¿Imaraykun paraisomanta yachanayki?

WAKIN yachaysapa runakunaq nisqankuman jinaqa Bibliapi wakin librokunapiqa manas willanchu Edén huertamantaqa. Religionkunamanta yachaq Paul Morris profesormi qelqasqanpi nirqan: “Bibliapiqa manañan juj librokunapi willanñachu Edén huertamantaqa”, nispa. Yaqapaschá askha yachaysapa runakunapas chhaynata piensankuman, ichaqa manan piensasqanku jinachu.

Bibliapiqa askha kutitan rimashan Adanmanta, Evamanta, mach’aqwaymanta Edén huertamantapas. * Ichaqa yachaysapa runakunaq pantasqata piensasqankumanta aswan mana allinqa, religionkunapi umallikuna juj runakunapas Edén huertapi paraisomanta willakuyqa cuentollan nisqankun. ¿Imaraykun sinchi mana allinpuni chay nisqanku? Chayta nispaqa Biblia contran jatarishanku.

Manachus allinta yachasun Edén huertapi imakunachus pasasqanta chayqa, manan entiendesunmanchu Bibliapi Diospa yachachikuyninkunataqa. Bibliaqa ancha importante tapuykunatan kutichishan, chay kutichiykunataq tupashan Edén huertapi imakunachus pasasqanwan. Chay tapuykunamanta yachasunchis.

● ¿Imaraykun machuyanchispas wañunchispas? Adanwan Evawan Jehová Diosta kasukunkuman karqan chayqa wiñaypaqmi kausankuman karqan. Dios contra jatarisqankumantapachan chinkachipurqanku ch’uya runa kasqankuta chaymi wañupurqanku (Génesis 2:16, 17; 3:19). Paykunaq wawankuna kasqanchisraykun llapanchispas pantaq runa, juchayoq ima kanchis. Chaymi Bibliaqa nin: “Juj runallawanmi juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa (Romanos 5:12).

● ¿Imaraykun Dios jinallata qhawan millay ruwaykunata? Edén huertapin Satanasqa Jehová Diosta llullamanta tumparqan, Adán Evamanpas allin kaqta mana qoyta munaqmantan tumparqan (Génesis 3:3-5). Chaywanqa mana allin kamachikuqmatan tumpasharqan. Adanwan Evawantaq Saqrata kasukuspa Jehová Diosta qhepanchapurqanku, chayta ruwaspan rikuchirqanku paykunallamanta allin kaqta mana allinkaqtapas ajllakuyta munasqankuta. ¿Imatan ruwarqan Jehová Dios? Ancha yachayniyoq jinaspapas chanin Dios kasqanraykun juj tiempo runakuna paykunapura kamachinakunankuta jinalla qhawashan. Kunankamaqa astawanmi millay kausayqa pachantinpi yapakushan, satanasmi runakunata tanqashan millaykunata ruwanankupaq, chaymi sut’ita rikuchin runakunaqa mana paykunallamantaqa allinta kamachikuyta atisqankuta, necesitanchispunin Diospa yanapayninta (Jeremías 10:23).

● ¿Imapaqmi Dios kay jallp’ata kamarqan? Kay jallp’a munay paraíso kanantan Jehová Diosqa munarqan, chaytan yachanchis Edén huerta imayna kasqanpi. Diosmi Adanta Evatawan kamachirqan wawakunayoq kaspa kay jallp’aman junt’aykunankupaq jinaspa llapa jallp’ata munay paraisoman tukuchinankupaq (Génesis 1:28). Chhaynaqa Diosqa munan kay jallp’a munay paraíso kanantan chaypi Adanpa mirayninkuna ch’uya runa kaspa kusisqa, juj nisqalla kausanankuta. Astawanqa chaymantan Bibliaqa willashan, Diospa munaynin imayna junt’akunanmanta.

● ¿Imapaqmi Jesucristo kay jallp’aman jamurqan? Edén huertapi Adanwan Evawan Dios contra jatarisqanku qhepamanmi paykunapas mirayninkunapas wañunankupaq juchachasqa kapurqanku. Diosmi ichaqa ancha munakuq kasqanrayku churinta kay jallp’aman kachamurqan “kacharichisqa” kaspa sumaq suyakuyniyoq kananchispaq (Mateo 20:28). ¿Imaynatan kacharichisqa karqanchis? Jesustan Bibliaqa sutichan “qhepa kaq Adán”, nispa. Jesusqa tukuy tiempon Jehová Diosta kasukullaqpuni, manan ñaupaq kaq Adán jinachu karqan. Chaymi Jesusqa mana juchayoq ch’uya runa karqan. Paymi kausayninta entregarqan runakunata juchamanta kacharichiwananchispaq. Chhaynapin Diospaq junt’aq sonqo runakunaqa juchankumanta perdonasqa kayta atinku, jamuq tiempopitaq ch’uya runa kayta atinku imaynan Adanpas Evapas Edén huertapi manaraq juchallikushaspa karqanku jina (1 Corintios 15:22, 45; Juan 3:16). Chhaynaqa Jesusqa kay jallp’aman jamurqan Diospa munaynin junt’akunanpaqmi. *

