1. ¿Imatan Jesús pisi tiempollamanta ruwanqa?

 TUKUKUY p’unchaykunapiñan kausashanchis. Pisi tiempollamantan Jesusqa kay pachapi llapa runata juzganqa. Ichaqa, ¿imaynapin yachanchis chay p’unchaykuna cercapiña kashasqanta? Jesusmi discipulonkunaman willarqan juj profeciata. Kay tiempoq tukukapunanpaqña kashaqtin ima señalkunachus kanan karqan chaytan willarqan (Mat. 24:3). Chay profeciaqa Mateo 24, 25 capitulokunapin kashan. Kashallantaqmi Marcos 13 capitulopipas, jinallataq Lucas 21 capitulopipas.

2. ¿Imakunamantan kaypi yachasunchis?

² Kay tukukuy p’unchaykunapi rijch’asqalla allin preparasqa kananchispaqmi Jesusqa kinsa rijch’anachiykunata willarqan. Juj kaq rijch’anachiypin ovejakunamanta cabrakunamantawan rimarqan. Juj kaqpitaq chunka doncella sipaskunamanta, juj kaqpitaq bolsa qolqekunamanta. Kaypin yachasunchis sapankamanta. Sapanka rijch’anachiymi yanapawasun imakunatas Jesús qhawarinqa pitapas juzgashaspa chayta. Ñaupaqta ovejakunamanta cabrakunamantawan rimasun.

OVEJAKUNAMANTA CABRAKUNAMANTAWAN

3. ¿Jayk’aqmi Jesús ovejakunata t’aqanqa cabrakuna ukhumanta?

³ Jesuspa juzganan p’unchay chayamuqtinqa, chaskikurqanchus allin willakuykunata yanaparqanchus ajllasqan wayqenkunatapas, chayman jinan pitapas juzganqa allinpaq mana allinpaqpas (Mat. 25:​31-46). ¿Jayk’aqmi Jesús t’aqanqa ovejakunata cabrakunamanta? Chaytaqa ruwanqa “manchay ñak’ariy” tiempopin, manaraq Armagedón guerra chayamushaqtin  (Mat. 24:21). Imaynan michiqqa ovejakunata cabrakunamanta t’aqan, chhaynatan Jesuspas wayqenkuna yanapaqkunata t’aqanqa runakuna ukhumanta.

4. Isaías 11:​3, 4 textoq nisqan jina, ¿imaraykun nisunman “Jesusqa chanillantan runakunata juzganqa” nispa? (Qhaway fotokunata).

⁴ Jehová Diosqa Jesustan churarqan juez kananpaq. Bibliaq nisqanman jinaqa, Jesusqa chanin juezmi (leey Isaías 11:​3, 4). Payqa allintan qhawarinqa runakunaq imachus ruwasqanta, imayna piensasqanta, imayna rimasqantapas. Chaymantapas qhawarinqan imaynatachus wayqenkunata qhawarirqanku chaytapas (Mat. 12:​36, 37; 25:40). Juicio p’unchaypaqqa allintañan yachanqa pikunachus wayqenkunata yanaparqanku chayta.  a Ichaqa, ¿imaynatan wayqenkunata yanapasunman? Diosmanta jujkunaman willaspan. Chay ruwaykunapi juj ruwaykunapipas Jesuspa wayqenkunata yanapasun chayqa chaninpaqmi Diosqa qhawariwasun, wiñay kausaytataqmi chaskisunpas (Mat. 25:46; Apo. 7:​16, 17). ¡May jatun bendicionmi chayqa ¿riki?! Manchay ñak’ariy tiempopipas qhepamanpas Diosllata servisun chayqa sutinchisqa “kausay libropin” qelqasqa kanqa (Apo. 20:15).

5. ¿Imatan yachasunman Jesuspa willasqan ovejakunamanta cabrakunamantawan, pikunan chay yuyaychasqanta kasukunanku?

⁵ Amapuni Jehová Diosmantaqa t’aqakuychu. Ovejakunamanta cabrakunamantawan rimaspaqa Jesusqa kay pachapi wiñaypaq tiyaqkunamantan rimasharqan. ¿Imaynatan paykuna rikuchinkuman Dios sonqo kasqankuta? Jesuspa wayqenkunata predicaypi yanapaspan. Chaymantapas paykunaqa kasukunankun Jesuspa ajllasqan allin yuyayniyoq junt’aq kamachita (Mat. 24:45). Janaq pachaman rinankupaq ajllasqa iñiqkunapas kasukunankun chay willakuytaqa. ¿Imarayku? Jesusqa qhawamushanmi paykunaq imachus ruwasqankuta, imayna piensasqankuta, imayna rimasqankutapas. Chhaynaqa paykunapas Dios sonqollapunin kananku. ¿Imaynatan chayta ruwankuman? Chaypaq yachasun Mateo 25 capitulopi iskay rijch’anachiykunamanta. Chaypin kashan ajllasqa hermanokunapaq allin yuyaychaykuna. Kunanqa chunka doncella sipaskunamanta yachasun.

