Mateo 27:1-66
-
Jesusta Pilatoman entregasqankumanta (1, 2)
-
Judaspa seq’okusqanmanta (3-10)
-
Jesusta Pilatoq tapusqanmanta (11-26)
-
Jesusta asipayasqankumanta (27-31)
-
Gólgota nisqapi Jesusta k’aspiman clavasqankumanta (32-44)
-
Jesuspa wañupusqanmanta (45-56)
-
Jesusta sepulturaman churasqankumanta (57-61)
-
Sepulturapi qhawaqkunata churasqankumanta (62-66)
27 P’unchayamuqtintaq llaqtapi umalliqkuna* llapa umalli sacerdotekunapiwan juñunakuspa rimanakurqanku Jesusta wañuchinankupaq.+
2 Watasqata apaspataq kamachikuq Pilatoman entregarqanku.+
3 Jesuspa juchachasqa kasqanta yachaspan jap’ichiqnin Judasqa ñakapakurqan, jinan kinsa chunka qolqe chaskikusqanta umalliq runakunaman umalli sacerdotekunamanwan apapuspa+
4 nirqan: “Juchallikunin mana juchayoq runata qankunaman jap’ichispay”, nispa. Jinan paykunaqa nirqanku: “¿Imataq noqaykumanri qokuwanku? ¡Qanchá chaytaqa yachakunki!”, nispa.
5 Jinan Judasqa chay qolqeta templopi wijch’uspa chaymanta lloqsipurqan, ripuspataq seq’okurqan.+
6 Chay kinsa chunka qolqeta oqarispan umalli sacerdotekunaqa nirqanku: “Manan allinchu kanman templopi qolqe waqaychanaman churayqa, runa wañuchinapaq pagasqa qolqe* kasqanrayku”, nispa.
7 Jinan paykunapura rimanakuspa chay qolqewan jallp’ata* rantirqanku, waj llaqtayoq runakuna chaypi p’ampasqa kanankupaq.
8 Chayraykun chay jallp’aqa kunan p’unchaykama Yawar Pampa nispa sutichakun.+
9 Chhaynapin junt’akurqan profeta Jeremiaspa willasqan, paymi nirqan: “Paykunan oqarirqanku kinsa chunka qolqeta, chhayna qolqepaqmi Israelpi wakin runakuna chay runapaq preciota churarqanku,
10 chay qolqetan jallp’a rantinankupaq qorqanku, Jehová* Diospa kamachiwasqanman jina”,+ nispa.
11 Jesusqa Pilatoq ñaupanpin kasharqan, jinan Pilatoqa nirqan: “¿Qanchu kanki judío runakunaq reynin?”, nispa. Jesustaq nirqan: “Arí, qan kikiykin chaytaqa ninkiña”,+ nispa.
12 Umalliq runakunawan umalli sacerdotekunapiwan juchachaqtinkutaq Jesusqa mana imatapas rimarirqanchu.+
13 Chaymi Pilatoqa nirqan: “¿Manachu uyarinki contraykipi imaymana rimasqankuta?”, nispa.
14 Jesusmi ichaqa mana imanispapas nirqanchu, manan juj simillatapas rimarirqanchu, chaymi Pilatoqa anchata admirakurqan.
15 Sapa Pascua Fiestapin Pilatoqa juj presota kachariq, pitachus runakuna mañakuqku chayta.+
16 Chay tiempopin Barrabás sutiyoq allin reqsisqa runa preso kasharqan.
17 Jinan Pilatoqa chaypi juñunasqa kashaqkunata nirqan: “¿Mayqentan kacharipunayta munankichis? ¿Barrabastachu icha Cristo nisqaykichis Jesustachu?”, nispa.
18 Chaytaqa nirqan Jesusta envidiakuspa entregasqankuta reparaspan.
19 Juzgana tiyanapi Pilato tiyashaqtinmi esposan willachimurqan: “Aman imanankipaschu chay chanin runataqa, paymantan sinchi manchakuytaraq mosqokuni”, nispa.
20 Umalliq runakunataq umalli sacerdotekunapiwan runakunata kallpacharqanku: “¡Barrabasta kacharipuy,+ Jesustataq wañuchiy!”,+ nispa ninankupaq.
21 Jujmantan Pilatoqa paykunata tapurqan: “¿Mayqentan kacharipunayta munankichis?”, nispa. Runakunataq nirqanku: “¡Barrabasta!”, nispa.
22 Pilatotaq nirqan: “Chhaynaqa, ¿imatataq ruwasaq Cristo nisqaykichis Jesuswanri?”, nispa. Jinan llapanku nirqanku: “¡Paytaqa k’aspipi warkuy!”,+ nispa.
