Hebreos 1:1-14
1 Ñaupa tiempopin Diosqa askha kutipi ñaupa taytanchiskunata profetakunawan rimapayarqan, chaytan ruwarqan chay profetakunawan imaymana formapi rimaspa.+
2 Kay tukukuy p’unchaykunapin ichaqa Churinwan rimapayashawanchis,+ paywanmi tukuy imatapas* ruwarqan,+ paytataqmi churan tukuy ima herenciata chaskiq kananpaqpas.+
3 Paymi allinta Diospa lliflli kaynintaqa rikuchin,+ Diospa rijch’aynin kikillantaqmi kanpas.+ Paymi atiyniyoq siminwan tukuy imatapas jap’in, juchanchiskunamanta ch’uyanchawaspanchistaq+ janaq pachapi jatun Diospa paña ladonpi tiyaykurqan.+
4 Chhaynapin payqa angelkunamantapas aswan jatun kapun,+ paykunaq sutinkumanta aswan jatun sutitan chaskinpas.+
5 ¿Mayqen angeltataq Dios nirqan: “Qanqa churiymi kanki, kunanmantan taytayki kapuni”, nispa?+ ¿Mayqenmantan nillarqantaq: “Noqan taytan kasaq, paytaqmi waway kapunqa”, nispa?+
6 Pay kikinmi phiwi* wawanta+ kay pachaman kutichimunan tiempomanta rimaspa nirqan: “Diospa llapa angelninkuna payman k’umuykuchunku”, nispa.
7 Angelninkunamantataq nin: “Angelninkunatan atiyniyoqman tukuchin, kamachinkunatan+ nina raurayman tukuchin”,+ nispa.
8 Churinmantan ichaqa nin: “Diosmi wiñay-wiñaypaq tiyanayki trono kanqa,+ gobiernanayki varaqa chaninta ruwaq varan kanqa.
9 Qanqa chanin kaqtan munakurqanki, mana allin kaqtataq* cheqnikurqanki. Chaymi Diosqa qanta ajllarqasunki,+ kusikuy aceitewan jawispan ajllarqasunki. Diosniykiqa compañeroykikunamanta mastan kusikuy aceitewan jawirqasunki”,+ nispa.
10 Chaymantapas ninmi: “Qanmi, Señor, qallariypi kay pachaq cimentacionninta churarqanki, llapa cielokunapas qanpa makiykiq ruwasqanmi.
11 Chaykunaña chinkapunman chaypas qanqa manan chinkankichu. Chaykunaqa p’acha jinan thantakapunqa,
12 capata jinataqmi k’uyupunkipas, arí, p’achata jinan chaykunataqa k’uyupunki, cambiasqataqmi kanqakupas; qanmi ichaqa kaqllapuni kanki, kausasqayki watakunapas mana tukukuqmi kanqa”,+ nispa.
13 ¿Jayk’aqllapas mayqen angeltapas pay nirqanchu: “Paña ladoypi tiyaykuy, enemigoykikunata chaki sarunaykiman churanaykama”, nispa?+
14 Angelkunaqa, ¿manachu llapanku Diosta serviq espiritukuna kanku?+ ¿Manachu paykunata Diosqa kamachin pikunachus salvasqa kanqaku chay runakunata yanapanankupaq?
Uraypi willakuykuna
^ Chaypiqa “tukuy ima tiempotapas” nillanmantaqmi. Qhaway Explicasqa simikuna nisqapi “Tiempo, pacha” nisqata.
^ Griego rimaypiqa “kamachikuy sarunchaytataq” ninmi.