CHUNKA DONCELLA SIPASKUNA

6. ¿Imaynatan pisqa sipaskuna rikuchirqanku allin yuyayniyoq kasqankuta? (Mateo 25:​6-10).

⁶ Jesuspa willasqanman jinaqa chay chunka doncella sipaskunaqa noviowan tupaqmi rirqanku (Mat. 25:​1-4). Paykunaqa noviowan kuskan casarakuy fiestaman jaykuyta munasharqanku. Jesuspa willasqanman jinaqa, pisqa sipaskunaqa “allin yuyayniyoqmi” karqanku, pisqataq “mana yuyayniyoq”. Allin yuyayniyoq sipaskunaqa preparasqan kasharqanku noviota ima horaskamapas suyanankupaq. Paykunaqa sapankankun mecherontinkama kasharqanku tutapi k’anchakunankupaq. Paykunaqa aparqankun mecheroman yapanapaq aceitetapas (leey Mateo 25:​6-10). Novio jamuqtinqa chay sipaskunaqa noviowan kuskan casarakuy fiestaman jaykurqanku. Chhaynan pasanqa ajllasqa iñiqkunawanpas. Dios sonqolla kaqkunaqa atento kaqkunaqa novio otaq Jesús jamuqtinmi paywan kuska janaq pacha gobiernoman jaykunqaku (Apo. 7:​1-3). b ¿Imataq pasanqa mana yuyayniyoq sipaskunawanri?

7. ¿Iman pasarqan mana yuyayniyoq sipaskunata, imarayku?

⁷ Chay pisqa mana yuyayniyoq sipaskunaqa  manan listochu kasharqanku noviota chaskinankupaq. Jesuspa willasqanman jinaqa chay sipaskunaqa novio chayamunanña kashaqtinsi reparakusqaku mecheronkuman aceite faltasqanta. Manataq aceitenku karqanchu chayqa rantiqmi rinanku karqan. Novio chayamunanpaqqa manan chaypichu paykunaqa kasharqanku. “Listo kashaq doncella sipaskunallan paywan kuska casarakuy fiestaman jaykurqanku, punkutataq wisq’ampurqanku” (Mat. 25:10). Chay mana yuyayniyoq sipaskunaqa kutimuspan punkuta takakurqanku novion ichaqa paykunata nimurqan: “Manan reqsiykichischu”, nispa (Mat. 25:​11, 12). Chay sipaskunaqa mana alistakusqankuraykun mana allin preparasqa kasqankuraykun mana chay fiestaman jaykurqankuchu. ¿Imatan chaymanta yachankuman janaq pachapaq ajllasqa iñiqkuna?

8, 9. ¿Imatan janaq pachapaq ajllasqa iñiqkuna yachankuman chunka doncella sipaskunamanta? (Qhaway kay parrafokunapaq fotota dibujotawan).

⁸ Listollapuni kashay. Doncella sipaskunamanta willaspaqa manan Jesusqa iskay t’aqa ajllasqa iñiqkuna kananmantachu willasharqan. Manan, “juj t’aqan allin preparasqa kanqa, juj kaqtaq mana”, nisharqanchu. Aswanmi willasharqan imaynas ajllasqa iñiqkunaqa tukukuykama aguantaspaqa premiota chaskinanku karqan chayta. Mana aguantaspaqa manan imatapas chaskinankuchu karqan (Juan 14:​3, 4). Chhaynaqa, chayqa manan común ruwaychu karqan. Janaq pachapiña kay pachapiña tiyasun chaypas chunka doncella sipaskunamanta willakuytaqa allin yuyaywanmi qhawarinanchis. Tukukuykaman atento kashananchis, aguantananchistaqmi imatapas (Mat. 24:13).

⁹ Yachamusqanchis jina Jesusqa chunka doncella sipaskunamanta willaspan yachachisharqan imaynas preparasqa atento kashananchis chayta. Chay qhepallamanmi Jesusqa willallarqantaq bolsa qolqekunamanta. Chaywanmi yachachirqan imaynas allin llank’aq kana chayta.

 BOLSA QOLQEKUNA

10. ¿Imaynatan ñaupaq iskay kamachikuna rikuchirqanku allin llank’aq kasqankuta? (Mateo 25:​19-23).

