Apóstol Pablon Tesalónica llaqtapi iñiqkunata nirqan: “Pipas mana kasukunqachu kay cartapi nimusqaykuta chayqa, chay runata señalaychis”, nispa (2 Tes. 3:14). Ñaupaqqa “chaytaqa umalliqkunan ruwanqaku” niqmi kanchis. Chay tiempopi nikusqanman jinaqa pipas yuyaychasqa kashaspa Diospa siminta mana kasukuqtaqa umalliqkunan señalananku karqan, chaytataq iñiq t’aqaman willananku karqan. Chay qhepamanqa iñiqkunaqa manañan paywanqa juñukunankuchu karqan.

Ichaqa kunanqa manañan chayqa chhaynañachu kanqa. ¿Imarayku? Kaypiqa apóstol Pabloqa manan umalliqkuna imachus ruwanankumantachu rimasharqan, aswanpas sapanka iñiq imachus ruwananmantan. ¿Imaraykun chayta ninchis? Chaypaq qhawarisun imakunatas ñaupaqtapas qhepatapas nirqan chayta.

Pabloq nisqanman jinaqa Tesalónica llaqtapi wakin iñiqkunaqa manas yachachisqankuta kasukushasqakuchu. Chay llaqtata visitashaspas payqa nisqa: “Pipas mana llank’ayta munaqqa amallataq mijuchunchu”, nispa. Chaywanpas paykunamanta wakinqa manas llank’ayta munasqakuchu, atisharqankuña chaypas manas chayta ruwasqakuchu. Chaymantapas jujkunaq ruwanankuman chapukuspas purishasqaku. ¿Imatan hermanokuna ruwankuman karqan chay mana kasukuqkunawan? (2 Tes. 3:​6, 10-12).

Apóstol Pablon nirqan: “Chay runata señalaychis”, nispa. Ichaqa, ¿imaninantaq señalay nisqa simiri? Griego rimaypiqa “chay runaman yuyayta churaychis” ninantan nishan. Pabloqa llapa iñiqkunatan chayta nisharqan, manan umalliqkunallatachu (2 Tes. 1:1; 3:6). Chhaynaqa sapanka iñiqmi chaytaqa ruwanan karqan. Pitapas Diospa yuyaychasqanta mana kasukuqta reparaspaqa t’aqakunankun karqan paymanta. Manan paywanqa amigontinqa kanankuchu karqan.

Ichaqa, ¿Diospa llaqtanmanta t’aqasqata jinachu rikuna karqan chay iñiqmasita? Manan. Pablon nillarqantaq: “Yuyaychashallaychis iñiqmasiykichista jina”, nispa. Chhaynaqa iñiqkunaqa juñukunallankun karqan paywanqa juñunakuypipas predicacionpipas. Ichaqa manañan amigota ruwanankuchu karqan, manan kusirikunapaqpas juñukunankuchu karqan. ¿Imarayku? Apóstol Pablon nillarqantaq: “Chhaynapi p’enqarikunanpaq”, nispa. Chhaynaqa p’enqarikuspa cambiananpaqmi chaytaqa ruwakunan karqan (2 Tes. 3:​14, 15).

Noqanchispas chay yuyaychayman jinan mana kasukuqkunataqa qhawarinanchis. Chaypaqqa allintan reparananchis cheqaqtapunichus mana kasukushan icha piensasqanchisman jinallachus chhayna kashan chayta. ¿Imarayku? Pabloqa manan conciencianchismanta jujniray ruwaqkunamantachu rimasharqan, manataqmi sonqonchista k’iriqkunamantachu rimasharqan. Aswanpas pikunachus yuyaypi Diospa siminta mana kasukunkuchu paykunamantan rimasharqan.

Mayqen iñiqmasipas yuyaypi Diospa siminta mana kasukushanmanchu chayqa, a atisunmanmi paymanta t’aqakuyta. Sapankamantataq chay kanqa chayqa familiallanchiswanmi chaymantaqa rimana. Ichaqa juñunakuypipas predicacionpipas paywanqa juñukushallasunmi. Paychus yuyayman kutispa Diospa siminman jina kausayta qallarinqa chayqa jujmantan paywanqa amigota ruwananchis.