Lucas 13:1-35
-
Mana pesapakuqkuna wañuchisqa kanankumanta (1-5)
-
Mana ruruq higos sach’amanta (6-9)
-
Juj warmi samana p’unchaypi qhaliyachisqa kasqanmanta (10-17)
-
Mostaza mujumanta levaduramantawan (18-21)
-
K’illku punkunta jaykunapaq kallpachakunamanta (22-30)
-
Herodesta “atoq” nikusqanmanta (31-33)
-
Jerusalenmanta Jesuspa llakikusqanmanta (34, 35)
13 Chay kutipin wakin runakuna Jesusta nirqanku: “Pilaton Galilea ladomanta wakin runakunata wañuchirqan sacrificiota jaywashaqtinku”, nispa.
2 Jinan Jesusqa paykunata nirqan: “Qankunaqa, chay runakunaqa llapa Galilea runakunamantapas aswan juchasapachá karqanku, chaychá chhaynataqa wañurqanku, nispapaschá nishankichis.
3 Ichaqa manan chhaynachu, cheqaqtan niykichis: Manachus juchaykichismanta pesapakuspa Diosman kutirikunkichis chayqa, llapaykichismi qankunapas paykuna jina wañunkichis.+
4 Siloan torre urmaykamuspa chunka pusaqniyoq runakunata wañuchisqanmantapas, paykunaqa Jerusalenpi tiyaq llapa runakunamantapas aswan juchayoqchá karqanku, nispapaschá nishankichis.
5 Ichaqa manan chhaynachu, cheqaqtan niykichis: Manachus juchaykichismanta pesapakuspa Diosman kutirikunkichis chayqa, llapaykichismi qankunapas paykuna jina wañunkichis”, nispa.
6 Chaymantataq Jesusqa juj rijch’anachiyta* willarqan: “Juj runaq uvas chajranpin higos sach’a plantasqa karqan. Chay runan chay sach’amanta higosta pallaq rirqan, ichaqa manan ima rurutapas tarirqanchu.+
7 Chaymi uvas chajrapi llank’aqta nirqan: Ñan kinsa wataña jamushani kay sach’amanta higosta pallaq, ichaqa manan imatapas tarinichu, chayrayku wit’urapuy, yanqan jallp’ata usuchishan, nispa.
8 Paytaq nirqan: Patrón, jinalla juj watatawan kachun, wanucharusaqraq muyuriqninta jasp’iruspa,
9 sichus chaywan rurunqa chayqa, allinmi kanqa, mana ruruqtintaq wit’uchipunki”,+ nispa.
10 Juj kutinmi Jesusqa samana p’unchaypi* juj sinagogapi yachachisharqan.
11 Chaypin kasharqan chunka pusaqniyoq wataña millay espirituq onqochisqan warmi, payqa k’umusqallan puriq, manan imaynanmantapas rectota sayariyta atiqchu.
12 Jinan Jesusqa payta wajaspa nirqan: “Ususíy, onqoyniykimantan kacharichisqa kanki”,+ nispa.
13 Payman makinta churaykuqtintaq chay warmiqa kaq ratu rectota sayaripurqan, jinaspataq Diosta jatunchayta qallarirqan.
14 Sinagogapi umallitaq samana p’unchaypi Jesuspa qhaliyachisqanrayku runakunata sinchi phiñasqa nirqan: “Soqta p’unchaymi kan imapipas llank’anapaqqa,+ chhaynaqa chay p’unchaykunayá jamuychis qhaliyachisqa kanaykichispaqqa, amataq samana p’unchaychu”,+ nispa.
15 Jinan Señorqa payta nirqan: “Iskay uyakuna,+ ¿manachu qankunaqa sapankaykichis samana p’unchaypi toroykichistapas asnoykichistapas kacharinkichis unuta ujachinaykichispaq?+
16 ¿Chaychu kay warmiqa Abrahanpa ususin kashaspa, chunka pusaqniyoq wataña Satanaspa watasqan kashaspa samana p’unchaypi mana kacharichisqa kanman?”, nispa.
17 Chaykunata Jesús niqtinmi paypa contranpi kaqkunaqa llapanku p’enqarikapurqanku, llapa runakunataq ichaqa kusikurqanku Jesuspa ancha allinkuna ruwasqanmanta.+
18 Jesusqa nillarqantaqmi: “¿Ima jinan kanman Diospa gobiernon? ¿Imawanmi tupanachisaq?
19 Mostaza mujuwanmi, chaytan juj runa huertanpi tarpurqan, wiñaspanmi sach’a kapurqan, phalaq animalkunataq k’allmankunapi q’esachakurqanku”,+ nispa.
