¿Imatan ruwanayki jamuq tiempopi allinta kausanaykipaq?

QALLARIY

Yachamusqanchis jina askha runakunan ninku: “Allinta kausanapaqqa watuqkunapin confiananchis, profesionniyoq qolqeyoqmi kananchis, otaq allin runan kananchis”, nispa. Ichaqa chaykunaqa manan yanapawasunmanchu jamuq tiempopi allinta kausananchispaqqa. Chhaynaqa, ¿imataq yanapawasunman? Chaymanta kunan yachasun.

ALLIN YACHAQWAN YANAPACHIKUSUN

Imatapas decidinanchispaqqa chaymanta yachaqtan tapukunanchis ¿riki? Chay jinaqa jamuq tiempopi allinta kausananchispaqqa pichus chaymanta allinta yachan paytan tapukunanchis. Allin yachayniyoqpa rimasqanqa Bibliapin kashan, payqa 3.500 watakuna ñaupaqtaraqmi Bibliataqa qelqachiyta qallariran.

¿Imanaqtinmi Bibliapi confiananchis? Bibliata qelqachiqqa llapanchismantapas aswan yachayniyoqpunin. Payqa karanñan manaraq imapas kashaqtin, chaymi payta “Yuyaq runa” nispa nikun (Daniel 7:9; Salmos 90:2). Paymi janaq pachata kamaran, paymi cheqaq Diosqa, paymi kay pachatapas ruwaran (Isaías 45:18). Pay kikinmi niwanchis sutinqa Jehová kasqanta (Salmos 83:18, TNM).

Bibliapiqa willanmi Jehová Diosqa llapa runakunata igual-llata qhawasqanta. Chaymantapas Bibliapi kaq yachachikuykunaqa llapa runakunatan yanapan, askha simikunapin t’ijrasqa kashan, chaymi yaqa llapa runakuna Bibliayoq kashanku. * Chaymi runakunaqa rimasqanku simipi leeyta atinku, yachasqankuman jinataq kausayta atinku. Bibliapipunin nin:

‘Diosqa lliutapas igual-llatan rikun, payta manchakuspa allin kaqta ruwaq runakunataqa may nacionmantaña kanku chaypas sumaqtan chaskin’ (HECHOS 10:34, 35).

Imaynan munakuq taytaqa wawankunata sumaqta yanapan chhaynatan Jehová Diospas Bibliawan yanapawanchis (2 Timoteo 3:16). Diosninchistaq kamawaranchis chayqa, payqa allintan yachan imatachus ruwananchis allinta kausananchispaq chayta, Bibliapitaqmi chayta sut’inta willawanchis.

BIBLIAPIQA CONFIASUNMANMI

Bibliaqa iskay waranqa wata ñaupaqtaraqmi willaranña kay tiempopi imakunachus pasananta, imaynachus runakunapas kanankuta, chayraykun Bibliaq nisqanpiqa confiasunman.

¿IMAN KAY TIEMPOPI PASANAN KARAN?

“Juj llaqtataq juj llaqta contra jatarinqa. Kallanqataqmi jatun terremotokunapas, kayneqpi chayneqpitaq kanqa yarqaykuna mast’arikuq millay onqoykuna ima” (LUCAS 21:10, 11).

¿IMAYNAN RUNAKUNA KANANKU KARAN?

“Tukukuy p’unchaykunataqa manchakuy sinchi sasa tiempokunan chayamunqa. Runakunan kanqa paykuna kikinkuta munakuqkuna, qolqe sonqokuna, alabakuqkuna, jujkunata pisichaspa uma oqariqkuna, millayta k’amiqkuna, tayta-mamankuta mana kasukuqkuna, mana agradecekuqkuna, jujkunapaq mana junt’aq kaqkuna, runamasinkuta mana munakuqkuna, mana uyakuq k’ullukuna, yanqa tumpaqkuna, cuerponkuta mana kamachiqkuna, sinchi k’araq sonqokuna, allin kaqta mana munakuqkuna, traicionerokuna, tercokuna, sinchita jatunchakuqkuna, Diosta munakunankumantaqa aycha kusichiyllapi puriyta munaqkuna” (2 TIMOTEO 3:1-4).

