1, 2. ¿Imaynatan wakin runakuna qhawarinku jujkunaq llank’ayninkuta?

KAY tiempopi runakunaqa imapichus llank’asqankuman jinan qhawarisqa kanku, allin llank’anayoq runakunaqa allin qhawarisqan kanku. Chaymi wakin llaqtakunapiqa pitapas chayllaraq reqsispaqa tapunku: “¿Imapin llank’anki?”, nispa.

² Bibliapas willanmi Jesuspa wakin discipulonkuna imapi llank’asqankuta, willanmi Mateo “impuesto cobraq” kasqanmanta, Simón “qarakuna llamp’uyachiq” kasqanmanta, Lucaspas “médico” kasqanmanta (Mat. 10:3; Hech. 10:6; Col. 4:14). Chaymantapas willanmi ñaupa tiempokunapi Diosta serviqkuna ima puestoyoq kasqankumanta. Willanmi David rey kasqanmanta, Elías profeta kasqanmanta, Pablopas apóstol kasqanmanta. Chay runakunaqa ancha chaniyoqpaqmi qhawariranku chay privilegio chaskisqankuta. Noqanchispas chhaynatan qhawarinanchis Diospa llaqtanpi ima privilegio chaskisqanchistapas.

3. ¿Imaraykun kuraq umallikuna yachachinanku waynakunata? (26 paginapi fotota qhaway.)

 ³ Cristianokunaqa ancha chaninpaqmi qhawarinchis ima privilegio chaskisqanchistapas. ¡Maytan munasunman tukuy tiempo chaypi llank’ayta! Ichaqa machuyapusqanchisman jinan manaña wayna-sipas jinañachu imatapas ruwanchis, pisi-pisimantan kallpanchispas pisiyapun (Prov. 20:29; Ecl. 1:4). Chaymantapas kay tiempopiqa astawanmi Diospa llaqtan wiñashan, imaymana mosoq aparatokuna rijurimusqanwantaq yanapachikushanchis Diospa siminta llapa runakunaman willamunanchispaq. Chay aparatokunatan wakin kuraq iñiqmasikuna sasachakunku manejanankupaq (Luc. 5:39). Chaymi kuraq umallikunaqa waynakunata yachachinanku iñiq t’aqapi ruwaykunata (leey Salmo 71:18).

4. ¿Imaraykun wakin umallikunapaq sasa kanman jujkunata yachachiy? (Qhaway “ ¿Imaraykun sasa kanman jujkunata yachachiy?” nisqa recuadrota.)

⁴ Kuraq umallikunaqa ancha kusisqan Diospa llaqtanpi llank’anku, chaymi sasa kanman chay llank’anankuta jujkunaman saqey otaq yachachiy. Wakinqa yaqapaschá llakikunku chay privilegiota saqepunankumanta. Chaymi sonqonkupi ninkuman: “Waynakunaqa manan paykunallamantaqa atinkumanchu”, otaq “manan tiempoy aypawanchu yachachinaypaq”, nispa. Chaymi waynakunapas pacienciawan suyakunanku ima privilegiotapas.

5. ¿Ima tapuykunatan kay estudiopi kutichisun?

⁵ ¿Imaraykun kuraq umallikuna yachachinanku waynakunata? ¿Imaynatan chayta ruwankuman? (2 Tim. 2:2.) ¿Imaynatan waynakuna qhawarinanku kuraq iñiqmasikunaq yachachisqanta? Chaykunamantan kay estudiopi yachasun, ichaqa ñaupaqta yachasun rey David churinta imayna yanapasqanmanta.

6. a) ¿Imatan rey David ruwayta munaran? b) ¿Imatan Jehová Dios Natanwan willachiran?