¹⁰ Qolqe bolsamanta rimashaspan Jesusqa willarqan iskay allin kamachikunamanta, juj mana kasukuq qella kamachimantawan (Mat. 25:​14-18). Jesuspa willasqanman jinaqa, juj runan karu llaqtaman viajananña kashaqtin kamachinkunaman askha qolqeta qorqan. Ñaupaq iskay kamachikunaqa allintan llank’arqanku, askhatan qolqetapas ganarqanku. Chaymi patronninkuqa paykuna allin llank’asqankuta rikuspa, qolqetapas askhata ganasqankuta rikuspa sapankankuta kusisqa nirqan: “Kunanqa patronniykiwan kuska kusikuy”, nispa (leey Mateo 25:​19-23). ¿Imatan kinsa kaq kamachi ruwanman karqan patronninpa qolqe qosqanwan?

11. ¿Iman pasarqan qella kamachita, imarayku?

¹¹ Chay patronqa juj kaq kamachinmanpas qorqanmi juj bolsa qolqeta. Chay kamachin ichaqa qella kaypi pampata t’oqospa chayman qolqeta p’amparqan. Patronnin chayamuqtintaq kaqllata chay qolqeta kutichipurqan. Payqa manan disculpallatapas mañakurqanchu. Aswanmi mana respetowan patronninta nirqan: “Noqaqa yachanin nishu mañakuq kasqaykita”, nispa. Patronninmi ichaqa qolqeta chaskispa wasinmanta qarqomurqan (Mat. 25:​24, 26-30).

12. ¿Pikunawanmi tupan chay kasukuq iskay kamachikuna?

¹² Chay iskay kasukuq kamachikunaqa janaq pachapaq ajllasqa iñiqkunawanmi tupan. Kasukuq kasqankuraykun Jesusqa sapankankuta nin: “Kunanqa patronniykiwan kuska kusikuy”, nispa. ¿Imaynataq chayri? Paykunaqa ñaupaq kaq kausarimpuytan chaskinku (Mat. 25:​21, 23; Apo. 20:5a). Ichaqa, ¿imatan ajllasqa iñiqkuna yachankuman chay mana kasukuq qella kamachimanta? Chayta qhawarisun.

13, 14. ¿Imatan ajllasqa iñiqkuna yachankuman Jesuspa willasqan qolqe bolsakunamanta? (Qhaway kay parrafokunapaq fotota dibujotawan).

¹³ Allin llank’aq kay. Jesús chay bolsa qolqekunamanta willaspaqa manan “wakin ajllasqa iñiqkunaqa qellan kapunqaku”, nisharqanchu. Aswanpas allin llank’aq kanankupaqmi chaytaqa willarqan. Qellakachakuspa llank’ankuman  chayqa manañan Diospa “wajasqankuna ajllasqankuna ukhupichu kankuman”, manañan Diospa gobiernonmanpas jaykuyta atinkumanchu. Chayta reparanankutan Jesusqa munarqan (2 Ped. 1:10).

¹⁴ ¿Imatan ajllasqa iñiqkuna yachankuman Jesuspa willasqan chunka doncella sipaskunamanta, qolqe bolsakunamantapas? Tukuy imapaqmi allin preparasqa kananku, atenton kashananku; tukuy kallpawantaqmi llank’ananku. Ichaqa manan chayllatachu Jesusqa chay ajllasqa iñiqkunataqa nirqan. Mateo 24:​40, 41 textopin juj yuyaychay kashallantaq. Chaytañataq kunanqa qhawarisunchis.

¿PIKUNAN “APASQA KANQAKU”?

15, 16. Mateo 24:​40, 41 textoq nisqan jina, ¿imaraykun janaq pachapaq ajllasqakuna makilla kashananku?

¹⁵ Manaraq chay rijch’anachiykunamanta willashaspan Jesusqa campopi llank’ashaq iskay runakunamanta, kutashaq iskay warmikunamantawan willarqan. Paykunamantan nirqan: “Jujninmi apasqa kanqa, jujnintaq saqerparisqa kanqa”, nispa (leey Mateo 24:​40, 41). Chaymantataq discipulonkunata nirqan: “Makilla kashaychis, manan yachankichischu ima p’unchaytachus Señorniykichis jamunqa chayta”, nispa (Mat. 24:42). Chunka doncellakunamanta willashaspapas yaqa kaqllatan Jesusqa nirqan (Mat. 25:13). Chhaynaqa chay kutikunapiqa yaqachus jina kaqllamanta Jesusqa rimashanman karqan. Paypa nisqanman jinaqa tiempon chayamunan karqan, chaypin yachakunan karqan pikunas janaq pachaman rinankupaq aprobasqa kanku chayta. Chaymantapas chay tiempo chayamuqtinqa pikunachus cheqaqtapuni ajllasqa kanku, pikunachus Dios sonqo kanku paykunallan apasqa kanqaku, paykunallatan Jesusqa chaskimunqa (Juan 14:3).

