26 YACHACHIKUY
¿Imaraykun nanaypas ñak’ariypas kan?
Qonqaylla ima sasachakuypas kaqtinqa yaqapaschá nisunman: “¿Imaraykutaq khaynatari sufrinchis?”, nispa. Kunanmi yachasunchis imaninsi Biblia chayta.
1. ¿Imaynatan Satanás mana allin kausayta paqarichirqan?
Chay Saqra, Satanasqa Jehová Dios contran jatarirqan. Kamachikuq kayta munaspan payqa Adanta Evatawan juchaman urmachirqan. Ñaupaqtaqa Evatan engañarqan (Génesis 3:1-5). “Diosqa manan munanchu kusisqa kausanaykichistaqa” nispapas nishanman jinan Saqraqa rimarqan. Paypa nisqanman jinaqa Diosta mana kasukuspas runaqa aswan allinta kausanman. “Diospa jark’asqan sach’a ruruta mijuspaqa manan wañunkichischu” nisqanwanmi payqa llullakuyta paqarichirqan. Chhaynapin Saqraqa “llullakunaq taytan” kapurqan (Juan 8:44).
2. ¿Imatan Adanpas Evapas ruwarqanku?
Munakusqanraykun Jehová Diosqa Adantapas Evatapas Edén huertaman churarqan. Chaypiqa llapa sach’akunaq ruruntapas mijunallankun karqan, juj sach’aq rurullantan mana mijunankuchu karqan (Génesis 2:15-17). Evan ichaqa prohibisqa sach’aq rurunta “p’itispa mijuyta qallarirqan”, Adanpas “mijuykullarqantaqmi” (Génesis 3:6). Chhaynapin Diosta mana kasukurqankuchu. Paykunapiqa manan ima juchapas karqanchu, ch’uya sonqon, ch’uya yuyaymi karqanku. Chhaynataq karqanku chayqa, yuyaypipunin paykunaqa Diosta mana kasukurqankuchu. Chayta ruwaspan kamachiqninku Diostapas qhepanchapusharqanku. Chhaynapitaq sinchi nanaypi tarikurqanku (Génesis 3:16-19).
3. ¿Iman noqanchispaq karqan Adanpas Evapas mana kasukusqankumanta?
Diosta mana kasukusqankuraykun Adanpas Evapas juchasapa kapurqanku. Paykunaq wawankunataq kanchis chayqa, lliu runapas juchayoqñan nacemunchis. Biblian nin: “Juj runallawanmi juchaqa kay pachapi rijurirqan, wañuytaq jucharayku rijurirqan; chhaynapin wañuyqa llapa runaman chayarqan”, nispa (Romanos 5:12).
Chhaynaqa, ¿chayraykuchu sufrinchis? Manan chayraykullachu. Mayninpiqa sufrinchis noqanchis kikinchis mana allinta imatapas ruwasqanchisraykun. Mayninpitaq jujkuna imatapas mana allinta ruwasqankurayku. Mayninpiqa qonqaylla imapas pasaqtinmi sufrillanchistaq (leey Eclesiastés 9:11).
ASTAWAN YACHASUNCHIS
¿Imaraykun Diosta mana tumpananchischu millay kausay kasqanmanta, runaq sufrisqanmantapas? ¿Llakikunchu sufriqta rikuwaspanchis? Chaykunamanta kunan yachasun.
4. ¿Pin juchayoq runaq sufrinanpaq?
Askha runan ninku: “Diosmi kay pachataqa kamachishan”, nispa. ¿Cheqaqchu chay nisqanku kanman? VIDEOTA qhawaychis.
Leeychis Santiago 1:13; 1 Juan 5:19 textokunata, jinaspa jamuq tapuyman jina parlariychis:
-
¿Dioschu juchayoq mana allin kausaypas ñak’ariykunapas kananpaq?
5. Saqraq makinpin lliu imapas kashan
Leeychis Génesis 3:1-6 textota, jinaspa jamuq tapuykunaman jina parlariychis:
-
¿Imanispan Satanás Evata nirqan? (Génesis 3:4, 5 textota qhawaychis).
