Mana manchakuspa Diospa Siminta Willasun

“Hinan llapankuman Santo Espirituqa hunt’aykurqan, chaymi mana manchakuspa Diospa siminta willarqanku.” (HECH. 4:31.)

1, 2. ¿Imaraykun kallpachakunanchis predicayninchista allinta hunt’anapaq?

KINSA p’unchayllaña wañupunanpaq kashaqtinmi Jesús qatikuqninkunata nirqan: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa. Kawsarinpusqanmanta semanakuna pasasqanmanmi hanaq pachaman ripunanña kashaqtin kamachirqan: “Rispa llapa suyu runakunata yachachimuychis, yachachisqaykuna kanankupaq, [...]. Qankunaman lliw kamachisqaykunata paykunaman yachachimuychis”, nispa. Chaymantataq nirqan: “Ñoqaqa qankunawanmi sapa p’unchay kashani kay pachaq p’uchukanankama”, nispa (Mat. 24:14; 26:1, 2; 28:19, 20).

² Kunanpas Jehová Diospa testigonkunaqa Jesuspa tiemponpi qallariq llank’aypin runakuna salvakunankupaq predicashanchis. Manan chay llank’ay hinaqa ima llank’aypas kanchu, chaymi kallpachakunanchis allinta predicanapaq yachachinapaqpas. Kay estudiopin yachasun imaynatan santo espíritu yanapawasunman mana manchakuspa predicanapaq, qatimuq iskay estudiopitaq yachasun imaynata santo espíritu yanapawanchis allinta yachachinapaq, predicashanallapaqpas chayta.

Mana manchakuqmi kananchis

3. ¿Imaraykun mana manchakuq kananchis predicananchispaq?

³ Reinomanta predicananchispaq Diospa kamachiwasqanchistaqa ancha chaniyoqpaqmi qhawarinchis. Ichaqa kay llank’aypiqa kanmi sasachakuykuna. Wakin runakunaqa sumaqtan uyarinku predicaqtinchis, yaqa llapa runakunan ichaqa Noepa tiemponpi runakuna hina kanku, paykunamantan Jesús nirqan: “Manataq imatapas repararqankuchu millp’uq unu  chayamuspa llapanta millp’unankama”, nispa (Mat. 24:38, 39). Wakinqa millaytan asipayawanchis, cheqnikuwanchis ima (2 Ped. 3:3). Chay hark’akuykunan hamunman kamachikuqkunamanta, llank’ananchismanta, colegiopi compañerokunamanta, familianchismanta ima. Chaymantapas atipananchismi runakuna mana allinta chaskiwananchismanta manchapakuyta. Arí, imaymanan hark’awanchis predicananchista. ¿Imaynatan kallpata hap’isunman Diospa Siminta “mana manchakuspa” rimashanallapaq? (Efe. 6:19, 20.)

4. a) ¿Imataq mana manchakuq kayri? b) ¿Imaynatan Pablo kallpata hap’irqan Tesalónica llaqtapi predicananpaq?

⁴ ¿Imataq mana manchakuq kayri? Chay simiqa griego rimaypi kay ninantan nirqan: “tukuy imata ninapaqpas libre kay”, “iman kaqta niy”, “confianzawan rimay”, nispa. Chayqa kay ninallantaqmi: “confianza”, “valentía”. Ichaqa mana manchakuqña kanchis chaypas, sumaqmi rimayninchisqa kanan (Col. 4:6). Mana iskayaspan rimananchis, ichaqa llanp’u sonqon kananchis (Rom. 12:18). Reinomanta allin willakuykunata predicaspaqa, sut’itan rimananchis, ichaqa mana pitapas phiñachispalla. Rikusqanchis hina, mana manchakuspa predicanapaqqa, kallpachakunanchismi sumaq sonqo kananchispaq. Manan chayqa imayna runa kasqanchismantachu nitaq kikinchispi confiakusqanchismatachu kanqa. Yuyarisunchis apóstol Pablo compañeronkunapiwan tesalónica llaqtata predicaq risqankuta. Pablon nin: “Mana mancharispa [...] willarqaykichis”, nispa. ¿Imarayku necesitarqanku kallpata? ‘Filipos llaqtapi [...] k’amisqa kasqankurayku’. ¿Imaynatan chay kallpata tarirqanku? Apóstol Pablo kutichin: “Diosninchismi kallpachawarqanku”, nispa (leey 1 Tesalonicenses 2:2). Arí, Jehová Diosqa sonqonchismantan manchapakuyta horqonqa, hinaspa yanapawasun mana manchakuspa predicanapaq.

5. ¿Imatan Jehová Dios qorqan Pedroman Juanman huk cristianokunamanpas mana manchakuq kanankupaq?

