Imaynan Diospas mana rikuna espíritu, chhaynan angelkunapas kanku, manan ‘tulluyoq aychayoqchu’ kanku. Kasukuq angelkunaqa janaq pachapin tiyanku Diospa qayllanpi (Lucas 24:39; Mateo 18:10; Juan 4:24).

Angelkunaqa mayninpin runa jina rijuriranku Diospa kamachisqanta junt’anankupaq, ruwanankuta tukuspataq espíritu cuerpoman cambiapuranku (Jueces 6:11-23; 13:15-20).

Angelkunaqa qhari jinan rijurinku, Bibliapas qharikunata jinan paykunata qhawarichin, ichaqa manan qharichu nitaq warmichu kanku. Manan casarakunkuchu nitaq wawayoqchu kanku. Chaymantapas angelkunaqa manan runachu (wawachu otaq kuraqchu) kanku, nitaq wañupuspachu cieloman ripuranku. Paykunataqa Dios kikinmi kamaran, chaymi Biblia nin ‘Diospa wawankuna’, nispa (Génesis 6:2; Salmos 148:2, 5).

Biblian willan runaq rimasqan ‘juj simikunamanta’ ‘angelkunaq rimayninmantapas’. Chaymi rikuchin angelkuna rimanakuy atisqankuta, juj idiomayoq kasqankutapas. Diosqa angelkunataña utilizaran runakunawan rimanakunanpaq chaypas, manan munanchu paykuna adorananchista nitaq paykunaman oración ruwananchistapas (1 Corintios 13:1; Apocalipsis 22:8, 9).

Chunkay-chunka waranqa angelkunan kashan, yaqapaschá waranqa-waranqa millón (Daniel 7:10; Apocalipsis 5:11). *

Angelkunaqa ancha atiyniyoqmi kanku, aswan kallpayoq inteligente ima. Jinaspapas angelkunaqa ratullan karuta riyta atinku, runakunaqa manan chayta entiendesunmanchu (Salmos 103:20; Daniel 9:20-23).

Angelkunaqa runamanta aswan inteligenteña kallpayoqña kanku chaypas, wakintaqa manan yachankuchu (Mateo 24:36; 1 Pedro 1:12).

Paykunapas noqanchis jina sentimientoyoqmi kanku, Diosmanmi rijch’akunku imayna sonqoyoq kasqankupi, libretaq kanku imata ajllakunankupaqpas. Chaymi noqanchis jina ajllakuyta atinku allin kaqtapas mana allin kaqtapas. Llakikunapaqmi, ichaqa wakinqa Dios contra ruwaytan decidiranku (Judas 6).