Juan 18:1-40
-
Jesusta Judaspa jap’ichisqanmanta (1-9)
-
Espadata Pedroq orqosqanmanta (10, 11)
-
Jesús Anasman apasqa kasqanmanta (12-14)
-
Jesusta Pedroq ñaupaq kuti negasqanmanta (15-18)
-
Anaspa ñaupanpi Jesuspa kasqanmanta (19-24)
-
Jesusta Pedroq iskay kutitawan negasqanmanta (25-27)
-
Jesusta Pilatoq tapusqanmanta (28-40)
-
“Gobiernoyqa manan kay pachamantachu” (36)
-
18 Chaykunata nisqan qhepamanmi Jesusqa discipulonkunapiwan Cedrón wayq’ota+ chimpaspa juj huertaman jaykurqan.+
2 Chay huertapin Jesusqa juñukullaqpuni discipulonkunawan, chaymi jap’ichiqnin Judaspas rikurqan chay huertataqa.
3 Chaymi payqa askha soldadokunata, umalli sacerdotekunaq fariseokunaq guardiankunatawan pusarikuspa chayman rirqan, paykunaqa k’anchaykunantin, mecherokunantin,* armakunantin iman rirqanku.+
4 Jesusqa tukuy imachus paywan pasananta yachaspan, juj chhikan ñaupaqman jamuspa paykunata tapurqan: “¿Pitan maskhashankichis?”, nispa.
5 Jinan paykunaqa nirqanku: “Nazaret llaqtayoq+ Jesustan”, nispa. Jesustaq paykunata nirqan: “Noqan kani”, nispa. Jap’ichiqnin Judaspas paykunawanmi kasharqan.+
6 “Noqan kani” nispa Jesús niqtinmi paykunaqa qhepanpamanta kutirispa pampaman kumpakurqanku.+
7 Jinan Jesusqa wajmanta paykunata tapullarqantaq: “¿Pitan maskhashankichis?”, nispa. Paykunataq nirqanku: “Nazaret llaqtayoq Jesustan”, nispa.
8 Jinan Jesusqa nillarqantaq: “Noqan kani, niykichisñatáq, chhaynaqa noqatataq maskhashawankichis chayqa, jinalla kay runakunaqa ripuchunku”, nispa.
9 Chayqa karqan “qowasqaykikunamantaqa manan ni jujtapas chinkachinichu” nispa nisqan junt’akunanpaqmi.+
10 Jinan Simón Pedroqa espadanta orqokuspa uma sacerdoteq kamachinta waqtaspa paña ninrinta qhorurqan.+ Chay kamachiq sutinmi karqan Malco.
11 Jesusmi ichaqa Pedrota nirqan: “Chay espadata waqaychay churananman.+ Taytaypa qowasqan copataqa,* ¿manachu ujanay?”,+ nispa.
12 Chaymantataq soldadokunawan, ejercitopi comandantewan,* judiokunaq guardiankunapiwan Jesusta jap’ispa watarqanku.
13 Jinaspa Caifaspa+ suegron Anasmanraq ñaupaqta aparqanku, Caifasmi chay tiempopiqa uma sacerdote kasharqan.+
14 Paymi judiokunataqa nirqan: “Qankunaq allinniykichispaqmi kanqa juj runalla llaqtarayku wañunqa chayqa”,+ nispa.
15 Simón Pedrowan juj kaq discipulowantaq Jesusta qatiparqanku.+ Chay juj kaq discipuloqa uma sacerdoteq reqsisqanmi karqan, chaymi Jesuswan kuska uma sacerdoteq wasi pationman jaykurqan,
16 Pedron ichaqa punku jawallapi qhepakurqan. Chaymi uma sacerdoteq reqsisqan discipuloqa punku qhawaq kamachi warmiwan rimaq lloqsirqan, jinaspa Pedrota ukhuman pusaykamurqan.
17 Chay kamachi warmitaq Pedrota nirqan: “¿Manachu qanpas chay runaq discipulon kashanki?”, nispa. Jinan Pedroqa nirqan: “Manan”,+ nispa.
18 Chay wasi patiopin sayasharqanku kamachikunawan guardiakunapiwan, chirisqanraykun paykunaqa ninata jap’ichispa chaypi q’oñikusharqanku. Pedropas paykunawanmi sayasharqan ninapi q’oñikuspa.
19 Chaykaman umalli sacerdoteqa* Jesusta tapurqan discipulonkunamanta yachachikuyninkunamantawan.
20 Jesustaq nirqan: “Noqaqa lliu runakunaq ñaupanpin rimaq kani, sinagogapi templopi iman yachachiqpas kani,+ chaypiqa juñukullankupunimá riki judiokunaqa; noqaqa manan imatapas pakapichu rimarqani.
21 ¿Imaraykutaq noqatari tapuwanki? Rimasqayta uyariqkunatayá tapuy, paykunaqa yachankun imamantachus rimarqani chaytaqa”, nispa.
