REY Salomón Diosmanta karunchakusqan qhepamanmi Diospa willasqanman hina Israel iskay llaqtaman t’aqakurqan. Salomonpa churin Roboammi sinchi millayta llaqtata tratarqan, chaymi chunka ayllukuna t’aqakapurqanku. Iskay ayllukunallan qheparqan Judá sutiwan, chaypin Davidpa mirayninmanta reykuna kamachikurqanku.

Chay llaqtakunapi kamachiqkunaqa manan Diosta kasukurqankuchu nitaqmi paypi iñirqankuchu, chaymi mana unaytachu thakpi kawsarqanku. Ichaqa chunka ayllukunan aswantaqa mana allinta kawsarqanku, chaypi kamachikuqkuna wak dioskuna yupaychayta paqarichisqankurayku. Diosqa Eliasta, Eliseota, huk profetakunatawanmi kacharqan, paykunan wañusqakunatapas kawsarichirqanku, chaywanpas manan kutirikurqankuchu. Chaymi Diosqa hinallata qhawarqan Asiria runakuna Israel llaqtata atipananta.

Unay tiempo qhepamanmi Judá llaqtapas castigasqa karqan. Diospa profetankunaqa anyarqankun chay kamachikuqkunata, ichaqa iskay kinsallan uyarikuspa Diosman kutirikurqanku. Hukninmi karqan rey Josías, payqa wak dioskuna yupaychay chinkananpaqmi kallpachakurqan, allichachirqanmi yupaychana wasitapas. Chayta ruwashaspan tarirqan Moisespa chaskisqan kamachikuykunata. Chaymi Josiasqa astawanraq kallpachakurqan wak dioskunata ch’usaqyachinanpaq.

Josiaspa kamachikusqan qhepaman haykuq reykunaqa manan pay hinachu karqanku. Chaymi Jehová Dios hinallata qhawarqan Babilonia llaqta Judá llaqtata atipaspa Jerusalenta yupaychana wasitawan thunichinanta. Chaypi mana wañuqkunatan Babiloniaman aparqanku. Diosmi ichaqa willachirqan qanchis chunka watamanta llaqtankuman kutipunankuta. Chaykaman Judá llaqtaqa wikch’usqa kanan karqan.

Manañan pipas Davidpa mirayninmanta kamachinanchu karqan prometesqa Rey Mesías chayamunankama. Davidpa mirayninmanta yaqa llapa reykunan mana allinta kamachikusqankupi rikuchirqanku runaqa mana kamachinanpaq hinachu kasqanta. Mesiasllan allin kamachikuqqa kanqa. Chaymi Jehová Dios Israelpi último reyta nirqan: ‘Ch’utisunkikun coronaykita [...] chanin kamachikuq hamunankama, hinan payman qopusaq’, nispa (Ezequiel 21:26, 27).

(1 Reyes; 2 Reyes; 2 Crónicas 10-36; Jeremías 25:8-11.)