1. Eclesiastés 7:20 textopi nisqan jina, ¿ima nirqanmi rey Salomón?

 REY Salomonmi nirqan: “Kay pachapiqa manan allinkaqllatapuni ruwaq runaqa kanchu, mana jayk’aq juchallikuq chanin runapas manan kanchu”, nispa (Ecl. 7:20). Rey Salomonpa nisqanqa cheqaqpunin, llapa runakunapas juchasapa runakunan kanchis (1 Juan 1:8). Chayraykun necesitanchis Jehová Diospas runamasinchiskunapas perdonawananchista.

2. ¿Imaynan kanchis amigonchis perdonawaqtinchis?

² Mayninpiqa yaqapaschá mana reparakuspa juj allin amigonchista phiñachisunman. Ichaqa, paywan amigontin kashanallanchispaqqa sonqomantan perdonta mañakunanchis. Amigonchis perdonawaqtinchisqa kusisqan kanchis, ¿riki?

3. ¿Imakunamantan kay yachachikuypi yachasunchis?

³ Llapanchispas munanchismi Jehová Dioswan allin amigontin kayta, mayninpin ichaqa rimaspa ruwaspa ima pay contra juchallikunchis. Chhaynaña kaqtinpas, ¿imaynapin yachanchis Jehová Dios perdonawananchispaq listo kashasqanta? ¿Imaraykun Jehová Dios mana runakuna jinachu perdonawanchis? ¿Pikunallatan Jehová Dios perdonan? Chaykunamantan kay yachachikuypi yachasunchis.

4. ¿Imaynapin yachanchis Jehová Dios juchanchiskunamanta perdonawananchispaq listo kashasqanta?

⁴ Bibliaq nisqan jina Jehová Diosqa liston kashan juchanchiskunamanta perdonawananchispaq. Chayraykun Sinaí orqopi juj angelninwan Moisesman willachirqan: “¡Señor Diosmi kani! ¡Señor Diosmi kani! ¡Khuyapayakuq sumaq sonqo Diosmi kani! Manan usqhaylla phiñakuqchu kani, tukuy tiempo munakuqmi  cheqaqtaqmi kani. Waranqa miraykaman tukuy tiempo munakushallanipuni, juchallikusqatapas, mana kasukusqatapas, juchatapas pampachanin”, nispa (Éx. 34:6, 7). Jehová Diosqa munakuq khuyapayakuq Diosmi, chaymi listo kashan sonqomanta pesapakuqkunata perdonananpaq (Neh. 9:17; Sal. 86:15).

5. Salmos 103:13, 14 nisqan jina, ¿imata ruwananpaqmi Jehová Dios listo kashan allintapuni reqsiwasqanchisrayku?

⁵ Jehová Diosqa kamawaqninchis kasqanraykun allinta llapanchistapas reqsiwanchis, chayqa ancha kusikunapaqmi (Sal. 139:15-17). Jehová Diosqa yachanmi Adanpa mirayninmanta kasqanchisrayku juchayoq runakuna kasqanchista, yachallantaqmi imayna uywasqa kasqanchistapas. Chhaynata reqsiwasqanchisraykun Jehová Diosqa khuyapayawanchis, jinaspa listo kashan juchanchiskunamanta pesapakuqtinchis perdonawananchispaq (Sal. 78:39; leey Salmos 103:13, 14).

6. ¿Imatan Jehová Dios ruwarqan juchanchiskunamanta perdonayta munawasqanchisrayku?

⁶ Jehová Diosqa juchanchiskunamantan perdonayta munawanchis. Payqa yachanmi Adanpa juchallikusqanrayku noqanchispas juchayoq kasqanchista wañusqanchistapas (Rom. 5:12). Noqanchisqa manan juchamantapas wañuymantapas librakuyta atirqanchischu, nitaqmi jujkunatapas librayta atirqanchischu (Sal. 49:7-9). Jehová Diosmi ichaqa khuyapayawasqanchisrayku sapallan churinta kay pachaman kachamurqan noqanchisrayku wañunanpaq (Juan 3:16; Mat. 20:28; Rom. 5:19). Jesusqa llapa runakunaraykun wañurqan, chhaynapi paypa wañusqanpi iñisqanchisrayku juchanchiskunamanta perdonasqa kananchispaq (Heb. 2:9). ¿Imaynatan Jehová Dios qhawarinman karqan wawan Jesusta pisichaspa ñak’arichispa ima wañuchisqankuta rikuspa? Jehová Diospa sonqonqa maytachá chay p’unchayqa nanarqan. Chhaynaqa, ¿imaraykun Jehová Dios wawan Jesusta kay pachaman wañunanpaq kachamurqan? Anchata munakuwasqanchisraykun, juchanchiskunamantapas perdonayta munawasqanchisrayku.