⁶ Davidqa unay tiempon qatiykachasqa tarikuran, chaymi payqa juj-juj ladokunapi ayqekuspa tiyaran. Ichaqa qhepamanmi rey kapuran jinaspa munay wasipi tiyapuran. Chaymi profeta Natanta niran: “Qhawariy, noqaqa cedro tablamanta ruwasqa wasipin tiyani, Señor Diospa rimanakuynin arcataq ichaqa karpallapi kashan”, nispa. Davidqa Jehová Diosta adoranapaqmi munay wasita ruwayta munaran, chaymi Natanqa niran: “Qanwanmi Diosqa kashan, ima munasqaykita ruway”, nispa. Jehová Diosmi ichaqa mana munaranchu chay wasita David jatarichinanta. Chaymi Natanwan willachiran: “Qanqa manan tiyanaypaq wasita ruwapuwankimanchu”, churiykin ‘wasitaqa ruwapuwanqa’ nispa. Diosqa munakuranmi Davidta yanaparanmi tukuy imapipas, ichaqa manan munaranchu wasinta jatarichinanta. ¿Imatan David ruwaran chayta yachaspa? (1 Crón. 17:1-4, 8, 11, 12; 29:1.)

7. ¿Imatan David ruwaran churin Salomón adorana wasita ruwananta yachaspa?

⁷ Sonqonpiqa llakikuranchá. Chaywanpas payqa manan jatunchakunanpaqchu chay wasitaqa ruwayta munaran, chaymi tukuy atisqanpi churinta yanaparan chay wasita ruwananpaq. Chaypaqmi churaran  maderata, fierrota, qolqeta, qorita ima. Chay qhepamantaq churinta niran: “Churilláy, Diosninchis Señor Dios qanwan kachun. Paymi nisqanman jina kallpachasunki paypaq wasita ruwanaykipaq”, nispa. Qhepakunamanmi chay wasita suticharanku: “Salomonpa templon”, nispa (1 Crón. 22:11, 14-16).

8. ¿Imatan David piensanman karan churinmanta? Ichaqa, ¿imatan David ruwaran?

⁸ Leey 1 Crónicas 22:5. Davidpa churinqa sinchi waynallaraqmi karan, ancha munay wasitataqmi Davidqa ruwayta munaran. Chaywanpas payqa manan niranchu: “Churiyqa mana experienciayoqmi, payqa manan chay wasitaqa sayarichiyta atinmanchu”, nispaqa. Davidqa Jehová Diospin confiaran, yacharanmi Diospa yanapayninwan chay wasita ruway atisqanta. Chaymi payqa tukuy atisqanpi churinta yanaparan.

9. ¿Imaynan sientekunku kuraq umallikuna waynakunata yachachispa? Juj ejemplota willay.

⁹ Kay tiempopiqa Diospaq llank’aymi aswan importante. Chaymi kuraq umallikunaqa mana llakikunankuchu wayna iñiqmasikunaman ima privilegionkutapas saqeytaqa. Jinaspapas Diospa llaqtanpi ima llank’aytapas waynakunaman yachachiyqa allinpaqmi kanqa. Chayta entiendenapaq rimasun juj tayta wawanman carro manejay yachachisqanmanta. Wawaqa juch’uyllaraq kashaspaqa qhawallanraqmi papanpa imayna manejasqanta. Chay taytaqa wawanpa wiñasqanman jinan yachachin imayna manejayta. Kuraqña kaspaqa brevetentan orqon jinaspa manejayta qallarin. Chaywanpas taytaqa aconsejashallanmi wawanta. Chaymantaqa payllañan manejan, mayninqa papantan carropi apan paseachinanpaq. ¿Phiñakunqachu  chay tayta wawan manejay yachasqanmanta? Manapunichá. Chhaynatan kuraq umallikunapas kusikunku yachachisqanku waynakuna Diospa llaqtanpi allinta llank’asqankumanta.

10. ¿Imaynatan Moisés qhawariran privilegiokuna chaskiyta?

