Noepas familianpas animalkunapas arcamanmi jaykurqanku. Jehová Diostaq arcaq punkunta wisq’aspa parachimuyta qallarirqan. Nishutapuni paramuqtintaq arcaqa unupi tuytuyta qallarirqan. Pisi-pisimantan unuqa orqokunatapas p’ampapurqan. Llapa millay runakunan wañupurqanku. Noewan familianwanmi ichaqa salvakurqanku. Paykunaqa anchatachá kusikurqanku Jehová Diosta kasukuspaqa.

40 p’unchayta 40 tutatawanmi nishutapuni paramurqan, jinaspa tatipurqan. Tiempowantaq unuqa pisiyapuyta qallarirqan jinan arcaqa orqo patapi tiyaykurqan. Ichaqa askharaqmi unuqa kasharqan, chaymi Noepas familianpas juj tiempotawanraq suyananku karqan arcamanta lloqsinankupaq.

Pisi-pisimantan unuqa ch’akipurqan. Noewan familianwanqa wata masmi arcapi tiyarqanku. Chay qhepamanmi Jehová Dios nirqan arcamanta lloqsinankupaq. ¡Paykunapaqqa jallp’aqa mosoqpas kapunman jinan karqan! Jehová Diostan agradecekurqanku salvasqanmanta, jinan juj ofrendata jaywarqanku.

Jehová Diosqa kusikurqanmi ofrenda jaywasqankuwan, chaymi prometerqan manaña jayk’aqpas runakunata jatun parawan wañuchinanpaq. Chay promesanta yuyarinankupaqmi k’uychita cielopi rijurichirqan. ¿Jayk’aqllapas k’uychita rikurqankichu?

Jinaspapas Jehová Diosqa jallp’antinpi junt’anankupaqmi Noeta familiantapas kamachirqan.