¹⁶ Makillan kashanayki. Mayqen ajllasqa iñiqpas mana makillachu kashanqa chayqa, manan ajllasqakunawan kuskachu juñusqa kanqa (Mat. 24:31). Ichaqa manan janaq pachapaq ajllasqakunallachu makillaqa kananku. Kay pachapaq kaqkunapas makillan kashananku atenton kashananku.

17. ¿Imaraykun mana llakikunachu Jehová Dios kay tukukuy p’unchaykunapi janaq pachapaq wakin iñiqkunata ajllasqanmanta?

¹⁷ Noqanchisqa allintañataq Jehová Diosta reqsinchis chayqa, confiananchismi imachus ruwasqanpiqa. Sichus pay kay tukukuy p’unchaykunapi pitapas ajllan janaq pachaman rinanpaq chayqa, manan chaymantaqa llakikunanchischu. c Chaypaqqa yuyarinanchismi uvas chajrapi llank’aq runakunamanta Jesuspa imachus nisqanta. Paypa nisqanman jinaqa, p’unchay tukuyta jinaña jamuq runakunapas contratasqan karqanku. Chaymantapas chay runakunaqa p’unchay qallariymantapacha llank’aq runakunawan igualtan pagonkutaqa chaskirqanku (Mat. 20:​1-16). Kaqllataqmi pasanqa janaq pachapaq ajllasqakunawanpas. Paykunaqa ñaupaqtaña qhepataña ajllasqa karqanku chaypas igualtan premiotaqa chaskinqaku.

JESUSPA YUYAYCHASQANTA KASUKUY

18, 19. ¿Ima yuyaychaykunamantan kaypi yacharqanchis?

¹⁸ Kaypi yachamusqanchis jina, pisi tiempollamantan Jesusqa cabrakuna ukhumanta ovejakunata t’aqanqa. Ovejakuna jina kaqkunaqa kay pachapin wiñay kausayta chaskinqaku. Chaypaqqa manan Jehová Diosmanta t’aqakunachu kunanpas ni manchay ñak’ariy tiempopipas. Tukukuy tiempopin Jesusqa ninqa pikunachus wiñay kausayman jaykunqaku chayta (Mat. 25:46).

¹⁹ Chaymantapas iskay rijch’anachiykunamantawanmi yachamurqanchis. Chaypin kashan janaq pachapaq ajllasqakunapaq allin yuyaychaykuna. Chunka doncella sipaskunamanta  yachasqanchispin rikurqanchis imaynas pisqalla allin preparasqa atento kasharqanku chayta. Paykunaqa preparasqan kasharqanku noviota maykamapas suyanankupaq. Pisqan ichaqa mana yuyayniyoq karqanku, manataqmi listochu kasharqanku. Chayraykun novioqa mana casarakuy fiestamanpas jaykuchirqanchu. ¿Imatan chaymanta yachasunman? Jesús kay millay pachata tukuchinankaman listolla makilla kashananchis. Bolsa qolqemanta rijch’anachiypitaq rikurqanchis imaynas iskay kamachikunaqa allin llank’aq karqanku chayta. Allin llank’aq kasqankuraykun paykunaqa patronninkupaq askha qolqeta ganarqanku. Chhaynapin patronninkuta kusichirqanku. Mana kasukuq qella kamachin ichaqa qarqosqa kapurqan. ¿Imatan chaymanta yachasunman? Diospa p’unchaynin chayamunankaman mana sayk’uspa llank’ashanallanchis. Chaymantapas yacharqanchismi imaynas janaq pachapaq ajllasqakunaqa atento kananku janaq pachaman apasqa kanankupaq chayta. Paykunaqa maytachá munashanku Jesuswan kuska “juñusqa” kayta. Armagedón guerra pasaytan paykunaqa juj novia jina Jesuswan casarakunqaku. Chaytan nikun: “Corderoq casarakuynin”, nispa (2 Tes. 2:1; Apo. 19:9).

20. ¿Imatan Jehová Dios ruwanqa yuyaychasqanta kasukuqtinchis?

²⁰ Pisillañan faltashan kay pachapi runakunata Jesuspa juzgananpaq. Noqanchisqa manan manchakunanchischu chay p’unchaytaqa. Diospa ladollanpi kasun chayqa, paymi “runakunaq mana aypay atisqan atiyta” qowasun. Chay atiywanmi “runaq Churinpa ñaupanpi sayasqa kasunchis” (2 Cor. 4:7; Luc. 21:36). Chhaynaqa janaq pachamanña ripusun, kay pachapiña tiyasun chaypas allin yuyaywan qhawarisun Jesuspa willasqan rijch’anachiykunata. Chayta ruwasun chayqa allinpaqmi qhawariwasun kamaqninchis Jehová Diosqa, sutinchistapas wiñay “kausay libronpin” churanqa (Dan. 12:1; Apo. 3:5).