Capernaum sinagogapin Jesusqa yachachisharan janaq pachamanta uraykamuq t’anta kasqanmanta. Chaymantaqa ñan juj chikanta rimaranña qocha chimpamanta jamuq runakunaman, paykunatan Jesusqa milagrota ruwaspa mijuchiran.

Chay sinagogapin Jesusqa niran: ‘Ñaupa taytaykichiskunaqa “maná” nisqataña ch’inneqpi mijuranku chaypas, wañupurankun. Noqan ichaqa janaq pachamanta uraykamuq kausay qoq t’anta kani. Pipas kay t’antata mijuqqa wiñaypaqmi kausanqa; kay pacha runakunarayku qosaq chay t’antaqa aychaymi’, nispa (Juan 6:48-51).

30 watapipas Jesusqa ñan Nicodemoman willaranña Diosqa runakunata munakuspa paykunata salvananpaq Churinta kachamusqanmanta. Kay kutipin ichaqa Jesús rimasharan aychanta mijunamanta, chaywanqa sacrificio ruwananpi iñinamantan rimasharan. Chaypi iñispallan pipas wiñay kausaymanqa chayanan karan.

Chayta uyarispan runakunaqa sinchita phiñakuspa ninakuranku: “Maypis kunan kay runa aychanta mijuchiwasunman”, nispa (Juan 6:52). Jesusmi ichaqa mana aychanta mijuymantapunichu rimasharan, aswanpas juj ejemplollatan churasharan.

Chaymi niran: “Pipas aychayta mijuqqa yawarniytapas ujaqqa wiñay kausayniyoqmi kanqa. [...] Aychayqa cheqaq mijunan, yawarniypas cheqaq ujanan. Pipas aychayta mijuqqa yawarniytapas ujaqqa noqawanmi jujllachasqa kashan”, nispa (Juan 6:53-56).

Chay runakunaqa “¿runa aychatachu mijusunchis? ¿Yawartachu ujasunchis?” nispachá piensasharanku, chaychá sinchita phiñakuranku (Génesis 9:4; Levítico 17:10, 11). Jesusmi ichaqa paypa sacrificio ruwananpi iñinankumanta rimasharan. Chay sacrificiota ruwaspan payqa ch’uya cuerponta qonan karan, yawarnintapas jich’anan karan. Qatikuqninkunapas manan chayta entienderankuchu. Chaymi wakinqa ninakuranku: “¡Imatataq kay runari rimashan! ¿Pitaq chay nisqantari uyarinman?”, nispa (Juan 6:60).

Chayta reparaspan Jesusqa paykunata niran: “¿Chay nisqaywanchu phiñakushankichis? ¡Imataraqchá ruwawaqchis runaq Churin maypichus ñaupaqpi kasharan chayman wichapushaqta rikuspaykichisqa! [...] Qankunaman nisqay simikunaqa espiritumantan paqarin, kausay qoqtaqmi chayqa kanpas; wakinniykichismi ichaqa mana creenkichischu”, nispa (Juan 6:61-64). Jinan askha qatikuqninkuna ripuranku.

Chaymi Jesusqa 12 apostolninkunata niran: “¿Qankunapas ripuytachu munashankichis?”, nispa. Jinan Pedroqa niran: “Señor, ¿pimantaq riykumanri? Qanpa rimasqaykikunaqa wiñay kausay simikunan. Noqaykuqa iñiykun, yachaykutaqmi qanqa Diospa ch’uya Churin kasqaykita”, nispa (Juan 6:67-69). Manaña paykuna allintachu entiendesharanku Jesuspa chay yachachisqanta chaypas, chhayna sumaqtan Pedroqa Jesusman kutichiran.

Chaywanpas Jesusqa niranmi: ‘Noqaqa chunka iskayniyoqtan ajllaraykichis ¿riki? Ichaqa jujniykichismi yanqamanta tumpaq kapun’, nispa (Juan 6:70). Payqa Judas Iscariotemantan rimasharan. Chay tiempopaqqa ñan Jesusqa reparanmanña karan Judaspa sonqon q’ewipushasqanta.

Chaywanpas Jesusqa anchatan kusikuran Pedropas juj apostolninkunapas payta munakusqankumanta. Paykunan runakuna yachachiypi Jesusta yanapananku karan, chhaynapi runakuna salvakunankupaq.