis.+
Thupasqa idolokunata apakachaqkunaqa manan imatapas yachankuchu,chay yanqa dioskunamanta mañakuqkunaqa manan imatapas entiendenkuchu.+
21 Willakuychis, quejaykichista apamuychis.
Llapaykichis juj yuyaylla tapukuychis.
¿Pin imachus kananta unaymantaña willarqan?
¿Pin chaykunata ñaupaqmantapacha willarqan?
¿Manachu chaykunataqa noqa Jehová willarqani?
Noqamantaqa manan juj Diosqa kanchu.
Noqaqa chanin Diosmi kani, libraq Diosmi kani,+manan pipas noqamanta jujqa kanchu.+
22 Noqaman jamuychis jinan salvasqa kankichis,+kay pachapi llapa kaqkuna noqaman jamuychis,noqallan Diosqa kani, manan noqamanta jujqa kanchu.+
23 Sutiyraykun jurani,simiymanta lloqsimuq simikunaqa cheqaqmi,ima rimasqaypas junt’akunqapunin.+
Llapa runakunan noqaman qonqorikamunqaku,llapa runakunan noqata serviwanankupaq juranqaku.+
24 Paykunan ninqaku: Jehová Diosllawanmi kan cheqaq justiciapas atiypas.
Pipas paywan phiñakuqqa p’enqasqan payman qayllaykunqa.
25 Llapa Israelpa mirayninkunan yachanqaku may allinchus Jehová Diosta yupaychay chayta.+
Paymantan may kusisqa rimanqaku, nispa”.
Uraypi willakuykuna
^ Laqhayaqtaqa “tutayaq” nillankutaqmi.
^ Discutiytaqa “ch’aqway” nillankutaqmi.
^ Chaypiqa “ejercitokunataqa” nillanmantaqmi. Chaywanqa intimanta, killamanta, ch’askakunamanta iman rimashan.
^ Chaypiqa yaqapaschá “llank’aqninkuna” nillanmantaq.
^ Chaypiqa yaqapaschá “qhatuqninkunan” nillanmantaq.