⁵ Yuyarisunchis huñunasqa “kamachikuqkuna, kurak runakuna, kamachikuy simita yachachiqkunapiwan” Pedro, Juan contra hatarisqankumanta. Iskayninkun nirqanku: “Qankuna kikiykichis chaninchaychis, ¿Diospaqqa allinchu kanman payta mana kasukuspa qankunata kasukuyniyku? Rikusqaykuta uyarisqaykuta willaytaqa manapunin upallakuykumanchu”, nispa. Chay qatiykachaykunata Dios tukuchinanpaq mañakunankutaqa, huk cristianokunapiwanmi khaynata mañakurqanku: “Señor Diosniyku, qhawariy manchachiwasqankuta, kamachiykikunatapas kallpachawayku mana manchakuspa simiykita willanaykupaq”, nispa (Hech. 4:5, 19, 20, 29). ¿Imaynatan Jehová Dios kutichimurqan mañakusqankuman? (Leey Hechos 4:31.) Santo espirituntan qorqan mana manchakuq kanankupaq, ñoqanchismanpas qowasunmanmi. Ichaqa, ¿imatan ruwananchis chaskinanchispaq, predicasqanchispi yanapawananchispaqpas?

¿Imatan ruwana mana manchakuq kanapaq?

6, 7. ¿Imaynatan santo espirituta chaskisunman? Willay ejemplota.

⁶ Diospa santo espiritunta chaskinapaqqa mañakunanchismi. Jesusmi uyariqninkunata nirqan: ‘Qankunapas mana allin kashaspa wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman santo espiritunta qonqa’, nispa (Luc. 11:13). Chay nisqanmi kallpachawanchis Jehová Diospa kallpanta mañakushanallanchispaq. Chaytan astawanqa mañakunanchis sichus callekunapi, mercadokunapi otaq maypipas tarikuspa manchakushanchisraq predicayta chayqa (1 Tes. 5:17).

⁷ Chaytan ruwarqan huk iñiqmasinchis Rosa. * Paymi huk escuelapi llank’asqa, chaypin uyarisqa wawakuna maltratasqankumanta huk profesoraq informe leesqanta. Chayta leespan profesoraqa sinchita llakikusqa, hinaspa nisqa: “¡Kakallao! ¡Imachá kay vidaqa!” nispa. Chay  qhepamanmi iñiqmasinchisqa predicasqa. ¿Iman kallpacharqan rimananpaq? Paymi nin: “Jehová Diosmantan mañakurqani santo espiritunwan yanapawananpaq”, nispa. Chay llakikuyninmantan allinta sut’inchasqa, huk kutipi astawan parlarinankupaqtaq rimasqaku. Kaqllatataqmi pisqa watayoq Milane sutiyoq wawapas ruwarqan, paymi nin: “Manaraq escuelaman ripushaqtiymi mamitaywan Diosmanta mañakuyku”, nispa. ¿Imatan Jehová Diosmanta mamitan mañakun? Milaneman kallpata qonanpaqmi chhaynapi Diosninmanta rimananpaq. Mamitanmi nin: “Chay ruwasqaykuraykun ususiyqa allinta rimarqan cumpleañokunata, huk fiestakunatapas imayna qhawarisqanta, hinaspa chay fiestakunata mana ruwayta munarqanchu”, nispa. Chay ejemplokunan rikuchin mana manchakuq kanapaq mañakuy ancha allin kasqanta.

8. ¿Imatan Jeremiasmanta yachanchis?

⁸ Yuyaymanallasuntaq Jeremías manchapakuyninta atipananpaq yanapay chaskisqanpi. Jehová Dios suyukunaq profetan kananpaq churaqtinmi, nirqan: “Sinchi waynallaraqmi kani, manan rimaytapas yachaniraqchu”, nispa (Jer. 1:4-6). Qhepamanmi ichaqa Jehová Diospa juicionmanta mana manchakuspa willarqan, chaymi runakunaqa suticharqanku qhencha runa, nispa (Jer. 38:4). Soqta chunka phisqayoq wata masraq Diospa juicionmanta willarqan. Israelpin allin reqsisqa karqan mana manchakuspa predicasqanrayku, chaymi soqta pachaq wata qhepaman Jesuspa imayna predicasqanta rikuspa runakuna piensarqanku Jeremiaspa kawsarimpunanpaq (Mat. 16:13, 14). ¿Imaynatan Jeremías atiparqan manchapakuyninta? Pay kikinmi willan: “Sonqoypin simiykiqa nina hinaraq rawrashan, tulluytaraqmi parichishan. Upallakuyta munani chaypas manapunin ch’inyakuyta atinichu”, nispa (Jer. 20:9). Jehová Diospa Simin Qelqapi kamachikuyninkunan kallpacharqan rimananpaq.

9. ¿Imaynatan Diospa Simin Qelqa Jeremiasta hina yanapawasunman?

