1. ¿Imaynatan qallariymantapacha Diosta serviqkuna llank’aranku?

JEHOVÁ DIOSPAS Jesuspas qallariymantapachan juj nisqalla llank’aranku. Diosqa Jesustan primerta kamaran, jinamantaq Jesusqa ‘paywan llank’aran’ (Prov. 8:30). Paykuna jinan Diosta serviqkunapas tukuy tiempo kuska llank’aranku Diospa nisqanta ruwaspa. Ejemplopaq, Noewan familianwanmi kuska arcata ruwaranku. Askha watakuna qhepamantaq Israel runakuna Dios yupaychana karpata kuska ruwaranku, juj ladoman astakuspataq kuska paskaranku jinamantaq q’epiranku. Templopi Diosta adoraspataq Israel runakunaqa llapallanku takiranku tocarankupas. Lliu chaykunatan Diosta serviqkunaqa ruwaranku juj nisqalla kasqankurayku (Gén. 6:14-16, 22; Núm. 4:4-32; 1 Crón. 25:1-8).

2. a) ¿Imaynan ñaupa cristianokuna karanku? b) ¿Imamantan kay estudiopi yachasunchis?

² Ñaupa cristianokunapas kuskan llank’aqku. Apóstol Pablon niran cristianokunaqa juj-juj ruwaykunata yachasqankuta, Diospa llaqtanpipas imaymana llank’anayoq kasqankuta.  Chaywanpas juj nisqallan kasharanku Jesucristota qatikusqankurayku. Chaymi Pabloqa juj cuerpowan compararan, cuerpoqa askha miembrokunayoqmi chaywanpas miembronkunaqa juj nisqallan llank’anku (leey 1 Corintios 12:4-6, 12). Noqanchisri, ¿imaynatan juj nisqalla predicacionpi, iñiq t’aqapi, familiapipas kasunman? Kay estudiopin chaykunamanta yachasun.

3. ¿Imatan apóstol Juan rikuran?

³ Jehová Diosmi apóstol Juanman rikuchiran qanchis angelkuna trompeta tocashaqta. Pisqa kaq ángel tocaqtintaq Juan rikuran “janaq pachamanta kay pachaman urmaykamuq ch’askata”. Chay ‘ch’askataq’ “chinkay-chinkay” t’oqota kichariran. Jinan chay ukhumanta jatun hornomanta jina q’osñi lloqsimuran, chay q’osñimantataq langostakuna lloqsimuran. Ichaqa chay langostakunaqa manan q’omer kaqkunatachu nitaq sach’akunatachu mijuranku, aswanpas “Diospa sellonwan mat’inkupi” mana marcasqa runakunallatan muchuchiranku (Apo. 9:1-4). Apóstol Juanqa yacharanmi langostakunaqa runakunata muchuchiy atisqankuta, imaynan Moisespa tiemponpi Egipto nacionta ruwaranku jinata (Éx. 10:12-15). Chay langostakunaqa ajllasqa cristianokunatan representan, paykunan pantasqa religionkunaman willashanku chinkachisqa kanankuta. Kay pachapi tiyanankupaq suyakuyniyoq millonninpi cristianokunapas ajllasqa cristianokunatan chay willaypi yanapashanku. Juj nisqalla llank’aspankun askha runakunata pantasqa religionkunamanta lloqsipunankupaq, Saqraq kamachisqanmantapas librakunankupaq yanapashanku.

4. a) ¿Ima jatun llank’aytan cristianokuna junt’ananchis? b) ¿Imatan ruwananchis chay llank’ayta junt’anapaq?

⁴ Jehová Diosmi jatun llank’ayta qowanchis, chay llank’ayqa mundontinpi llapa runakunaman Diospa gobiernonmanta willaymi (Mat. 24:14; 28:19, 20). Wakin runakunaqa ch’akiymantapas wañushankuman jinaraqmi Diosmanta yachayta munashanku, chaymi Bibliamanta yachachispa ‘kausay unuta’ ujanankupaq invitashanchis (Apo. 22:17). Sichus chay jatun llank’anata junt’ayta munanchis chayqa, juj nisqallan llank’ana (Efes. 4:16).