23 Jinan Pilatoqa nirqan: “¿Imarayku? ¿Ima mana allintataq ruwarqanri?”, nispa. Runakunan ichaqa astawanraq qaparirqanku: “¡Paytaqa k’aspipi warkuy!”,+ nispa.
24 Pilatotaq manaña imatapas ruwayta atispa, aswanpas astawanraq ch’aqway jatarisqanta rikuspa, lliu runakuna rikushaqtin makinta unuwan maqchikurqan, jinaspa nirqan: “Manan juchayoqchu kasaq kay runaq wañusqanmantaqa.* Qankunamantañachá chayqa kanqa”, nispa.
25 Chaymi llaqtantin runakuna nirqanku: “Chay runaq wañusqanqa noqaykumanta wawaykumanta imañan kanqa”,+ nispa.
26 Jinan Pilatoqa Barrabasta kacharipurqan, Jesustataq jasut’ichispa+ soldadokunaman entregarqan k’aspipi wañuchimunankupaq.+
27 Jinan Pilatoq soldadonkunaqa paypa wasinman Jesusta apaykurqanku, chaypin Jesuspa muyuriqninman llapa soldadokunata juñurqanku.+
28 Jinan p’achanta ch’utispa k’anchaq puka mantawan churarqanku.+
29 Kiskamanta coronata simp’aspataq chayta umanman churarqanku, paña makinmantaq carrizota* jap’iykachirqanku. Paypa ñaupanpi qonqorikuspataq asipayaspa nirqanku: “¡Kausachun judío runakunaq reynin!”, nispa.
30 Chaymantataq thoqaykurqanku,+ jap’isqan carrizowantaq umapikama p’anayta qallarirqanku.
31 Chhaynata asipayasqanku qhepamantaq mantata ch’utirqanku, jawa p’achanwan churaspataq k’aspiman clavanankupaq aparqanku.+
32 Lloqsishaspankun Cirenemanta Simón sutiyoq runawan tuparqanku. Paytan kamachirqanku* Jesuspa ñak’arinan k’aspita* apananpaq.+
33 Jinan Gólgota nisqaman chayarqanku, chayqa “calavera pata” ninantan nin.+
34 Chaypin Jesusmanqa jaya qorakunawan tupachisqa vinota qorqanku,+ paytaq malliykuspa mana ujayta munarqanchu.
35 K’aspiman clavaspankutaq jawa p’achanta sorteaspa rakinakurqanku.+
36 Tiyaykuspataq chaypi payta qhawarqanku.
37 Chaymantapas umanpa altonpin qelqarqanku imamantachus juchachasqa karqan chayta: “Kayqa judío runakunaq reynin Jesusmi”,+ nispa.
38 Chay p’unchaypiqa iskay suwakunatan k’aspipi warkullarqankutaq, jujta Jesuspa paña ladonpi jujtataq lloq’e ladonpi.+
39 Wakin chayninta pasaq runakunan umankuta maywispa+ Jesusta k’amirqanku:+
40 “¡Yau templota thunispa kinsa p’unchaypi sayarichiyta munaq,+ salvakuyyá! Diospa churinchus kanki chayqa, ¡uraykamuyyá chay ñak’arina k’aspimanta!”,+ nispa.
41 Umalliq runakuna, umalli sacerdotekuna, kamachikuy simita yachachiqkunapas payta asipayaspan nillarqankutaq:+
42 “¡Jujkunatan salvan, pay kikintataq mana salvakuyta atinchu! Israelpa reynin+ kaspaqa uraykamuchunyá ñak’arina k’aspimanta, chhaynapi paypi creenanchispaq.
43 Diosmantaq jap’ipakun chayqa, Diospa Churinmi kani, nintaq chayqa,+ Diosyá librachun munakun chayqa”,+ nispa.
44 Paypa ladonpi warkusqa suwakunapas k’amiytan qallarirqanku.+
45 Las docemanta jina* las tres jina tardekaman* lliu chay lado tutayarqan.+
46 Las tresta jinataq Jesusqa fuerteta wajakurqan: “Eli, Eli, ¿lama sabajtani?”, nispa; chayqa “Diosníy, Diosníy, ¿imaraykun saqerpariwanki?” ninantan nin.+
47 Chayta uyarispan chaypi sayashaqkunamanta wakinqa nirqanku: “Eliastan kayqa wajashan”,+ nispa.
48 Jinan paykunamanta jujnin phawarispa esponjata p’osqo vinopi challpurqan, chayta carrizoman churaspataq jaywarqan ch’onqananpaq.+
49 Wakintaq nirqanku: “¡Jinalla kachun! Qhawallasunchis, jamunqapaschá Elías payta libraq”, nispa.
50 Jesusqa jujtawanmi fuerteta wajarikurqan, jinaspa wañupurqan.*+
51 Chayllamanmi templo ukhupi cortina+ iskayman llik’ikurqan+ wichaymanta urayman;+ jallp’apas chhafchikurqanmi, qaqakunapas ch’eqtakurqanmi.