¹⁰ Noqanchispas manan envidiakunanchischu jujkuna ima privilegiotapas chaskisqankumantaqa. Chaytan yachanchis Moisesmanta. Payqa manan envidiakuranchu wakin israelitakuna profeta kasqankumanta (leey Números 11:24-29). Josué ichaqa paykunata jark’ayta munaran, chaymi Moisés niran: “¿Noqamantachu sienteshanki? ¡Allinchá kanman llapan runakunamanpas Señor Diosqa atiyninta qonman, jinaspa llapanku profeta kankuman!”, nispa. Moisesqa yacharanmi tukuy imapas Jehová Diospa yanapayninwan ruwakusqanta. Chaymi mana payllachu imatapas ruwayta munaran nitaqmi payllachu jatunchasqa kayta munaran. Noqanchispas kusikunanchismi jujkuna ima privilegiotapas chaskiqtinku.

11. ¿Ima niranmi Peter juj iñiqmasikuna Diospa llaqtanpi llank’anankupaq yachachisqa kasqankumanta?

¹¹ Askha iñiqmasikunan unaypuni Diosta serviranku tukuy sonqonkuwan, jinaspapas askha waynakunatan yanaparanku Diospa llaqtanpi llank’aykunata aparinankupaq. Yachasun Peter iñiqmasimanta, payqa 74 watan tukuy tiemponwan Diosta serviran, 35 watataqmi Europa ladopi kaq sucursalpi llank’aran predicacionta qhawariq t’aqapi. Ichaqa kuraqña kapusqanraykun niranku Paulta yachachinanpaq, qhepamantaq Paul qhepakuran Peterpa llank’ananpi. Ichaqa, ¿ima niranmi Peter chaymanta? Paymi nin: “Ancha kusisqan kashani Diospa llaqtanpi jatun llank’aykunata ruwanankupaq juj iñiqmasikuna yachachisqa kasqankumanta, paykunaqa allintan llank’ashanku”, nispa.

12. ¿Imatan yachanchis Roboampa ruwasqanmanta?

¹² Salomonpa wañupusqan qhepamanmi churin Roboam rey kapuran. Juj kutinmi imayna kamachikunanpaq aconsejanankuta munaspa, kuraq umallikunata tapukuran jinallataq waynamasinkunata. Ichaqa waynamasinkunaq aconsejasqantan kasukuran, jinan imaymana sasachakuykunapi rikukuran (2 Crón. 10:6-11, 19). ¿Imatan chaymanta yachanchis?  Iñiq t’aqapi imatapas ruwanapaqqa allin experienciayoq kuraq runakunaq consejontan maskhananchis. Chhaynaqa, ¿kuraq iñiqmasikunaq ruwasqanta jinachu tukuy imatapas ruwananchis? Manan. Chaywanpas respetowanmi qhawarinanchis imaynatan imatapas ruwashanku chayta, manataqmi aswan yachayniyoqman tukuspachu piensasqanchista aswan allinpaq qhawarinanchis.

13. ¿Imatan ruwananku wayna iñiqmasikuna kuraq umallikunawan llank’aspa?

¹³ Askha wayna iñiqmasikunan Diospa llaqtanpi wakin llank’aykunapi umallishanku, chaypin allin experienciayoq kuraq umallikunaq llank’ashasqankuta qhawarishanku. Umalliña kanku chaypas, wayna iñiqmasikunaqa chay kuraq umallikunaq yanapaynintan mañakunanku. Yuyarisun Paul iñiqmasita, paymi nin: “Sapa kutillan Peter iñiqmasita tapukuq kani, kallpacharanin juj waynakunatapas chayta ruwanankupaq”, nispa.

14. ¿Imatan yachanchis Pablowan Timoteowan kuska llank’asqankumanta?

¹⁴ Timoteoqa Pablomanta aswan waynallaraqmi karan, chaywanpas unay tiempon kuska llank’aranku (leey Filipenses 2:20-22). Juj kutinmi Corinto llaqtapi iñiq t’aqata Pablo niran: “Ancha munasqa waway Timoteota kachamushaykichis, payqa junt’aq sonqowanmi Señorta servishan, paymi yuyarichisunkichis Cristo Jesusta serviypi imaynatachus imatapas ruwani chayta; arí, imaynatachus lliupi llapa iñiq t’aqakunaman yachachimushani chaytan yuyarichisunkichis”, nispa (1 Cor. 4:17). Chaypi nisqan jina, Pablowan Timoteowanqa allintan llank’aranku, kusatataqmi yanapanakuranku. Pabloqa tiempotan t’aqaq ‘Cristo Jesusta serviypi imaynatachus imatapas ruwan chayta’ Timoteoman yachachinanpaq. Timoteopas makillan uyariq Pabloq yachachisqanta. Chaymi Pabloqa Timoteota munakuran confiarantaqmi paypi, paytan kacharan Corinto llaqtapi iñiqkunata kallpachananpaq. Umallikunapas Pablo jinan waynakunata yanapananku qhepaman iñiq t’aqapi allinta umallinankupaq.

