KAY mundopi yaqa qanchis waranqa simikuna kasqanraykun viajekunata, negociokunata, educacionta, gobiernokunaq ruwaynintapas sasachan. Chayqa unay watakunamantañan kallaranpuni. Ejemplopaq yaqa 2.500 watakuna ñaupaqtaraqmi rey Asueroq (yaqapaschá Jerjes I karan) tiemponpi Persia llaqtapi juj leyta orqoranku, chaytataq apachiranku lliu Persia jap’iyman. “Indiamanta Etiopiakama pachaj iskay chunka qanchisniyoq provinciakunapi llapan oficialkunamanpas. Sapanka provinciakunaman qelqayninku qelqapi, rimayninku rimaypi qelqaranku, jinallataq Judío runakunaman qelqayninku qelqapi, rimayninku rimaypi”. *

Kay tiempopiqa manan chaytaqa ruwankuchu yaqa llapa gobiernokuna ni organizacionkunapas. Ichaqa juj organizacionllan chayta ruwashan. Jehová Diospa testigonkunan ruwashanku revistakunata, uyarinapaq grabacionkunata, videokunata, Bibliata, librokunatapas; kashallantaqmi makiwan rimaypipas 80 simikunapi. Chaymantapas ñausakunapaqmi ruwallankutaq imaymana clase braille nisqapi qelqakunata. Llapanpiqa kashan 750 más simikunapin.

Manan chayllachu. Jehová Diospa testigonkunaqa manan chaykuna ruwasqankumantaqa qolqetachu gananku. Traductorkunapas juj ruwaypi yanapaqkunapas voluntariokunan kanku. ¿Imaraykutaq chhaynaniraqtari kallpachakunku askha simikunaman traducinankupaq? ¿Imaynatan tukuy chaykunata ruwanku?