7. ¿Pikunatan Jehová Dios khuyapayaspa perdonarqan?

⁷ Biblian willashan pikunatas Jehová Dios ñaupa tiempopi perdonarqan chayta (Efes. 4:32). Yachasun rey Manasesmanta. Payqa  Jehová Dios contran jatun juchakunata ruwarqan. Payqa runakunatan tanqarqan pantasqa dioskunata yupaychanankupaq. Chaymantapas wawankunatan pantasqa dioskunaman sacrificiopi jaywarqan, Jehová Diosta yupaychana wasipipas ruwasqan idolotan churarqan. Chaymi Bibliapipas nin: “Payqa Jehová Diospa cheqnisqan ruwaykunatan sinchitapuni ruwarqan, chhaynapi Diosta phiñachinanpaq”, nispa (2 Crón. 33:2-7). Tiempowanmi rey Manasesqa sonqomantapuni juchankunamanta pesapakurqan. Chaymi Jehová Diosqa payta perdonarqan, jinaspa jujmanta rey kapurqan (2 Crón. 33:12, 13). Kunanqa rey Davidmantañataq yachasun. Payqa Bat-Seba warmiwanmi qhelli juchata ruwarqan, jinaspapas mana juchayoq runata wañuchinankupaqmi kamachirqan. Ichaqa llapa juchankunatan reqsikurqan, jinaspa sonqomantapuni pesapakurqan. Chaymi Jehová Diosqa Davidta khuyapayaspa perdonarqan (2 Sam. 12:9, 10, 13, 14). Chaykunawanmi yachanchis Jehová Diosqa perdonawananchispaq listo kashasqanta. Ichaqa manan runakuna jinachu Jehová Diosqa perdonawanchis.

8. ¿Imaraykun Jehová Dios kay pachapi juezkunamanta aswan allin Juez?

⁸ Jehová Diosmi “kay pachantin Juezqa” (Gén. 18:25). Juj allin juezqa allintan gobiernokunaq kamachikuyninkunata reqsin. Jehová Diosqa chhayna allin Juezmi, pay kikintaqmi kamachikuykunatapas qowanchis (Isa. 33:22). Jehová Dios jinaqa manan pipas allin kaqta mana allin kaqtaqa reparanmanchu. ¿Imakunatawanmi juj allin juez yachanan? Juj allin juez allinta juzgananpaqqa ima pasasqantapas allintan yachanan. Jehová Diosqa allintan imatapas yachan, chayman jinataqmi juzgawanchis, jinaspa perdonawanchis. Chaypin yachanchis Jehová Diosqa kay pachapi juezkunamantapas aswan allin Juez kasqanta.

9. ¿Imakunatan Jehová Dios qhawarin perdonawananchispaq?

⁹ Jehová Diosqa manan kay pachapi juezkuna jinachu. Payqa tukuy imaymanatan allintapuni yachan, chayman jinataqmi imatapas ruwan (Gén. 18:20, 21; Sal. 90:8). Jehová Diosqa manan runakuna jinachu pitapas juzgan. Runakunaqa imachus rikusqankuman uyarisqankuman jinallan pitapas juzganku. Jehová Diosmi ichaqa allinta yachan imayna kasqanchista, imayna uywasqa kasqanchista, sonqonchispi imachus kasqanta, imachus piensasqanchistapas. Jehová “Diospa ñawinpaqqa manan ima kamasqapas pakasqachu kashan” (Heb. 4:13). Jehová Diosqa tukuy imaymanatan yachan, chayraykun khuyapayawanchis jinaspa perdonawanchis.

10. Deuteronomio 32:4 nisqan jina, ¿imaynatan Jehová Dios pitapas juzgan?

¹⁰ Jehová Diosqa chanillantan imatapas ruwan. Payqa manan qhapaqmanpas wajchamanpas sayapakunchu, nitaqmi runakunaq rijch’ayninta qhawaspachu pitapas perdonan (1 Sam. 16:7; Sant. 2:1-4). Jehová Diostaqa manan mat’ipayasunmanchu nitaqmi qolqetapas pagasunmanchu perdonawananchispaqqa (2 Crón. 19:7). Jehová Diosqa manan llakisqa otaq phiñasqa kaspachu pitapas juzgan (Éx. 34:7). Jehová Diosqa allin Juezmi. Payqa allintan reqsiwanchis, yachantaqmi imaynapi tarikusqanchistapas (leey Deuteronomio 32:4).

