Ancha allin regalota tariyqa manan facilchu. Juj regalo valorasqa kananpaqqa chaskikuqmantan dependenqa: Juj runapaq imapas ancha valorniyoq kasqanqa, manapaschá jujpaqqa valorniyoqchu kanman.

Ejemplopaq, juj adolescentepaqqa yaqapaschá ancha allin regaloqa kanman chayllaraq lloqsimuq aparato. Juj kuraq runapaqqa yaqapaschá ancha allin kanman ñaupa abuelonkunamantaraq jap’isqanku juj sumaq recuerdota chaskiy. Wakin llaqtakunapitaq wayna-sipaskunapas kuraqkunapas qolqeta chaskiyta munanku, chhaynapi imachus munasqankupi utilizanankupaq.

Chaywanpas, askha runakunan kallpachakunku regalo qosqanku aswan allin kananpaq. Mayninpiqa manapaschá atinkichu chhayna regalo qoyta, chayrayku qatimuqpi qhawarisunchis tawa yanapaykunamanta.

Regalo chaskikuqpa munasqan. Belfast (Irlanda del Norte) llaqtamanta juj runamanmi bicicletata regalasqaku 10 otaq 11 watayoq kashaqtin. Willakusqan jina, anchatapunis munasqa chhayna bicicletayoq kayta. Chay nisqanpin yachanchis juj regalo aswan allin kananpaqqa regalo chaskikuqman gustanmanchus chayta qhawarina kasqanta. Piensariy regalo qoyta munasqayki runapi. Averiguay imakunatan valoran chayta, imatachus valoran chayman jinan ima munasqanpas kallanqataq. Ejemplopaq, abuelokunaqa familiawan tiempo pasaytan munanku. Yaqapaschá wawankuwan nietonkuwan ima astawanqa kayta munanku. Chaymi sichus familia invitanman paykunawan kuska vacacionman lloqsinankupaq chayqa anchatapuni valoranqaku.

Pimanpas imachus gustasqanta averiguanaykipaqqa yachanaykin uyariyta. Biblian nin: “Llapaykichispas allin uyariqmi kanaykichis, manataqmi comuntachu rimanaykichis”, nispa (Santiago 1:19). Ejemplopaq amigoykikunawan otaq familiaykikunawan rimaspaqa makilla uyariy, imachus gustasqanta reparanaykipaq. Chhaynapin aswan facilta imachus gustasqanta regalanki.

 Regalo chaskikuqpa necesitasqan. Pipas necesitasqan regalota chaskikuqqa anchatan chayta valoran. ¿Imaynatan averiguawaq imachus necesitasqanta?

Chaypaqqa pay kikintan tapuwaq ima necesitasqanta otaq ima munasqanta. Ichaqa chayta ruwaspaqa wakinpaqqa manañan kusikunankupaq jinachu regalo qosqanku. Chaymantapas nisunkikuña imakuna munasqankuta otaq mana munasqankuta chaypas, yaqapaschá imachus necesitasqankutaqa mana willasunkikuchu.

Chayrayku allinta qhawariy imaynapi tarikusqanta. Regalota qoyta munasqayki runa, ¿waynachu, kuraqchu, solterochu, casadochu, divorciasqachu icha viudochu? ¿Llank’anchu icha jubilasqañachu? Piensay ima regalon paykunapaq jina kanman chaypi.

Imatapunichus necesitasqanta yachanaykipaqqa, pay jina tarikuq runakunawan rimay. Paykunan willasunkiku imaynan chhaynapi tarikuy kasqanta. Chayta yachaspan allin regalota qoyta atinki necesitasqanman jina.

Tiemponpi qoy. Biblian nin: “Tiemponpi rimasqapas may allinmi”, nispa (Proverbios 15:23). Chaypin yachanchis imatapas ima ratopi rimanapaq reparayqa uyariqninchista allinta sientechisqanta. Kaqllataqmi ruwasqanchiskunapas. Sichus chaypaq jina ocasión kaqtin regalota qosun chayqa, anchatan kusikunqa chaskikuq runaqa.

Yaqapaschá juj amigonchis casarakunqa, juj wayna graduakunqa, otaq juj pareja wawachayoq kanqaku. Chay jina ocasionkunapin runakunaqa regalokunata qonku. Wakinqa listatan ruwanku watantinpi ima compromisokuna kananmanta. Chhaynapin tiempowan planeanku ima regalota qonankupaqpas. *

Ichaqa, ima tiempopipas qollasunmanmi regalokunataqa, manan especial ocasionkunallapichu. Ejemplopaq, sichus juj runa mana imallamanta ima regalotapas juj warmiman qonman chayqa, yaqapaschá piensanman paypi interesakushananpaq. Ichaqa sichus mana chayraykuchu qonman chayqa, problemakunan paqarinman. Chaymi reparananchis ima intencionwan regalo qosqanchista.

Ima intencionwan qosqayki. Chay ejemploq rikuchisqan jina, qhawarinanchismi sichus regalota chaskikuq yaqapas mana allinta entiendenman regalo qosqanchismanta chayta. Ichaqa yachananchismi imarayku regalashanchis chayta. Yaqa llapanchispas sumaq sonqo kaspan regalokunata qonchis, ichaqa askha runakunan obligasqa jina qonku watapi señalasqa fechakunapi. Wakintaq qonku chay jawa imallatapas chaskinankurayku otaq sumaq tratasqa kanankurayku.

¿Imatan ruwasunman regalokunata allin intencionwan qonapaq? Biblian nin: “Tukuy imatapas munakuywan ruwaychis”, nispa (1 Corintios 16:14). Sichus juj regalota sonqomanta munakuywan qonki chayqa, kusikuywanmi chaskikunqaku. Qanpas qoykukuq kaspaqa ancha kusisqa sientekunki. Munakuq sonqo kaywan regalaspaqa, janaq pacha taytanchistan kusichisun. Apóstol Pabloqa felicitaranmi Corinto cristianokunata, qoykukuq sumaq sonqo kaspanku yanapaykunata Judeapi cristianokunaman apachisqankurayku. Jujnin cartanpin niran: “Diosqa kusisqa qoqtan munakun”, nispa (2 Corintios 9:7).

Sichus regalokunata qospa kunan rimamusqanchis recomendacionkunawan yanapachikunki chayqa, jujkunaqa kusikunqakun regalokuna qosqaykiwan. Diospas chaykunata jujkunatawan qhawarispan runakunaman aswan allin regalota qoran. Qatimuq articulopin yachasunchis imachus chay regalo kasqanta.