⁹ Hebreo cristianokunaman qelqasqanpin Pablo nirqan: “Diospa siminqa kawsaqmi, atiyniyoqmi, llapa iskay filoyoq espadamantapas aswan filollañan. Almatapas, espiritutapas, moqo-moqotapas, chilinatapas taripanankaman haykun, sonqopi yuyaykusqakunatapas lliwtapunin sut’inchan”, nispa (Heb. 4:12). Diospa yachachikuyninkunaqa Jeremiasta hinan yanapawanchis. Bibliaqa manan runaq yuyaychasqanchu. Runakunaña qelqarqanku chaypas, paykunaqa Diospa yuyaychasqanmi qelqarqanku. 2 Pedro 1:21 nin: “Manan hayk’aqpas profetakunaqa runakunaq munayninman hinachu rimarqanku, aswanpas paykunaqa santo espirituq yuyaychasqan kaspan Diosmanta rimarqanku”, nispa. Chayrayku, Bibliata allinta estudiasunchis chayqa, yuyayninchista hunt’achisun santo espiritunwan Diospa yuyaychasqan yachachikuykunawan (leey 1 Corintios 2:10). Chay yachachikuykunaqa sonqonchispin ‘nina hinaraq rawran’, chayraykun mana upallakuyta atinchischu.

10, 11. a) ¿Imaynatan Bibliata estudiananchis mana manchakuspa predicanapaq? b) Willay imatas ruwawaq sapallaykipi aswan allinta Bibliata estudianaykipaq

 ¹⁰ Sichus sapallanchispi Biblia estudiasqanchis yanapawananchista munanchis chayqa, yachachikuyninmi sonqonchisman chayanan, hinaspa cambiachiwananchis. Ezequielpi yuyaykusun. Huk rikhuriypin Jehová Dios nirqan: “Mana uyarikuq k’ullu llaqtaq contranpi rimaq qelqa k’uyuta mikhuy”, nispa. Ezequielqa chay qelqa k’uyupi nisqantan allintapuni entiendenan karqan sonqonman chayanankama. Chhaynapin kusikuywan llank’ayninta hunt’anan karqan (leey Ezequiel 2:8–3:4, 7-9).

¹¹ Kunanpas Ezequielpa tiemponpi hinan kashanchis. Sasan Diosmanta willay manan wakin runakuna uyariyta nitaq yachaytapas munankuchu. Mana pisipaspa predicashanallapaqqa, ancha importanten Bibliapi yachachikuykunata estudiaspa allinta entiendey. Manan maynillanpichu aswanpas pasaqtan estudiananchis. Salmista hinan ninanchis: “Señor Diosníy, hatun Qaqaymi, qespichiqniymi kanki, simi rimarisqaykunapas yuyaykusqaykunapas sonqoykipaq hinapuni kachun”, nispa (Sal. 19:14). Ancha importanten Bibliata leespa yuyaymanayqa, chhaynapin leesqanchis sonqonchisman chayanqa. Llapallanchismi kallpachakunanchis sapallanchispi Bibliata estudiaspa aswan allinta entiendenapaq. *

12. ¿Imaraykun huñunakuykunaman rinanchis santo espirituq yanapayninta chaskinapaq?

¹² Chaymantapas Diospa santo espiritunta chaskinapaqqa kasukunan kay kamachikuyta: “Hukkuna hukkunawan kallpachanakusunchis aswanta munanakunanchispaq, allin ruwaykunatapas ruwananchispaq. Ama huñunakuyninchista saqesunchu” (Heb. 10:24, 25). Santo espirituqa yanapawanchis huñunakuykunawanmi, chaymi kallpachakunanchis huñunakuykunaman rinanchispaq, allinta chaypi uyarinapaq yachasqanchisman hinataq kawsananchis (Apo. 3:6).

Imatan chaskisun mana manchakuq kasqanchismanta

13. ¿Imatan yachanchis qallariy siglopi cristianokuna predicasqankumanta?

¹³ Diospa aswan hatun kallpanqa santo espiritun, chaytan Jehová Diosqa serviqninkunaman qon aswan kallpawan munayninta ruwanankupaq. Qallariy siglopi cristianokunamanpas qorqanmi santo espiritunta, allin willakuykunata ‘kay pachantinpi runakunaman willanankupaq’ (Col. 1:23). Paykunaqa yaqa llapankun “mana estudiaq runakunalla” karqanku, chaypin yachanchis santo espirituq yanapaynillanwan predicay atisqankuta (Hech. 4:13).

14. ¿Imatan necesitanchis mana manchakuspa predicanapaq?