11. ¿Imaraykun Jehová Dios mana runakuna jinachu perdonawanchis?

¹¹ Ñaupa tiempopi Bibliata qelqaq runakunapas allintan yacharqanku Jehová Diosqa manapuni runakuna jinachu perdonawasqanchista. Chaymantan juj libropi nin: “Diosqa  manan runakuna jinachu pitapas perdonan” nispa. Nillantaqmi: “Runakunaqa manan Dios jinaqa perdonayta atisunmanchu”, nispa (Sinónimos del Antiguo Testamento, traducción y adaptación de Santiago Escuain). Chhaynaqa Jehová Diosllan atin runakunata sonqomanta pesapakuqtinku wiñaypaq perdonayta. Chhayna perdonaykuq kasqanta yachaspan anchatapuni kusikunchis.

12, 13. a) ¿Imaynan kanchis Jehová Dios perdonawaqtinchis? b) ¿Yuyashallanchu Jehová Dios juchanchiskunata?

¹² Jehová Dios perdonawallaqtinchismi thaj allin concienciayoq kanchis. Manan runakuna perdonawaqtinchisqa chhaynaqa kasunmanchu, aswanpas Jehová Dios perdonawasqanchista yachaspallan (Hech. 3:19). Chaymantapas Jehová Dios perdonawaqtinchisqa atinchismi jujmanta paywan amigontin kayta. Pay perdonawaqtinchisqa manapas juchallikusunmanchu jinan kapunchis.

¹³ Pitapas Jehová Dios perdonaspaqa manan juchankunataqa yuyashallanchu, nitaqmi juchankunamantaqa castiganpaschu (Isa. 43:25; Jer. 31:34). Bibliapin nin: “Imaynan inti lloqsimuyta inti jaykuytawan karunchan, ajinatan juchanchiskunata karunchawanchis”, nispa (Sal. 103:12). * Chhayna perdonaykuq kasqanmantan Jehová Diosta “gracias” ninchis, kallpachakunchistaqmi sonqomanta yupaychananchispaq (Sal. 130:4). Ichaqa, ¿pikunallatan Jehová Dios perdonan?

14. ¿Imakunatan Jehová Dios perdonaykuq kasqanmanta yachamurqanchis?

¹⁴ Jatunña juch’uyña juchanchis kanman chaypas Jehová Diosqa liston kashan perdonawananchispaq. Yachamusqanchis jina Jehová Diosqa kamawasqanchisraykun tukuy imaymanata yachan, allin Jueztaqmi kanpas, kamachikuyninkunapas chaninpunin. Chhaynaqa, ¿imakunatan Jehová Dios qhawarin pitapas perdonananpaq?

15. Lucas 12:47, 48 nisqan jina, ¿imatan Jehová Dios allinta qhawarin pitapas perdonananpaq?

¹⁵ Pitapas Jehová Dios perdonananpaqqa allintan qhawarin juchallikuq runa yuyaypichus juchallikurqan icha manachus chayta,  chaytan Jesuspas nirqan (leey Lucas 12:47, 48). Sichus juj runa yuyaypi juchallikunman chayqa manapaschá Jehová Diosqa chay runata perdonanmanchu (Mar. 3:29; Juan 9:41). Ichaqa sichus juchankunata reqsikuspa sonqomantapuni pesapakunman chayqa, ¿perdonanmanraqchu Jehová Dios chay runata? Arí, payqa liston kashan perdonawananchispaq.

16. ¿Iman sonqomantapuni pesapakuy, imaraykun sonqomantapuni pesapakunanchis?