52 Sepulturakunapas kicharikurqanmi, jinan wañuypi puñushaq ch’uya runakunaq cuerpon rijurimurqan,
53 askha runakunataq chayta rikurqanku (Jesuspa kausarimpusqan qhepamanmi wakin runakunaqa cementeriomanta lloqsimuspa Jerusalén llaqtaman* jaykurqanku).
54 Terremoto kasqanta imaymana pasasqantawan rikuspan ejercitopi capitanpas paywan kuska Jesusta qhawaq runakunapas sinchita mancharikurqanku, jinaspa nirqanku: “Cheqaqtapunimá kayqa Diospa Churin kasqa”,+ nispa.
55 Chaypin askha warmikuna karullamanta qhawasharqanku.+ Paykunan Galileamantapacha Jesusta servispa jamusqaku.
56 Paykuna ukhupin kasharqanku María Magdalena, Josespa Santiagoq mamanku María, Zebedeoq churinkunaq mamanpas.+
57 Tardeña kaqtintaq Arimatea llaqtayoq José sutiyoq qhapaq runa jamurqan, paypas Jesuspa discipulonmi kapusqa.+
58 Paymi Pilatoman rispa Jesuspa cuerponta mañakurqan,+ jinan Pilatoqa soldadonkunata kamachirqan payman entreganankupaq.+
59 Chaymi Joseqa Jesuspa cuerponta apaspa linomanta sumaq limpio telawan k’uyurqan,+
60 jinaspa qaqapi chayllaraq t’oqochisqan sepulturaman churarqan.+ Chay sepulturaq punkunta wisq’ananpaqtaq jatun rumita tanqaykurqan, jinaspa ripurqan.
61 María Magdalenawan juj kaq Mariawanmi ichaqa sepulturaq ñaupanpi tiyaykuspa qhepakurqanku.+
62 Tukuy chaykunaqa samana p’unchaypaq* alistakunanku p’unchaypin pasarqan.+ Qhepa p’unchaytataq umalli sacerdotekuna fariseokunapiwan Pilatoq ñaupanpi juñukuspa
63 nirqanku: “Señor, yuyariruykun chay llulla runa manaraq wañushaspa: Kinsa p’unchaymantan kausarichisqa kasaq,+ nispa nisqanta.
64 Chayrayku, kamachiy kinsa p’unchaykama sepulturata cuidamunankupaq, mana chayqa discipulonkunan suwaruspa+ llaqtapi runakunata ninkuman: Wañusqamantan kausarichisqa kapun, nispa. Chhaynapin qhepa kaq llulla yachachikuyqa ñaupaq kaqmantapas aswan mana allinraq kanman”, nispa.
65 Jinan Pilatoqa nirqan: “Soldadokunata pusaspa allintapuni paykunawan chay sepulturata cuidachimuychis”, nispa.
66 Chaymi paykunaqa rispanku sepulturata wisq’aq rumita allin-allinta segurarqanku, chaypitaq soldadokunata saqerqanku chayta qhawanankupaq.
Uraypi willakuykuna
^ Chaypiqa “kuraq runakuna” nillanmantaqmi.
^ Griego rimaypiqa “yawarpa precion” ninmi.
^ Griego rimaypiqa “manka ruwaqpa jallp’anta” ninmi. Yaqapaschá chaypiqa manka ruwaqkuna llank’arqanku.
^ Qhaway “Astawan yachanapaq A5” nisqata.
^ Griego rimaypiqa “yawarninmantaqa” ninmi.
^ Carrizotaqa “soqos, caña” nillankutaqmi.
^ Chaypiqa “obligasqa llank’anata ruwachirqanku” nillanmantaqmi.
^ Qhaway Explicasqa simikuna nisqapi “Ñak’arina k’aspi” nisqata.
^ Griego rimaypiqa “isqon kaq horakaman” ninmi, chaytaqa yupaqku intiq lloqsimusqanmantapachan.
^ Griego rimaypiqa “Soqta kaq horamanta” ninmi, chaytaqa yupaqku intiq lloqsimusqanmantapachan.
^ Griego rimaypiqa “espiritunta entregarqan” ninmi. Qhaway Explicasqa simikuna nisqapi “Espíritu” nisqata.
^ Griego rimaypiqa “ch’uya llaqtaman” ninmi.
^ Qhaway Explicasqa simikuna nisqapi “Samana p’unchay” nisqata.
