“Ama qolqe sonqo kaychischu [...]. Diosmi nirqan: ‘Manan saqerparisqaykichu, manataqmi wikch’urparisqaykipaschu’, nispa.” (Hebreos 13:5)

¿IMAYNATAN DIOS PAYKUNAPI INTERESAKUN?

Jehová Diospa siervonkuna qolqe sasachakuypi tarikuqtinkun Diosqa imaymananmanta yanapan. Hukninmi munakuq iñiqmasinkunawan yanapachisqan. * Santiago 1:27 texton nin: “Dios Yayaq sonqonman chayaq chanin mana ima qhelliyoq yupaychayqa kay hinan: Mana tayta-mamayoqkunatapas, viudakunatapas, llakikuyninkupi yanapaykuymi”, nispa.

Ñawpa cristianokunaqa iñiqmasinkutan yanapaqku. Yachanapaq, Judeapi yarqay kananta yachaspankun Siria llaqtapi Antioquía iñiq t’aqapi iñiqkuna rimanakurqanku “Judea provinciapi tiyaq wawqe-panakunaman yanapayta apachinankupaq” (Hechos 11:28-30). Chhaynapin chay sasachakuypi tarikuqkuna yanapayta chaskikurqanku. Chhayna yanapaymi rikuchin cristianokunaqa ruwayninkuwan munakuq kasqanta (1 Juan 3:18).

“Ñoqan Diosniyki Señor Diosqa kani, ñoqan allinniykipaq yachachiyki.” (Isaías 48:17, 18)

DIOSMI YANAPAWANCHIS KIKINCHISTA YANAPAKUNANCHISPAQ

Millonninpi runakunan repararqanku Bibliaq yachachikuyninkuna imamantapas aswan chaniyoq kasqanta. Proverbios 2:6, 7 texton nin: “Señor Diosmi yachayta qoqqa, paypa siminmantan paqarimun, yachaypas, allin yuyayniyoq-kaypas. Señor Diosmi chanin runakunata yanapaykun”, nispa. Diospa yachay qosqanman hina kawsaqtinkuqa kikinkuq allinninpaqmi.

Yachanapaq, manan drogakunkuchu nitaq machankuchu, chaykunaqa mana allinninkupaqmi kanman sinchi qolqepaqtaq kanpas (2 Corintios 7:1). Hinaspapas allintan imatapas ruwanku, mana llullakuq mana suwakuqmanmi tukupunku chaymi llank’anata tarikunku, llank’anayoq kaspataq allin llank’aq kapunku chaninpaq qhawarisqa. Efesios 4:28 texton nin: “Suwakuqqa amaña suwakuchunñachu, aswanpas llank’achun [...] pisichikuqkunaman imallatapas qoykunanpaq”, nispa.

“Diospa yachayninqa ruwasqankunawanmi reqsichikun” (Mateo 11:19).

KAYKUNAN RIKUCHIN

Ghana nacionmanta Wilson cristianoq llank’ananpaq contratonmi tukupusharqan. Chay p’unchayllaña llank’ashaspan gerenteq carronta maqchisharqan hinan chaypi qolqeta tarirqan. Jefenmi nirqan hap’ikapunanpaq, ichaqa Jehová Diospa testigon kasqanraykun chay qolqeta dueñonman kutichipurqan. Chaymi Wilsonqa mana chay p’unchayllañachu llank’arqan, aswanpas chay llank’anapin qhepakapurqan, qhepamantaq aswan allin llank’ayman churarqanku.

Franciamanta Geraldinetan Jehová Diospa testigon kasqanrayku llank’ananmanta jefan qarqopurqan. Ichaqa jefaq mamitanmi nirqan mana allinta chayta ruwasqanta. Nirqanmi: “Sichus munanki allin llank’aqta confianapaq runata chayqa, Jehová Diospa testigonta contratay, manan pitapas paykuna hinataqa tarinkichu”, nispa. Jefaqa Jehová Diospa testigonkunamantan yacharirqan hinan Geraldineta yapamanta contratarqan.

Sudáfrica nacionpin Sarah sutiyoq sapallan mama mana qolqeyoq kasharqan, hinan iñiqmasinkunaq munakuyninta rikurqan, paykunan ususinkunapaqwan mikhunata qorqanku carropipas apaqku. Qhepamanmi ususinkuna ninku: “Iñiq t’aqapiqa askha tayta-mamayoqmi kayku”, nispa.

Chhayna willakuykunataqa maytachá willasunman, chaykunan yuyarichiwanchis Bibliaq kay nisqanta: “Uyariwaqniymi ichaqa mana imanasqalla tiyanqa”, nispa (Proverbios 1:33). ¡May cheqaqpunin chay nisqanqa!