Bibliaq nisqanman jinaqa rey Davidqa otaq Israel nacionpa reyninqa, manaraq Jesús jamushaqtinmi kausarqan 1100 watakunapi jina; mirayninkunapas pachaj-pachaj watakunan kamachirqanku. Wakin runakunan ninku: “Rey Davidmanta rimayqa juj cuentollan payqa manan karqanchu”, nispa. Ichaqa, ¿cuentollachu kanman?

 1993 watapin arqueólogo Avraham Biranpa dirigisqan runakuna tarirqanku juj rumita Israel nacionpa wichay ladonpi Tel Dan nisqa lugarpi, chay rumipin nisqa “Davidpa familian” nispa. Chayqa qelqasqa kasqa ñaupa tiempopi semítico nisqa simipin, 900 watakunapi jina manaraq Jesús jamushaqtin. Chaytaqa arameokunan ruwankuman karqan Israel nacionta atipasqankuta rikuchinankupaq.

 Bible History Daily nisqa qelqan nin: “Wakin runakunan iskayachirqanku Davidpa familian nisqa qelqasqa kasqanta [...]. Ichaqa yaqa llapan Biblia t’aqwiqkunapas, arqueólogo runakunapas manan iskayarqankuchu Tel Dan nisqapi rijurisqanmantaqa, aswanpas chaymi sut’ita rikuchirqan Bibliapi rey Davidmanta rimasqanqa cheqaq kasqanta. Chay tarisqankun aswan importante karqan Biblical Archaeology Review nisqa revistapi lloqsimuq willakuykunamantaqa”, nispa.