15. ¿Imaynatan Romanos 12:3-5 texto yanapawasunman ima cambiokunapas afectawaqtinchis?

¹⁵ Kay tiempopin Diospa llaqtanqa astawan wiñashan, chaymi mayninqa kanqapuni ima cambiokunapas. Chay cambiokunan mayninqa noqanchistapas afectawasun. ¿Iman yanapawasun chhaynapi tarikuqtinchis? Noqallanchispi piensananchismantaqa, aswanpas Diospa gobiernonpin astawanqa piensananchis, k’umuykukuq runataqmi kananchis. Chayta ruwasun chayqa juj familia jinan kausasunchis. Roma llaqtapi cristianokunatan Pablo niran: “Ama sinchi allinpas kawaqchis jinaqa qhawarikuychischu”, nispa. Chay qhepamanmi niran cuerpoq partenkuna jina sapanka iñiqmasikuna juj llank’anayoq kasqankuta (Rom. 12:3-5).

16. ¿Imatan sapanka cristianokuna ruwananchis iñiq t’aqapi juj jinalla kausananchispaq?

¹⁶ Llapallanchismi Diospa gobiernonrayku llank’ashanchis, tukuy atisqanchispitaqmi yanapakuyta munanchis. Chaymi kuraq iñiqmasikuna waynakunata yachachinanku,  waynakunataq ima privilegiotapas chaskispaqa, k’umuykukuq sonqowan respetowan ima imatapas ruwananku. Casarasqa iñiqmasikunapas anchatan esposankuta agradecekunku cambiokuna kaqtin yanapasqankumanta. Chayta ruwaspan esposakunaqa Priscilata qatikunku, paypas qosantan yanaparan tukuy ima ruwasqanpi (Hech. 18:2).

17. ¿Imata ruwanankupaqmi Jesús discipulonkunata yachachiran?

¹⁷ Jesusqa yacharanmi kay pachapi pisi tiempolla kananta, chaymi discipulonkunata yachachiran paypa llank’ana saqesqanta ruwashanallankupaq. Yacharanña pantaq runakuna kasqankuta chaypas, confiaranmi allin willakuykunata pachantinpi willay atisqankuta (Juan 14:12). Jesusqa allintan discipulonkunata yachachiran may tarikusqankupipas predicanankupaq, chaymi paykunaqa Jesuspa kamachisqanta allinta junt’aranku (Col. 1: 23).

18. ¿Imatan jamuq tiempopi chaskikullasuntaq? Ichaqa, ¿imatan kunan ruwashananchis?

¹⁸ Jesustaqa Jehová Diosmi wañupusqanmanta kausarichiran, chay qhepamantaq juj llank’anakunata qoran. Jinaspapas paytan churaran “llapa gobiernokunamanta, autoridadkunamanta, atiyniyoq kaqkunamanta” aswan atiyniyoq kananpaq (Efes. 1:19-21). Sichus noqanchispas junt’aq sonqollapuni Diosta servispa wañupusun chayqa kausarichisqan kasunchis, jinaspan mosoq pachapi ancha kusikunapaq llank’ayta chaskikusun. Ichaqa chay p’unchay chayamunankama kallpachakushallasun predicananchispaq, runakunatapas yanapashallasun Jesuspa qatikuqninkuna kanankupaq. Chhaynapin kuraqña waynaña kaspapas, ‘Señorpa llank’ananpi tukuy tiempo imaymanata ruwashasun’ (1 Cor. 15:58).