Mateo 14:1-36
14 Chay tiempopin kamachiq Herodesman* willarqanku Jesuspa imakunachus ruwasqanta.+
2 Chaymi serviqninkunata nirqan: “Kayqa bautizaq Juanpunin kanman. Payqa wañusqanmantachá kausarichisqa karqan, chaychá imaymana milagrokunata* ruwashan”,+ nispa.
3 Herodesqa Juanta jap’ichispan watachisqa, jinaspa carcelman wisq’achisqa, chaytan ruwasqa wayqen Felipeq esposan Herodiaspa causanpi.+
4 Juanmi payta askha kutipi nisqa: “Manan allinchu chay warmiwan kasqaykiqa”,+ nispa.
5 Chaymi Herodesqa wañuchiyta munarqan, ichaqa manan atirqanchu runakunata manchakusqanrayku; llapa runan Juantaqa “profetan” niqku.+
6 Herodesmi nacesqan p’unchayta fiestakusharqan,+ chaypin Herodiaspa ususinqa tususqanwan Herodespa sonqonta mayta kusichirqan.+
7 Chaymi Herodesqa juramentota ruwaspa prometerqan tukuy ima mañakusqanta qonanpaq.
8 Jinan chay sipasqa mamanpa yachachisqan nirqan: “Kay platopi qoway bautizaq Juanpa umanta”,+ nispa.
9 Chaywanmi reyqa sinchita llakikurqan, ichaqa jurasqanrayku paywan kuska mijuq runakunarayku iman kamachikurqan Juanpa umanta chay sipasman qonankupaq.
10 Juj soldadotan carcelman kacharqan Juanpa umanta wit’umunanpaq.
11 Jinan platopi apamuspa Juanpa umanta chay sipasman qorqanku, paytaq mamanman aparqan.
12 Chaymantataq Juanpa discipulonkunaqa jamuspanku ayanta apapuspa p’ampamurqanku, jinaspa Jesusman willaq rirqanku.
13 Chayta uyarispan Jesusqa sapallan kananpaq ch’inneq ladoman botepi ripurqan, runakunataq chayta yacharuspanku muyuriqpi kaq llaqtakunamanta chakillapi qatikurqanku.+
14 Jesustaq botemanta uraykuspa ancha askha runakunata rikurqan, chaymi paykunata khuyapayarqan+ onqosqa kaqkunatapas qhaliyachirqan.+
15 Tardeña kaqtintaq discipulonkunaqa payman qayllaykuspa nirqanku: “Kayneqqa ch’inmi, tardeñataqmi kanpas, chayrayku kachapullayña kay runakunata, chhaynapi ayllukunaman rispa mijunata rantikunankupaq”,+ nispa.
16 Jinan Jesusqa paykunata nirqan: “Manan ripunankuraqchu, qankuna imallatapas mijuchiychis”, nispa.
17 Chaymi discipulonkunaqa nirqanku: “Manan imaykupas kanchu, pisqa t’antallaykun iskay challwallaykupiwan kashan”, nispa.
18 Jinan Jesusqa nirqan: “Kayman apamuwaychis”, nispa.
19 Chaymantataq llapa runakunata kamachirqan pasto pampapi tiyaykunankupaq; pisqa t’antata iskay challwatawan jap’ispataq cielota qhawarispa graciasta qorqan,+ t’antata phasmispataq discipulonkunaman jaywarqan, paykunataq llapa runakunaman rakirqanku.
20 Jinan llapanku sajsanankukama mijurqanku, chaymantataq puchuq t’anta phasmikunata chunka iskayniyoq canasta junt’ata juñurqanku.+
21 Mijuqkunaqa karqan pisqa waranqa jina qharikunan, kallarqantaqmi warmikunapas wawakunapas,+ ichaqa manan yupasqachu karqanku.
22 Chay qhepamantaq Jesusqa discipulonkunata boteman seqachirqanpacha, chhaynapi chimpaman ñaupashanankupaq, chaykamataq payqa runakunata kachapusharqan.+
23 Runakunata kachapuspataq orqoman sapallan wicharqan Diosmanta mañakuq.+ Tutayamunankaman payqa sapallan chaypi kasharqan.
24 Chay ratupaqqa botepas qocha patamanta sinchi karu* ukhupiñan kasharqan, sinchita wayramuqtintaq unuqa boteta nishuta aytikachasharqan.
25 Manaraq illarimushaqtinmi* Jesusqa discipulonkunaq kasqanman rirqan unu patanta purispa.
26 Unu patanta purishaqta rikuspataq discipulonkunaqa mancharikurqanku, jinaspa nirqanku: “¡Imataq jaqayri!”, nispa. Chaymantataq manchakuymanta qaparirqanku.
27 Jesustaq kaq ratu paykunata nirqan: “¡Kallpachakuychis! Ama manchakuychischu, noqan kani”,+ nispa.
28 Jinan Pedroqa nirqan: “Señor, qanpuni kanki chayqa, kamachiway unu patanta qanman jamunaypaq”, nispa.
29 Jesustaq “¡jamuy!” nirqan. Jinan Pedroqa botemanta uraykuspa unu patanta purirqan.
30 Ichaqa sinchi wayramusqanta rikuspan mancharikurqan, unuman chinkaykushaspataq qaparirqan: “¡Señor, aysariway!”, nispa.
31 Jesustaq kaq ratu makinta jaywarispa jap’irqan, jinaspa nirqan: “Pisi iñiyniyoq runa, ¿imanaqtinmi iskayarqanki?”,+ nispa.
32 Boteman seqaqtinkutaq wayraqa thaj kapurqan.
33 Jinaqtinmi botepi kaqkunaqa payman k’umuykuspa nirqanku: “Cheqaqtapunin qanqa Diospa Churin kanki”, nispa.
34 Qochata chimpaspankutaq Genesaret+ ladoman chayarqanku.
35 Runakunataq reqsiruspanku llapa muyuriqnintinman willachimurqanku, chaymi runakunaqa llapa onqosqakunata Jesusman pusamurqanku.
36 Jinaspa rogakurqanku jawa p’achanpa puntallantapas llamiykunankupaq,+ jinan llamiykuqkunaqa allintapuni qhaliyapurqanku.
Uraypi willakuykuna
^ Chaypiqa Jatun Herodespa wawan Herodes Antipasmantan rimashan. Qhaway Explicasqa simikuna nisqapi “Herodes” nisqata.
^ Chaypiqa “atiywan ruwaykunata” nillanmantaqmi.
^ Griego rimaypiqa “askha estadio karu” ninmi. Juj estadioqa 185 metron karqan. Qhaway “Astawan yachanapaq B14” nisqata.
^ Griego rimaypiqa “Tutapi tawa kaq vigilia kashaqtinmi” ninmi. Chayqa karqan las tresmanta inti lloqsimuykaman.