Yachamusqanchis jina Diospa munayninmanta Bibliaq willasqanqa cheqaqmi, jinaspapas facilta entiendenapaq jinallan. Imaynan Edén huertapi runakunapas, animalkunapas cheqaq karqanku, chhaynallataqmi jamuq tiempopaq Diospa promesankunapas cheqaqpuni, jinaspapas pisi tiempollamantan junt’akunqa. ¿Imatan ruwananchis Diospa promesankuna junt’akusqanta rikunanchispaq? Sapankanchismantan chayqa kanqa. Diosqa munanmi llapa runakuna promesankunata chaskikunankuta, mana allinkunata mayninpi ruwarqanku chaypas (1 Timoteo 2:3, 4). ¿Imaynapin chayta yachanchis?

Jesusqa manaraq wañukapushaspan ladonpi kaq juj mana allin ruwaq runawan rimarqan. Chay runaqa yacharqanmi mana allin ruwasqanmanta wañunanpuni kasqanta, ichaqa Jesuspa yanapaynintan mañakurqan. Jesustaq payta nirqan: “Noqawanmi paraisopi kanki”, nispa (Lucas 23:43). Jesusqa munarqantaq chay mana allin ruwaq runa pesapakusqanrayku paraisopi wiñaypaq kausananta chayqa, ¿manachu munanman noqanchispas wiñaypaq paraisopi kausananchista? Chaytapunin munan. Taytan Jehová Diospas chaytapunin munan. Qanpas chay promesakunata chaskikuyta munanki chayqa Edén huertata kamaq Jehová Diosmanta tukuy atisqaykita yachashallay.

[Notas]

[Recuadro]

ÑAUPAQ KAQ PROFECÍA CHAYMANTAN BIBLIAQA ASTAWAN RIMAN

“Qantawan [mach’aqway] warmitawanmi cheqninachisqaykichis, mirayniykitawanpas paypaq miraynintawanpas, mirayninmi umaykipi t’ustusunki, qantaq talonninpi kaninki” (Génesis 3:15, Diospa Simin Qelqa)

Kaymi Bibliapi ñaupaq kaq profecía, Diosmi Edén huertapi chay profeciata willarqan. Ichaqa ¿pin chay warmi, mach’aqwaypas, sapankaqpa mirayninpas? ¿Imaraykun “cheqninakunku”?

MACH’AQWAY

Satanás (Apocalipsis 12:9).

WARMI

Janaq pachapi Jehová Diospa espiritual llaqtan, chaypin kashanku angelninkuna (Gálatas 4:26, 27). Profeta Isaiasmi willarqan kay “warmi” espiritual llaqtata wachakunanmanta (Isaías 54:1; 66:8).

MACH’AQWAYPA MIRAYNIN

Satanaspa munayninta ruwaqkuna (Juan 8:44).

WARMIQ MIRAYNIN

Jesucristo, paymi jamurqan janaq pachapi Jehová Diospa espiritual llaqtanmanta. Chaymantapas Jesuspa wayqenkunapiwanmi warmiq mirayninqa kanku, paykunatan Dios ajllarqan Jesuswan kuska janaq pachapi kamachinankupaq, chhaynapi juj espiritual llaqta kanankupaq “Diospa Israel llaqtan”, nisqa. (Gálatas 3:16, 29; 6:16; Génesis 22:18).

TALONNINPI KANISQA K’IRI

Diospa churintan Satanasqa kay jallp’api kashaqtin runakunawan wañuchirqan. Chayqa sinchi nanaymi karqan, ichaqa pisi p’unchaykunallamantan Jesusqa kausarichisqa karqan.

UMAPI T’USTUSQA K’IRI

Jesusmi wiñaypaq Satanasta chinkachipunqa. Ñaupaqtan ichaqa Edén huertamantapacha Satanaspa tukuy mana allin ruwasqankunata allichanqa (1 Juan 3:8; Apocalipsis 20:10).

Bibliaq willasqan nisqa folletopin yachanki imamantas Biblia astawan rimashan chayta, chay folletotan Jehová Diospa testigonkuna ruwamurqanku.

[Foto]

Adanwan Evawanqa juchallikusqankuraykun ñak’arirqanku