5, 6. ¿Ima ruwaykunan Testigokunata yanapawanchis juj nisqalla predicanapaq?

⁵ Diosmanta allin willakuykunata willanapaqqa allin organizasqan kananchis. Chaypaqmi juñunakuykunapi yachachikuykuna yanapawanchis. Jujninmi predicanapaq juñunakuy. Chay yachachikuykunan yanapawanchis Diosmanta allin willakuykunata lliu runakunaman willananchispaq, Bibliamanta orqosqa qelqakunatapas munachinanchispaq.  Chaymantapas mayninpin niwanchis karu llaqtakunaman rispa predicananchispaq, juj qelqata otaq invitacionkunata rakimunanchispaq. Chayta ruwaspan millonninpi iñiqmasikunawan juj nisqalla llank’ashanchis, pachantinpi runakunamantaq kaq willakuyllata willashanchis. Jinaspapas angelkunawanmi llank’ashanchis, paykunan yanapawanchis predicananchispaq (Apo. 14:6).

⁶ Anchatachá kusikunchis predicacionmanta sumaq noticiakuna Anuario libronchispi lloqsimuqtin. Asambleakunapas yanapawanchismi juj nisqalla kanapaq. Sapa watanmi manaraq chay asamblea qallarishaqtin juj nisqalla llapa runakunata invitamunchis. Chay asambleakunapin llapanchis uyarinchis kaq yachachikuyllata. Chaypi discursokuna, demostracionkuna, actuacionkunan yanapawanchis Jehová Diosta tukuy sonqowan servinanchispaq. Chaymantapas Jesuspa wañupusqanta sapa watan yuyariymi jujllachawanchis, chay juñunakuytan aparinchis judiokunaq 14 nisán killapi (1 Cor. 11:23-26). Manaraq chay p’unchay chayamushaqtinmi, llapa runakunata invitamunchis chay sumaq juñunakuyman jamunankupaq. Chaymantataq llapanchis juñukunchis inti jaykusqan qhepaman. Chayta ruwaspan kasukushanchis Jesuspa kamachiwasqanchista, Jehová Dios noqanchisrayku ruwasqanmantataq agradecido kasqanchista rikuchishanchis.

7. ¿Imatan ruwanchis juj nisqalla llank’aspa?

⁷ Ch’ulla langostaqa manan imatapas ruwayta atinmanchu. Noqanchispas sapallanchisqa manan atisunmanchu mundontinpi runakunaman predicayta. Imaynan langostakunapas juj nisqalla llank’anku, chhaynatan noqanchispas juj nisqalla llank’anchis. Chayraykun millonninpi runakunaman Jehová Diosmanta yachachinchis payta alabanankupaq respetanankupaqpas.

8, 9. a) ¿Ima ejemplotan Pablo churaran iñiq t’aqa juj nisqalla kanapaq? b) ¿Imatan ruwasunman iñiq t’aqa juj nisqalla kananpaq?

⁸ Apóstol Pablon Éfeso llaqtamanta cristianokunaman willaran iñiq t’aqa imayna organizasqa kasqanta, chaymi paykunaman juj consejota qoran: ‘Tukuy imaymanapi [...] wiñaychis’, nispa (leey Efesios 4:15, 16). Payqa runaq cuerponwanmi iñiq t’aqata compararan, Jesustataq chay cuerpoq umanwan. Chay ejemplotan churaran cristianokuna juj nisqalla kanankupaq, Jesustapas qatikunankupaq. Pablon niran cuerpoq miembronkuna allin k’askanasqa kaspaqa juj nisqalla llank’anankuta. Chhaynallataqmi iñiq t’aqawanpas, wayna-sipasña, kuraqña, qhaliña onqosqaña kaspapas yanapakusunmanmi iñiq t’aqapi juj nisqalla kananchispaq. ¿Imatan ruwasunman?