 ¹⁴ Cristianokunaqa santo espirituwanmi pusachikunanchis, chhaynapin mana manchakuspa predicasun. Espirituwan ‘rawrashaq sonqo’ kanapaqmi yanapawasun Jehová Diosmanta mañakuy, allinta sapallanchispi Bibliata estudiay, mañakuspa yuyaymanay, llapa huñunakuykunaman riy ima (Rom. 12:11). Rimasunchis “Apolos sutiyoq judío runa[manta], paymi karqan kusa rimaq qhari”. ¿Iman yanaparqan mana manchakuspa yachachinanpaq? Espirituq kallpachasqanmi “Jesusmanta iman kaqtapuni tukuy sonqo rimaqpas yachachiqpas” (Hech. 18:24, 25). Sichus ñoqanchispas espirituwan ‘rawrashaq sonqo’ kasun chayqa, mana manchakuspan predicasun wasin-wasinta, otaq maypi tarikuspapas (Rom. 12:11).

15. ¿Imakunapin yanapawasun mana manchakuspa predicay?

¹⁵ Mana manchakuspa predicasun chayqa, allinpin tukunqa ruwasqanchis. Ñawpaqta, aswan allinta predicasun, reparasuntaq chay llank’aynichiswan askha allinkuna kasqanta. Iskaypi, astawan kusikuyta tarisun aswan allintataq yachachisun. Kinsapi, sonqonchismi rawrarinqa, reparasuntaq usqhaylla predicananchis kasqanta

16. ¿Imatan ruwananchis manaña ñawpaqpi hinañachu kusikuywan predicaqtinchis?

¹⁶ Ichaqa, ¿imatan ruwananchis manaña ñawpaqpi hinañachu kusikuywan predicaqtinchis? Ñawpaqtan qhawarikunanchis imaynan iñiyninchispi kashanchis chayta, apóstol Pablon niwanchis: “Qankuna kikiykichista t’aqwikuychis allinpunichus iñiypi kashasqaykichista, arí, qankuna kikiykichista reqsikuychis”, nispa (2 Cor. 13:5). Tapukunanchismi: “¿Rawrashaq sonqowanchu predicani? ¿Mañakunichu Jehová Diospa kallpanta? ¿Mañakusqaypi rikuchinichu Diospi confiasqayta, munayninta ruwanaypaq yanapawananpipas? ¿Agradecekunichu paypaq llank’asqaymanta? ¿Tiempoyta t’aqanichu Bibliata estudianaypaq? ¿Hayk’a tiempotan yuyaymanani Bibliata leespay otaq uyarispapas? ¿Kallpachakunichu huñunakuykunapi comentanaypaq?” nispa. Chaykunata tapuykuymi yanapawasun imakunapiraq allinyananchis kasqanta yachananchispaq, hinaspa chayman hina kallpachakunanchispaq.

Santo espirituwan kallpata hap’isun

17, 18. a) ¿Maykaman yapakushan predicayninchis? b) ¿Iman yanapawasun allin willakuykunata “tukuy confianzawan” willananchispaq?

¹⁷ Jesusmi kawsarimpusqan qhepaman qatikuqninkunata nirqan: “Qankunaman Santo Espíritu hamuqtinmi ichaqa atiyta chaskinkichis, hinaspan testigoykuna kankichis Jerusalén llaqtapi, lliw Judea provinciapi, Samaria provinciapi, kay pachaq k’uchunkunakamaraq”, nispa (Hech. 1:8). Predicay qallarikusqanmanta kunankamaqa admirakunapaqmi Diospa llaqtan yapakun. Kunanqa Diospa Reinonmantan willashanku qanchis millón más Testigokunaña, iskay pachaq kinsa chunka más nacionkunapi territoriokunapi ima. Sapa watantaq predicanku yaqa waranqa phisqa pachak millón horata. ¡May kusikuymi kay llank’aypi yanapakuyqa, manan hayk’aqpas chhayna llank’ayqa kanqañachu!

¹⁸ Qallariy siglopi hinan kunanpas pachantinpi predicayqa aparikushan santo espirituq yanapayninwan. Sichus ñoqanchispas yanapayninta chaskisun chayqa, predicayninchistan “tukuy confianzawan” aparisun (Hech. 28:31, MR). Chhaynaqa, santo espirituwan yanapachikushallasun Diospa gobiernonmanta allin willakuykunata willashanallanchispaq.

[Uranpi willakuykuna]

¿Imatan yacharqanchis?

• ¿Imaraykun mana manchakuq kananchis predicananchispaq?

• ¿Iman yanaparqan Jesuspa qatikuqninkunata mana manchakuspa predicanankupaq?

• ¿Imaynapin mana manchakuq kasunman?

• ¿Imapin yanapawasun mana manchakuspa predicay?

[Tapuykuna]

[7 paginapi foto]

¿Imaynatan wawanchiskunata yanapasun mana manchakuspa predicanankupaq?

[8 paginapi fotokuna]

Ratulla mañakuymi kallpachawasunchis predicanapaq