Bibliapi nisqanqa llapallanmi junt’akushan, chayta rikuspaqa astawanraqchá Diospiqa confianki. Hong Kong llaqtamanta Leung sutiyoq runan niran: “Bibliapi kaq profeciakunaqa ñaupaq tiempopiraqmi qelqakuran, noqanchis jina runallaqa manan yachanmanchu imachus qhepaman pasanantaqa. Chhaynaqa noqanchismanta aswan yachayniyoqpunichá Bibliataqa qelqachiran”, nispa.

Bibliapi kaq profeciakunaqa askhañan junt’akushan. * Chaypin yachanchis Bibliaqa Diosmantapuni jamusqanta. Jehová Diosmi nin: ‘Diosmi kani, manataqmi pipas noqa jinaqa kanchu. Qhepaman imachus kanantan ñaupaqmantaña willani’, nispa (Isaías 46:9, 10). Chhaynaqa confiawaqmi prometesqanta Dios junt’ananpiqa.

BIBLIAQA YANAPASUNKIN JAMUQ TIEMPOPIPAS ALLIN KANAYKIPAQ

Sichus Bibliaq nisqanman jina kausanki chayqa, allinniykipaqmi kanqa. Wakinmanta yachasun.

QOLQEMANTA LLANK’ANAMANTAWAN

“Aswan allinmi juj chikanta samariy nishuta llank’aymantaqa, chayqa wayrata jap’iy jinan” (ECLESIASTÉS 4:6, TNM).

FAMILIAMANTA

“Sapankaykichis esposaykichista qankuna kikiykichista jinapuni munakuychis; jinallataq qankunapas, esposakuna, qosaykichista anchata respetaychis” (EFESIOS 5:33).

JUJKUNAWAN KAUSAYMANTA

“Ama k’araqtaqa phiñakuychu, amapuni renegaychu, chayqa mana allinkunallatan paqarichin” (SALMOS 37:8).

Bibliaq nisqanman jina kausanki chayqa, kunanpas jamuq tiempopipas kusisqan kausanki. Bibliapin Diosqa prometewanchis jamuq tiempopi imayna kausananchista.

THAJPIN JUJKUNAWAN KAUSASUN

“Sumaq thaj nisqataq tiyakunqaku” (SALMOS 37:11).

WASIYOQ MIJUNAYOQ IMA KASUN

“Wasitan wasichanqaku, jinaspan chaykunapi tiyanqaku, uvastan plantanqaku, chaypa rurusqantan mijunqaku” (ISAÍAS 65:21).

MANAN PIPAS ONQONQACHU NITAQ WAÑUNQACHU

“Manan wañuypas kanqañachu, manañataqmi llakikuypas, waqaypas, ni nanaypas kanqañachu” (APOCALIPSIS 21:4).

¿Imatan ruwanayki chaypi kanaykipaq? Chaymanta qatimuqpi yachasun.

^ párr. 6 Sichus yachayta munanki imaynatachus Bibliata t’ijrakuran, jayk’a simipichus kashasqantapas chayqa, jaykuy www.ps8318.com nisqapi BIBLIAMANTA YACHACHIKUYKUNA > HISTORIAWAN BIBLIAWAN nisqaman.

^ párr. 16 Astawan yachayta munanki Bibliapi kaq profeciakunamanta chayqa, La Biblia... ¿la Palabra de Dios, o palabra del hombre? nisqa libropi 9 capitulota leey. Chaytaqa Jehová Diospa testigonkunan ruwanku. Jaykuy www.ps8318.com nisqapi BIBLIOTECA > OTRAS PUBLICACIONES nisqaman.