⁹ Jesusmi umallikunata iñiq t’aqapi churan pusariwananchispaq. Paymi munan umallikunata respetananchista, kasukunanchistapas (Heb. 13:7, 17). Mayninpin ichaqa sasa kanman paykunata kasukuy. Chaymi Jehová Diospa santo espiritunta mañakushanallanchis kasukuq kananchispaq. Sichus humilde kasun umallikunawantaq  kuska llank’asun chayqa, iñiq t’aqapin allinta yanapakusun. Jinaspapas llapanchismi juj nisqalla kasunchis, sapa p’unchaytaq aswan-aswanta munanakusunchis.

10. ¿Imaynatan yanapakuq qharikuna juj nisqalla iñiq t’aqa kananpaq yanapakunku? (18 paginapi fotota qhaway.)

¹⁰ Yanapakuq qharikunapas iñiq t’aqa juj nisqalla kananpaqmi yanapakunku. Paykunan umallikunata tukuy sonqowan yanapanku, chaymi agradecido kashanchis. ¿Imakunatan ruwanku? Qhawashallankun predicanapaq qelqanchiskuna kashanchus icha manachus chayta, jinaspapas sumaqtan chaskinku juñunakuna wasiman jamuqkunata. Chaymantapas juñunakuna wasitan allichanku pichankupas. Yanapakuq qharikunata yanapasun chayqa, juj nisqallan iñiq t’aqa kanqa; chhaynapin allin organizasqa Jehová Diosta servisun (tupachiy Hechos 6:3-6 textowan).

11. ¿Imatan waynakuna ruwankuman juj nisqalla iñiq t’aqa kananpaq?

¹¹ Wakin umallikunaqa askha watakunañan iñiq t’aqapi sinchita llank’ashanku. Kuraq kasqankuraykun ichaqa manaña wayna jinachu imatapas ruwanku. Chaymi waynakuna paykunata yanapananku, kuraq umallikunataq iñiq t’aqapi ruwaykunata paykunaman yachachinanku. Chhaynapin waynakunaqa astawan llank’aysikunqaku. Sichus yanapakuq qharikuna llank’anankuta allinta junt’anqaku chayqa, qhepamanmi umalli kankuman (1 Tim. 3:1, 10). Wakin wayna umallikunaqa iñiyninkupi llank’ayninkupipas ñauparisqankuraykun watukuq umalli kapuranku, chhaynapin aswan askha iñiqmasikunata yanapashanku. Biblian niranña: “Llaqtaykiqa kikillankumantan qatikusunki. Ch’uyallaña waynaykikunaqa pacha illarimuy chhulla jinan kanku”, nispa. Llapallanchismi agradecesqa kashanchis wayna iñiqmasikuna yanapakusqankumanta (Salmo 110:3, NM; leey Eclesiastés 12:1).

12, 13. ¿Imatan familiakuna ruwananku juj nisqalla kanankupaq?

¹² ¿Imatan familiakuna ruwananku juj nisqalla kanankupaq? Sapa semananmi familiantin Diosta adorananku. Sichus tayta-mamakuna llapa wawankuwan Jehová Diosmanta yachanqaku chayqa, aswan-aswantan munanakunqaku. Predicanankupaq practicaspataq allin yachachiq kanqaku. Sichus familiakuna kuska predicanqaku Diostapas munakunqaku chayqa, astawanmi juj nisqalla kausanqaku.

¹³ ¿Imatan qosapas esposapas ruwananku juj nisqalla kanankupaq? Iskayninkun tukuy sonqowan Jehová Diosta servinanku, chhaynapin kusisqa aswan jujllachasqa kanqaku. Chaymantapas  munanakunankun, sumaq simikunawantaq rimanakunanku imaynan Abraham Sarawan, Isaac Rebecawan, Elcanapas Anawan ruwaranku jinata (Gén. 26:8; 1 Sam. 1:5, 8; 1 Ped. 3:5, 6). Chhaynapin juj nisqalla kanqaku, Dioswanpas amigontin kanqaku (leey Eclesiastés 4:12).

14. ¿Imatan ruwanan mana iñiq parejayoq Testigo casado kausayninkupi juj nisqalla kanankupaq?

