¿Imaraykun kallpachakunayki cigarro pitayta saqepunaykipaq?

Juj libron nin: “Cigarrota pitayta saqepuqkunaqa decidisqapunin karqanku saqepunankupaq chaymi yanaparqan manaña cigarrota pitanankupaq”, nispa ([¡Deje de fumar ahora!]).

CHHAYNAQA, sichus cigarro pitayta saqepuyta munanki chayqa decidisqapunin kanayki saqepunaykipaq. ¿Iman kallpachasunki decidisqa kanaykipaq? Cigarro pitayta saqepuy allinniykipaq kasqanpi piensay.

Manañan qolqeykita usuchinkichu. Juj caja cigarrota sapa p’unchay pitaspan watapi askha qolqeta gastakun. Nepal suyumanta Gyanu runan nin: “Manan cuentata qokurqanichu cigarro pitaypi llapan qolqeyta gastasqayta”, nispa.

Aswan kusisqan kausanki. Sudáfrica nacionmanta Reginan nin: “Cigarrota pitayta saqepusqaymantapachan chayraqpas kausayta qallarishayman jinan sientekurqani, p’unchaykunaq pasasqanman jinan aswan allinta kausashani”, nispa. Cigarro pitayta saqepuqkunaqa aswan allintan mijunaq sabornintapas, mijunaq q’apamusqantapas sientenku, astawantaq kallpankupas kan imatapas ruwanankupaq, rijch’ayninkupas aswan allinmi rikukun.

Saludniykin allinyapunqa. Estados Unidos nacionmanta Centros para el Control y la Prevención de Enfermedades nisqan nin: “Cigarrota pitayta saqepuqkunaq saludninmi ratulla allinyapun jayk’a watayoqña kanku, qhariña otaq warmiña kanku chaypas”, nispa.

Astawanmi qanpi confiayta atinki. Dinamarca nacionmanta Henning sutiyoq runan nin: “Cigarrota mana pitaspaqa manan imatapas ruwayta munaqchu kani, chaymi mana chaywan cuerpoyta dominachikunayrayku cigarro pitayta saqepurqani”, nispa.

Familiaykipaqpas amigoykikunapaqpas allinninpaqmi kanqa. Sociedad Americana contra el Cáncer organizacionpa nisqan jina “cigarro [...] pitaqpa ladonkupi kaq runakunatan dañota ruwan. [...] Investigakusqanman jinaqa cigarro q’osñinsi sapa watan waranqanpi runakunata wañuchishan, pulmonpi cáncer onqoywan, sonqopi onqoykunawan ima”.

Kamaqninchistan kusichinki. Bibliapin nin: “Munasqa wayqe panaykuna, tukuy ima qhellimantayá limpiakusun cuerponchista sonqonchistapas”, nispa (2 Corintios 7:1). Chaymantapas nillantaqmi: “Cuerpoykichista Diosman jaywaychis sonqonman chayaq ch’uya sacrificiota jina”, nispa (Romanos 12:1).

España nacionmanta Sylvian nin: “Cuerponchista qellichaq ruwaykunata Dios cheqnikusqanta entiendespan cigarro pitaytaqa saqepurqani”, nispa.

Ichaqa mayninpiqa manan cigarro pitayta saqepunaykipaq decidisqa kasqallaykichu yanapasunki. Familiaykikunaq amigoykikunaq yanapaynintawanmi necesitanki. ¿Imatan paykuna ruwankuman yanapanasuykipaq?