22 Chaykunata niqtinmi chay qayllapi sayashaq jujnin guardiaqa Jesusta ch’aqlaspa+ nirqan: “¿Chhaynatachu ninayki umalli sacerdoteta?”, nispa.
23 Jinan Jesusqa payta nirqan: “Mana allinta rimashani chayqa, niwayyá ima mana allintachus rimashani chayta; allintachus rimashani chayqa, ¿imaraykutaq ch’aqlashawankiri?”, nispa.
24 Chaymantataq Anasqa watasqallata uma sacerdote Caifasman+ apachirqan.
25 Simón Pedro chaypi sayaykuspa q’oñikushaqtinmi runakunaqa nirqanku: “¿Manachu qanpas chay runaq discipulon kashanki?”, nispa. Jinan Pedroqa negarqan: “Manan”,+ nispa.
26 Uma sacerdoteq jujnin kamachinpas nillarqantaqmi: “Qanqa paywanmá huertapi kasharqanki riki”, nispa (chay kamachiq parientenpa ninrintan Pedroqa qhorurqan).+
27 Pedrotaq ichaqa wajmanta negakurqan; chayllamanmi galloqa waqarqan.+
28 Chaymantataq Jesustaqa tutallamanta Caifaspa wasinmanta kamachikuqpa wasinman aparqanku,+ chay apaq runakunaqa manan jaykurqankuchu kamachikuqpa wasinmanqa, Pascua Fiesta mijunata mijunankupaq mana qhellichakunankurayku.+
29 Jinan Pilatoqa lloqsimuspa chay apaqkunata tapurqan: “¿Imatataq kay runari ruwarqan, imataq juchanri?”, nispa.
30 Jinan paykunaqa nirqanku: “Manachus kay runa mana allin ruwaq kanman chayqa, manachá apamuykikumanchu karqan”, nispa.
31 Pilatotaq paykunata nirqan: “Qankunayá apakapuspa juzgamuychis kamachikuyniykichisman jina”,+ nispa. Judiokunataq nirqanku: “Noqaykuqa manan atiykumanchu pitapas wañuchiytaqa”,+ nispa.
32 Chayqa karqan imaynatachus wañunanmanta Jesuspa nisqan junt’akunanpaqmi.+
33 Chaymi Pilatoqa wasinman kutiykuspa Jesusta wajamurqan, jinaspa tapurqan: “¿Qanchu kanki judío runakunaq reynin?”,+ nispa.
34 Jinan Jesusqa payta nirqan: “¿Qanllamantachu chayta tapushawanki, icha jujkunachu noqamanta chayta willarqasunkiku?”, nispa.
35 Chaymi Pilatoqa payta nirqan: “¿Acaso noqari judiochu kashani? Llaqtamasiykikunawan umalli sacerdotekunapiwanmá riki qantaqa noqaman entregashawanku. ¿Imatataq ruwarqankiri?”, nispa.
36 Jinan Jesusqa payta nirqan:+ “Gobiernoyqa manan kay pachamantachu.+ Kay pachamantachus gobiernoy kanman chayqa, kamachiykunachá noqarayku maqanakunkuman karqan, chhaynapi judiokunaman mana entregasqa kanaypaq.+ Ichaqa nisqay jina, gobiernoyqa manan kaymantachu”, nispa.
37 Jinan Pilatoqa nirqan: “Chhaynaqa, ¿reychu kanki?”, nispa. Jesustaq payta nirqan: “Qan kikiykin ninkiña rey kasqaytaqa.+ Noqaqa cheqaq kaqmanta willanaypaqmi nacerqani, chaypaqtaqmi kay pachamanqa jamurqanipas.+ Pipas cheqaq kaqman jina kausaqqa uyarinmi simiyta”, nispa.
38 Pilatotaq nirqan: “¿Imataq cheqaq kaqri?”, nispa.
Chayta nispataq wajmanta lloqsimuspa judiokunata nirqan: “Manan paypiqa ima juchatapas tarinichu.+
39 Jinaspapas qankunaqa munankichispunin Pascua Fiestapi pillatapas kacharipunayta ¿riki?+ ¿Munawaqchischu judío runakunaq reynin kacharipunayta?”, nispa.
40 Jinan paykunaqa qaparirqanku: “¡Ama chay runataqa kachariychu! ¡Aswanpas Barrabasta kacharipuy!”, nispa. Barrabasqa suwan karqan.+
Uraypi willakuykuna
^ Chaypiqa “lamparakunantin” nillanmantaqmi.
^ Jesustan wañuchinanku karqan Diosta k’amiqmanta tumpaspa, Diostaq mana chayta jark’ananchu karqan, chaymantan rimashan “copa” nispaqa.
^ Comandantekunaqa waranqa soldadokunatan kamachiqku.
^ Chaypiqa Anasmantan rimashan.
