Isaías 5:1-30
5 Ancha munasqaypaqmi takipusaq,munakusqaymanta uvas chajranmantawanmi takisaq.+
Munakusqaypan allin ruruq jallp’a qhatapi uvas chajran karqan.
2 Pampata t’oqospan rumikunata pallarqan.
Allin kaq puka uvastan plantarqan,chajra chaupipitaq juj torreta sayarichirqan,chaypin uvas sarunatapas ruwarqan.+
Payqa sumaq uvas rurunantan suyakusharqan,ichaqa mana valeq uvastan chay chajraqa qorqan.+
3 Jinan payqa nirqan:
“Jerusalén llaqta runakuna, Judá ayllu runakuna,noqatawan uvas chajraytawan juzgawaychis.+
4 ¿Imatawantaq uvas chajraypaqri ruwanay karqan?
¿Manachu llapantaña ima ruwanaytapas ruwarqani?+
Noqaqa sumaq uvastan suyakusharqani,¿imanaqtintaq mana allin uvastari rurun?
5 Kunanmi willasaykichis imatachus uvas chajraywan ruwasaq chayta:
Llapa cercontan thunisaq, jinaspa kanaykusaq.+
Rumi cerconkunatan thunisaq, jinan sarunchasqa kapunqa.
6 Llapantan purunyachipusaq,+manan pipas uvastaqa kuchupanqachu nitaq qoriyanqachu.
Kiskakunan qorakunan chaypiqa wiñanqa,+phuyukunatan kamachisaq ama chayman paramunanpaq.+
7 Israel runakunan ejercitokunata kamachiq Jehová Diospa uvas chajran,+Judá ayllu runakunataq munakusqan planta.
Payqa chanin kaytan suyakusharqan,+ichaqa mana chanin ruwayllan sayarirqan;allin ruway kanantan suyakusharqan,ichaqa runakunaq khuyay waqasqallanmi uyarikurqan”,+ nispa.
8 ¡Ay imaraqmi kanqa askha wasikuna jap’ikapuqkunamanta!+
¡Imaraqmi kanqa askha jallp’akuna dueñochakuqkunamanta,+llapa campokuna jap’ikapuqkunamantapas!
Qankunallapas dueño kawaqchis jinan tiyashankichis.
9 Uyarishaqtiymi ejercitokunata kamachiq Jehová Diosqa jurarqan:
“Wasikuna munayña jatunña kanku chaypas,llapallanmi manchay thunisqa kapunqa,mana piqpa tiyasqanmi kapunqa.+
10 Chunka masa toroq llank’asqan uvas chajramantanjuj bato* vinolla lloqsinqa,juj homer* trigo mujun juj efá* trigollata qonqa”,+ nispa.
11 ¡Ay imaraqmi kanqa alcoholta ujanankupaq tutallamanta jatariqkunamanta!+
¡Imaraqmi kanqa vinota tutakama ujaqkunamanta!
12 Paykunaq jatun mijuyninkupiqa kanpunin vinopas, arpakunapas,cuerdayoq tocanakunapas, tamborkunapas, flautakunapas.*
Paykunaqa manan piensankuchu Jehová Diospa ruwasqankunapi,manan rikunkuchu makinpa ruwasqankunatapas.
13 Llaqtayqa preso apasqan kanqa,mana yuyayniyoq kasqanmantan apasqa kanqa;+respetasqa runakunapas yarqaymantan kanqa,+llapa runakunan ch’akiymanta kanqa.
14 Sepulturaqa* ancha jatunmi kashan,siminpas may jatunmi kicharayashan,+Jerusalenpi umallikunapas, ch’aqwa ruwaqkunapas chaymanmi jaykunqaku,fiesta ruwaqkunapas llapallankun chayman uraykunqaku.
15 Runakunaqa k’umuchisqan kanqaku,runakunaqa pisichasqan kanqaku,jatunchakuqkunapas k’umuchisqan kanqaku.
16 Justiciata ruwasqanraykun ejercitokunata kamachiq Jehová Diosqa jatunchasqa kanqa.
Chanin kaqta ruwaspan+ cheqaq Diosqa, ch’uya Diosqa+ ch’uya kasqanta rikuchinqa.