¹⁶ Chaymantapas Jehová Diosqa allintan qhawarin sonqomantapunichus pesapakushanchis icha manachus chayta. Ichaqa, ¿iman sonqomantapuni pesapakuy? Sonqomantapuni pesapakuyqa mana allin ruwasqanchista saqepuymi. Sonqomantapuni pesapakuq runaqa mana allin ruwasqankunatan reqsikun, jinaspa Jehová Diosta mana kasukusqanmanta llakikun. Chaymantapas iñiyninpi mana allin kasqanta reparakuspan sonqomantapuni pesapakun. Chaymi pasarqan rey Manaseswanpas rey Davidwanpas. Paykunaqa Jehová Dios contran jatun juchakunaman urmarqanku. Ichaqa sonqomantapuni pesapakusqankuta rikuspan Jehová Diosqa paykunata perdonarqan (1 Rey. 14:8). Jehová Diosqa manan llakikusqanchista rikuspallachu perdonawanchis, aswanpas juchanchista saqepusqanchista rikuspan perdonawanchis. *

17. ¿Iman juchanchiskunata saqepuy? (Isaías 55:7).

¹⁷ Chaymantapas Jehová Diosqa allintan yachan saqepushanchispunichus juchanchiskunata icha manachus chayta. Juchankunamanta pesapakuq runaqa Jehová Diospa cheqnikusqan ruwaykunatan saqepun, kallpachakuntaqmi Diospa munayninman jina kausananpaq (leey Isaías 55:7). Chaymantapas kallpachakunmi Jehová Dios jina piensananpaq, munasqanman jina imatapas ruwananpaq (Rom. 12:2; Efes. 4:23). Chayraykun usqhaylla mana allin ruwasqankunatapas piensasqankunatapas cambiapunan (Col. 3:7-10). ¿Imatawanmi juchallikuq runa ruwanan Jehová Dios juchankunamanta perdonananpaq? Jesuspa wañusqanpin iñinan. Sichus Jehová Dios rikunqa mana allin ruwasqanchista  saqepusqanchista chayqa Jesuspa wañusqanraykun perdonawasunchis (1 Juan 1:7).

18. ¿Imakunatan Jehová Dios perdonaykuq kasqanmanta yachamurqanchis?

¹⁸ Kay pachapiqa manan pipas Jehová Dios jinaqa perdonawasunmanchu. ¿Imarayku? Yachamusqanchis jina Jehová Diosqa liston kashan perdonawananchispaq. Jinaspapas Jehová Diosqa tukuy imaymanatan allinta yachan, allintataqmi reqsiwanchispas. Chaymi sonqomantapuni pesapakuqtinchisqa khuyapayaspa perdonawanchis. Chaymantapas Jehová Diosqa manan runakuna jinachu juj ratollapaq perdonawanchis, aswanpas wiñaypaqmi perdonawanchis. Chaymi atinchis paywan jujmanta amigontin kayta, allin concienciayoq kayta ima.

19. Runakunaqa juchasapa kasqanchisraykun pantasunpuni imallapipas, chhaynaña kaqtinpas ¿atisunmanchu kusisqa kausayta?

¹⁹ Llapanchispas juchasapa kasqanchisraykun imallapipas pantasunpuni. Ichaqa Perspicacia para comprender las Escrituras, volumen 1, 209 paginapi nisqanmi yanapawasunman. Chay libropin nin: “Jehová Diosqa khuyapayakuq Diosmi. Payqa yachanmi juchasapa runakuna kasqanchisrayku imallapipas pantananchista (Sal. 103:8-14; 130:3). Chayraykun mana tukuy tiempochu chaykunamantaqa llakikunanchis. Chhaynaña kaqtinpas tukuy atisqanchistan kallpachakunanchis Jehová Diospa munayninman jina imatapas ruwananchispaq (Flp 4:4-6; 1Jn 3:19-22). Chayta ruwasunchis chayqa kusisqan kausasunchis”, nispa. Chay libropi nisqanqa anchatapunin kusichiwanchis.

20. ¿Imakunamantan qatimuq yachachikuypi yachasunchis?

²⁰ Kay yachachikuypi yachamusqanchis jina Jehová Diosqa liston kashan sonqomantapuni pesapakuqtinchis perdonawananchispaq. Chhayna kasqanta yachayqa ancha kusikunapaqmi. Ichaqa, ¿imaynatan noqanchispas Jehová Dios jina jujkunata perdonasunman? ¿Imaynapin jujkunata perdonasqanchis Jehová Diospa perdonasqanwan kaqlla kanman? ¿Imaynapin jujkunata perdonasqanchis Jehová Diospa perdonasqanwan mana kaqllachu? ¿Imaraykun chaykunamanta allintapuni yachananchis? Chaykunamantan qatimuq yachachikuypi yachasunchis.