-
¿Imatan Satanás Diosmanta nirqan?
-
Saqraq nisqanman jinaqa, ¿runakuna necesitanchu Dios kamachinanta?
Leeychis Eclesiastés 8:9 textota, jinaspa jamuq tapuyman jina parlariychis:
-
Yachasqanchis jina, manan Dioschu kay pachataqa kamachishan, ¿Imaynan runakuna kashanku paypa mana kamachisqan?
-
Adanwan Evawanqa mana ima juchayoqmi karqanku, Diospa qosqan huertapin kausarqanku; ichaqa Saqrata kasukuspan Jehová Dios contra jatarirqanku.
-
Chhaynapin juchapas, ñak’ariypas, wañuypas paqarimurqan.
-
Jehová Diosqa chinkachipunqan juchata, ñak’ariykunata, wañuytapas. Kay pachaqa huerta jinan kapunqa, chaypin runakunaqa sumaqta kausakusunchis.
6. Jehová Diosqa llakikunmi noqanchismanta
¿Jinallatachu Dios qhawamun runaq sufrisqanta? Chaypaq qhawasunchis imatachus rey Davidpas apóstol Pedropas nirqanku chayta. Leeychis Salmos 31:7; 1 Pedro 5:7 textokunata, jinaspa jamuq tapuyman jina parlariychis:
-
Chay textokunaq nisqan jina, Jehová Diosqa llakikunmi noqanchismanta, ¿imaninkin chaymanta?
7. Jehová Diosqa chinkachipunqan ñak’ariykunata
Leeychis Isaías 65:17; Apocalipsis 21:3, 4 textokunata, jinaspa jamuq tapuykunaman jina parlariychis:
-
Chaypi leesqanchis jina, Jehová Diosqa tukuy nanaykunata llakikuykunata iman chinkachipunqa. ¿Imaniwaqmi chaymanta? ¿Munawaqchu chay junt’akunanta? ¿Imarayku?
¿Yacharqankichu?
Edén huertapi llullakuspaqa Jehová Dios contran Satanasqa mana allinta rimasharqan. Chayta ruwaspan Jehová Diospa ch’uya sutinta qhellicharqan, chhaynapin mana allin kamachikuqta jina qhawarichirqan. Ichaqa tukuy nanaykunata tukuy llakikuykunata chinkachispan Diosqa sutinta ch’uyanchanqa. Chhaynapin lliupas yachanqaku payllapuni allin kamachikuq kasqanta. Lliumi cielopipas kay pachapipas yachananku paylla ancha allin kamachikuq kasqanta (Mateo 6:9, 10).
WAKIN RUNAKUNAN NINKU: “Diosqa sufrinanchispaqmi kamawarqanchis”, nispa.
-
¿Imaniwaqmi chaymanta?
IMATAN YACHAMURQANCHIS
Runaq sufrinanpaqqa Saqrawan, Adanwan, Evawan iman aswan juchayoq kanku. Jehová Diosqa maytan llakikun sufrisqanchista rikuspa, chaymi pisi tiempollamanta kay pachapi ñak’ariykunata chinkachipunqa.
Yuyarisun
-
¿Imatan Satanás llullakuspa Evata nirqan?
-
¿Imaynan kausay kashan Adanwan Evawan Diosta mana kasukusqankumanta?
-
¿Imaynapin yachanchis sufrisqanchismanta Jehová Dios llakikusqanta?
ASTAWAN YACHANAYKIPAQ
¿Imaninmi Biblia juchamanta? Chaytan kaypi yachanki.
Kay qelqata leespan yachanki Saqra imakunamantas Diosta tumparqan chayta.
“¿Imaraykun jinallata Dios qhawan ñak’ariykuna kananta?” (Qhawaq, 2014 watapi 1 marzo)
Judío runakunataqa nishutan ñak’arichirqanku, ¿imaynatan Dios chayta qhawarirqan? Chaymantan kaypi yachanki.
Qhaway imaynatas juj runa sasachakuykunapiña tarikuspapas cheqaq kusikuyta tarirqan chayta.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