¹⁴ Jehová Diosqa sut’itan niwanchis mana iñiq runawanqa amapuni casarakunachu kasqanta (2 Cor. 6:14). Chaywanpas wakin iñiqmasinchiskunaqa mana iñiqwanmi casarasqa kashanku. ¿Imaynapi? Wakinmi casarakusqanku qhepamanña Testigo kapuranku, parejantaq ichaqa mana munaranchu Testigo kayta. Wakintaq Testigo pura casarakuranku, tiempoq pasasqanmanmi ichaqa parejan manaña Testigochu kapuran. Chhaynapi tarikuqkunaqa sasaña kaqtinpas Bibliaq kamachikuyninkunatan kasukunanku. Chaymi pasaran Mary cristianawan. Davidwan casarakuspaqa iskayninkun Testigo karanku, tiempoq pasasqanmanmi ichaqa qosan manaña juñunakuykunaman riranchu. Chaywanpas Maryqa qosantan respetashallaran, sumaqtataq qhawarishallaran. Sapallanmi soqtantin wawankunaman Jehová Diosmanta yachachiran, manataq juñunakuykunamanpas, asambleakunamanpas faltakuqchu. Wawankunapas wiñaspankuqa ripurankun, chaymi Marypaqqa sasa karan sapallan Jehová Dios serviy. Ichaqa junt’aq sonqollapunin karan. Mayninpin revistakunata mesapatakunapi saqeq imaynallapipas qosan leenanpaq, chaymi juj p’unchay leeyta qallariran tiempowantaq juñunakuykunaman yapamanta riran. Soqta watachayoq nietochansi juñunakuykunapi tiyanata Davidpaq t’aqapuqpuni, mana riqtintaq nietochanqa niq: “Abuelochay, punkutan qhawapayakamuni”, nispa. 25 watamantan Davidqa Jehová Diosman kutimpuran. Kunantaq Mary Davidwan juj nisqalla  Jehová Diosta servishanku, aswan kusisqataq kankupas.

15. ¿Imaynatan askha wata casarasqakuna yanapankuman chayllaraq casarasqakunata?

¹⁵ Saqran familiakunata t’aqanachiyta munashan, chaymi cristiano casarasqakunaqa juj nisqalla kananku. Askha watakunaña casarasqa kashanku chaypas, munanakushanallankun. Chaytan rikuchinanku rimayninkupi ruwayninkupipas, chhaynapin casado kausayninkupi kusisqa kanqaku. Chaymantapas chayllaraq casarasqakunatan yanapananku, yaqapaschá invitankuman familiantin Diosta adorasqankuman. Chhaynapin chayllaraq casarasqakuna rikunqaku askha watakuna pasaqtinpas casarasqakunaqa juj nisqalla kay atisqankuta, astawan munanakusqankutapas (Tito 2:3-7).

16, 17. ¿Ima bendicionkunatan chaskisun?

¹⁶ Jerusalén llaqtaman Israel runakuna rinankupaqqa kuskan preparakuqku, viajepitaq yanapanakuqku. Temploman chayaspataq juj nisqalla Jehová Diosta adoraqku alabaqkupas (Luc. 2:41-44). Noqanchispas preparakushanchismi mosoq pachaman jaykunapaq, chaymi juj nisqalla kananchis juj nisqallataq llank’ananchispas. ¿Imakunatawanmi ruwasunman iñiqmasikunawan kuska llank’ananchispaq?

¹⁷ Diosta mana reqsiq runakunaqa t’aqanasqan kausanku, imallamantapas juchatarishankun. Noqanchismi ichaqa Diospa yanapayninwan thajpi kausashanchis, Bibliapi yachachikuykunatataq entiendenchis. ¡May kusisqan kashanchis chaykunamanta! Noqanchisqa Diospa munasqanman jinan payta adorashanchis, profetakunaq nisqanman jinataq juj nisqalla ‘Diospa wasin orqoman wichashanchis’ (Is. 2:2-4; leey Miqueas 4:2-4). Sichus juj nisqalla kasun chayqa, askha bendicionkunatan chaskisun, jamuq tiempopitaq llapa runakunawan juj nisqalla Jehová Diosta adorasun.