RUNAKUNAN NINKU:

Wakin runakunan Paraisomanta rimaspa ninku: “Ñawpa machulakunaq rimaynillanmi”, nispa. Hukkunataq ninku: “Allin runakunalla wiñaypaq sumaq kawsasqankumanta mosqokuy hinallan”, nispa.

¿IMATAN BIBLIA YACHACHIN?

“Paraíso” nispaqa runakunapaq Diospa ruwasqan Edén huertamantan rimashan (Génesis 2:7-15). Bibliaq nisqan hina, Diospa kamasqan ñawpaq warmi qharin chay huertapi tiyarqanku mana onqospa mana wañuspa (Génesis 1:27-28). Paykunaqa Diosta mana kasukusqankumantan chay huertamanta qarqochikurqanku. Ichaqa Biblian willan hamuq tiempopi chhayna sumaq Paraisopi runakuna tiyanankumanta.

¿IMARAYKUN CHAYMANTA YACHANAYKI?

Diosqa ancha munakuqmi, chaymi pay sonqo runakunaman huk Paraisopi sumaq kawsayta qonqa. Ichaqa, ¿imatan ruwananchis kamachinkunata hina chaskiwananchispaq? Bibliaq nisqan hina, astawanmi paymanta yachananchis chayman hinataqmi kawsananchis (Juan 17:3; 1 Juan 5:3).

“Señor Diosmi Edenpi huertata plantarqan [...] hinaspan ruwasqan runata chayman churarqan.” (Génesis 2:8.)

RUNAKUNAN NINKU:

Wakin runakunan ninku: “Paraisoqa hanaq pachapin kashan”, nispa. Hukkunataq ninku: “Qhepamanmi kay Hallp’a paraisoman tukupunqa”, nispa.

¿IMATAN BIBLIA YACHACHIN?

Diosmi runakunapaq Hallp’ata kamarqan chaypitaqmi huk sumaq paraisota ruwarqan runakuna wiñaypaq tiyanankupaq. Biblian willan kay Hallp’aqa mana hayk’aq tukukunanpaq kamasqa kasqanta (Salmo 104:5). Hinaspapas ninmi: “Hanaq pachaqa Señor Diospa kaqninmi, kay pachatataqmi runaman qorqan”, nispa (Salmo 115:16).

Chaymi mana admirakunachu kay Hallp’a paraisoman tukunanpaq Bibliaq willasqanmanta. Chaypin Dios runakunaman wiñay kawsayta qonqa. Chaypiqa manan pipas ñak’arinqachu nitaq nanayta muchunqachu. Llapa runakunan thakpi kusisqa tiyanqaku. Diospa tukuy imaymana ruwasqanwanmi kusikunqaku (Isaías 65:21-23).

“Runakunawanñan Diosqa tiyan, [...] manan wañuypas kanqañachu, manallataqmi llakikuypas, waqaypas, nanaypas kanqañachu.” (Apocalipsis 21:3, 4.)

RUNAKUNAN NINKU:

Askha religionkunan yachachinku, “allin runakunallan Paraisopiqa tiyanqaku”, nispa. Ichaqa manan yachankuchu pikunan chay “allin runakuna” kasqanta. Wakinqa religionninkupi costumbrekuna hunt’asqankuwan rezasqankuwan iman allin runapaq qhawarikunku.

¿IMATAN BIBLIA YACHACHIN?

Biblian willan “chanin runakuna” Paraisopi tiyanankuta. ¿Pikunatan Dios chaninpaq qhawarin? ¿Diospa munasqanta qhepanchaspa religionninpi costumbrekuna ruwaqtachu? Manan, Biblian nin: “Señor Diospa qayllanpi aswan allinqa kasukuymi ruphachina sacrificiota wak sacrificiotawan haywaymantaqa. Aswan allinqa uyarikuymi, kasukuymi uywakunaq wiran ruphachinamantaqa”, nispa (1 Samuel 15:22). Paraisopi wiñaypaq tiyaq “chanin runakunaqa”, Bibliapi Diospa kamachikusqanta kasukuqkunan kanqaku.

¿IMATAN RUWAWAQ?

Diosta kasukunapaqqa manan religionkunapi costumbrekunatachu qatikunanchis. Sapa p’unchay imayna kawsasqaykiwanmi sonqonta kusichinki otaq llakichinkipas. Diospa sonqonta kusichinaykipaqqa Bibliatan allinta t’aqwirinayki. Payqa manan mana hunt’ay atinatachu imatapas kamachiwanchis. Biblia willan ‘kamachikuyninkunaqa mana sinchi sasachu’ kasqanta (1 Juan 5:3). Kasukuq runakunamantaqmi Paraisopi kawsayta qonqa.

“Chanin runakunaqa kay hallp’atan hap’ikapunqaku, chaypin wiñaypaq tiyanqaku.” (Salmo 37:29.)