17 Ovejakunapas pastonkupipas kashankuman jinan mijunqaku,waj llaqtayoq runakunapas uywakunaq mijusqan ch’usaq pampakunapin mijunqaku.
18 ¡Ay imaraqmi kanqa llullakunamanta!
Paykunaqa waskhawan jinan juchata aysamushanku,carreta aysanawan jinan mana allin kaqta chutamushanku.
19 ¡Imaraqmi kanqa “usqhaylla imachus ruwananta ruwachun,usqhaylla jamuchun, chhaynapi rikunanchispaq;usqhaylla imachus yuyaykusqanta junt’achun,chhaynapi Israelpa ch’uya Diosninta reqsinanchispaq”+ niqkunamanta!
20 ¡Ay imaraqmi kanqa allin kaqta “manan allinchu” niqkunamanta, mana allin kaqtataq “allinmi” niqkunamanta,+tutayaqta k’anchay niqkunamanta, k’anchaytataq tutayaq niqkunamanta,p’osqota misk’i niqkunamanta, misk’itataq p’osqo niqkunamanta!
21 ¡Ay imaraqmi kanqa yachaysapaman tukuqkunamanta,allin yuyayniyoqpaq piensakuqkunamanta!+
22 ¡Ay imaraqmi kanqa vino ujaypaq kusa kaqkunamanta,imaraqmi kanqa trago tupachiypi kusa kaqkunamanta!+
23 ¡Imaraqmi kanqa millay runakunata qolqerayku “chaninmi” niqkunamanta,+chanin runakunapaq justiciata mana ruwapuqkunamanta!+
24 Imaynan ch’aki ichhuqa ninaq qallunwan chinkaripun,imaynan ch’aki pastoqa ninawan tukurikapun,chhaynatan paykunapas saphinkumantapacha chinkaripunqaku,t’ikankupas ñut’u jallp’a jinan wisñirikunqa;paykunaqa ejercitokunata kamachiq Jehová Diospa kamachikuynintan mana kasukurqankuchu,Israelpa ch’uya Diosninpa simintan mana respetarqankuchu.+
25 Chaymi Jehová Diosqa llaqtanpaq sinchi phiñasqa kashan,paymi makinta jaywarimuspa paykunata castiganqa.+
Orqokunan kuyurinqa,runakunaq ayanmi q’opa jina callekunapi wijch’urayanqa.+
Diospa phiñakuyninqa manan tiyaykunchu,makintaqa oqarishallanmi waqtananpaq.
26 Juj señaltan* sayachin karumanta nacionkuna jamunanpaq,+paymi silban lliu llaqtamanta runakuna jamunanpaq;+¡qhawariychis, paykunaqa phawayllan jamushanku!+
27 Paykunamantaqa manan mayqennillankupas sayk’usqaqa kankuchu, manataqmi wijch’ukunkupaschu.
Manan puñuypas aysanchu, rijch’asqallan kashanku,chumpinkupas manan paskakunchu,usut’ankuq watunpas manan p’itikunchu.*
28 Flechankupas filochasqan kashan,flechananku arcopas liston flechanankupaq kashan.
Caballonkuq phapatunpas rumi jinan ch’ilallaña kashan,carretakunaq llantanpas manchay wayra jinaraqmi phawan.+
29 Qaparisqankuqa leonkunaq qaparisqan jinaraqmi,malta leonkunaq qaparisqan jinaraqmi.+
Qaparisparaqmi mijunankutapas jap’inku,jap’isqantaqa manan pipas qechuyta atinqachu.
30 Chay p’unchaymi paykunaqa jap’ispanku lamar-qocha jinaraq qaparinqaku.+
Chay llaqtata rikuqkunaqa manchakunapaq tutayaqtan rikunqaku,phuyuq kasqanraykun k’anchaypas laqhayaq* kapunqa.+
Uraypi willakuykuna
^ Juj bato medidamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Juj homer tupunamanqa iskay pachaj iskay chunka litron jaykuq. Qhaway “Astawan yachanapaq B14” nisqata.
^ Efá tupunamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Flautaqa qenaman rijch’akuqmi.
^ Chaypiqa “k’aspitan señalpaq” nillanmantaqmi.
^ P’itiytaqa “t’ipiy” nillankutaqmi.
^ Laqhayaqtaqa “tutayaq” nillankutaqmi.
