Brasil nacionmanta Ronaldoq phisqa familiankunan wañurqanku carronku chocaqtin, tayta-mamanpas chaypin wañurqanku. Paymi yuyarin: “Hospitalpin iskay killa kasharqani, familiaypa wañupusqankumantaqa manan willawarqankuchu.

“Willawaqtinkuqa manan creeyta atirqanichu. Nirqanin: ‘Manachus hina llapankuqa wañunkumanchu karqan’, nispa. Chhaynapuni kasqanta reparaspaymi sinchita sonqoy nanawarqan. Manan hayk’aqpas chhaynapiqa tarikurqanichu, kawsaytapas manañan munarqaniñachu. Askha killakunan sapa p’unchay waqarqani. Huchachakuqmi kani ‘ñoqa manejayman karqan chayqa, kawsashankumanraqpaschá karqan’, nispa.

“Chunka soqtayoq watañan pasarqon chay accidenteq kasqanmanta, pisi-pisimantan allinyarqani. Ichaqa familiaytaqa manan qonqayta atinichu”, nispa.

Waqayta munaspaqa waqay. Biblia willan waqanapaq tiempo kasqanta (Eclesiastés 3:1, 4). Ronaldo nin: “Sapa waqayta munaspaymi waqaq kani, chayqa thaktan sientechiwaq, waqayta aguantaymi ichaqa yanqa karqan”, nispa. Sapankapas hukniraytan rikuchinku llakikuyninkutaqa. Hukkunaqa manan runakunaq ñawpanpiqa waqankuchu, sichus chhayna kanki chayqa manan obligakunaykichu hukkunaq ñawpaqenpi waqanaykipaq.

Ama hukkunamanta karunchakuychu (Proverbios 18:1). Ronaldo nin: “Sapaymi kayta munarqani, ichaqa manan chaytachu ruwarqani. Visitamuwaqtinkuqa sumaqtan chaskiq kani, hinaspapas imayna sientekusqaytan willaq kani esposaymanpas amigoykunamanpas”, nispa.

Yaqapaschá wakinqa nisunkikuman “ama nishuta llakikuychu” nispa, otaq huk rimaykunawanpaschá sonqoykita k’irinkuman; chhayna kaqtinqa ama imatapas niychu. Ronaldo kayta yuyarin: “Wakinqa sonqochayta munaspan astawan sonqoyta k’iriwaqku rimasqankuwan”, nispa. Chhaynata nisuqtiykikuqa yaqapaschá niwaq “imaraykutaq chaytari niwan” nispa, ichaqa ama chayta niychu. Aswanpas Bibliaq kay nisqanta kasukuy: “Ama tukuy imaymana rimasqatapas uyariychu”, nispa (Eclesiastés 7:21).

Wañupuqkunamanta yachay. Ronaldo nin: “Wañupuqkunaqa manan maypipas ñak’arishankuchu, chaytan nin Eclesiastés 9:5 texto, chayta yachaspan thak sientekuni. Chaymantapas Biblian willan wañupuqkuna kawsarimpunankuta. Chaymi familiayta yuyarispaqa piensani viajepipas kashankuman hinata”, nispa (Hechos 24:15).

¿Yacharqankichu kayta? Biblian prometen: “Diosqa wiñaypaqmi wañuytapas chinkachinqa”, nispa (Isaías 25:8). *