20 Wajmantan Jesusqa nillarqantaq: “¿Imawanmi tupanachisaq Diospa gobiernonta?
21 Levadurawanmi, chaytan juj warmi kinsa balde* jak’uman tupachin, jinan llapallan masaqa poqon”,+ nispa.
22 Jerusalenta rishaspan Jesusqa llaqtan-llaqtanta, ayllun-ayllunta yachachispa purirqan.
23 Chaypin juj runa nirqan: “Señor, ¿cheqachu pisi runakunalla salvasqa kanqa?”, nispa. Jinan payqa nirqan:
24 “Tukuy atisqaykichista kallpachakuychis k’illku* punkunta jaykunaykichispaq.+ Niykichismi: Askhan chayninta jaykuyta munanqaku, ichaqa manan atinqakuchu.
25 Wasiyoq runa jatarispa punkuta candadowan wisq’amuqtinqa jawapin qhepakapunkichis, jinan punkuta takankichis: ¡Señor, kichamuwayku!,+ nispa. Paytaq ichaqa nimusunkichis: Manan reqsiykichischu, pichá kakunkichispas, nispa.
26 Jinan qankunaqa ninkichis: Señor, ñaupaykipimá riki mijurqaykupas ujarqaykupas, jatun calleykupimá riki yachachirqankipas,+ nispa.
27 Paytaq nimusunkichis: Pichá kakunkichispas, ¡llapaykichis qayllaymanta ripuychis, mana chanin kaqta ruwaqkuna!, nispa.
28 Chaypin rikunkichis Abrahanta, Isaacta, Jacobta, llapa profetakunatawan Diospa gobiernonpi kashaqta, jinan qankunaqa waqankichis, mana imanakuyta atispataq kiruykichistaraq k’achachachinkichis jawapi wijch’usqa rikukusqaykichisrayku.+
29 Chaymantapas inti lloqsimuy ladomanta, inti jaykuy ladomanta, wichay ladomanta, uray ladomantawanmi runakuna jamunqaku, jinaspa Diospa gobiernonpi mesapi tiyaykunqaku.
30 Chhaynaqa, wakin qhepapi kaqkunan ñaupaqpi kanqaku, wakin ñaupaqpi kaqkunataq qhepapi kanqaku”,+ nispa.
31 Chay ratupin wakin fariseokuna payman jamuspa nirqanku: “Ripuy kaymanta, Herodesmi* wañuchiyta munashasunki”, nispa.
32 Jinan Jesusqa paykunata nirqan: “Rispaykichis chay atoqta nimuychis: Kunantawan paqarintawanmi supaykunata qarqosaq, onqosqakunatapas qhaliyachisaq, minchhatataq* ruwanayta tukusaq, nispa.
33 Chaywanpas kunan, paqarin, minchhatawanqa rishallasaqmi maymanchus rinaytaqa; profetaqa manan waj ladopichu wañunan, aswanpas Jerusalén llaqtapin.+
34 ¡Jerusalén, Jerusalén, qanmi kanki profetakunata wañuchiq, qanman kachamusqakunata rumiwan ch’aqeqpas!+ ¡Askha kutitan wawaykikunata juñuyta munarqani imaynan wallpapas chiuchinkunata rafran ukhupi oqllan jinata, qankunan ichaqa mana munarqankichischu!+
35 Chayraykun wasiykichis* wijch’usqa kanqa,+ qankunamanmi saqerparisqa kanqa. Niykichismi: Manañan rikuwankichischu, ¡sumaqpaq qhawarisqa kachun Jehová* Diospa sutinpi jamuqqa!,+ ninaykichiskama”, nispa.
Uraypi willakuykuna
^ Chaypiqa “ejemplota” otaq “tupanachiyta” nillanmantaqmi.
^ Qhaway Explicasqa simikuna nisqapi “Samana p’unchay” nisqata.
^ Griego rimaypiqa “kinsa sea” ninmi. Juj sea tupunamanqa qanchis litro masmi jaykuq (7,33 L). Qhaway “Astawan yachanapaq B14” nisqata.
^ K’illkutaqa “k’ijtu, k’ijllu” nillankutaqmi.
^ Chaypiqa Jatun Herodespa wawan Herodes Antipasmantan rimashan. Qhaway Explicasqa simikuna nisqapi “Herodes” nisqata.
^ Griego rimaypiqa “kinsa kaq p’unchaytataq” ninmi.
^ Chaypiqa templomantan rimashan.
^ Qhaway “Astawan yachanapaq A5” nisqata.
