¿Sumaqtachu qhawarinchis saminchaykuna chaskisqanchista?

JEHOVÁ DIOSMI israelitakunata kamachi kashaqtinku milagrota ruwaspa Egipto llaqtamanta horqomurqan. ¡Anchatachá kusikurqanku mana piqpa hark’asqan Diosta yupaychay atisqankumanta! (Éxo. 14:29–15:1, 20, 21.) Ichaqa qonqayllan sonqonku t’ikrapurqan hinan rimapakuyta qallarirqanku. Ch’inneq pampapi rikukuspan paykunarayku Diospa ruwasqanta qonqapurqanku. Chaymi Diospa contranpi Moisespa contranpiwan rimaspa nirqanku: “¿Imapaqmi Egipto suyumanta horqomuwarqankiku kay ch’inneqpi wañunaykupaq? ¡Manan unupas mikhunapas kanchu! ¡Amikuykuñan kay ima kasqan [maná] mikhunawan!” nispa (Núm. 21:5).

Unay watakuna qhepamanmi ichaqa rey David khaynata takirqan: “Ñoqaqa ancha munakuyniykimanmi k’askakuni, sonqoypin qespichiwasqaykimanta kusikuni. Señor Diosníy, qanpaqmi takisaq allinkunata ruwapuwasqaykimanta”, nispa (Sal. 13:5, 6). Davidqa manan hayk’aqpas qonqarqanchu payta munakuspa Jehová Diospa ruwasqanta. Aswanmi sapa kutilla chaykunapi yuyaymanaq (Sal. 103:2). Jehová Diosqa ñoqanchismanpas imaymanapin munakuyninta rikuchiwarqanchis, chaytan mayninqa qonqapusunman. Chaymi kunan wakin saminchaykuna chaskisqanchista yuyarisun.

Jehová Dioswan ‘sonqota tupachiy’

Davidmi qelqarqan: “Señor Diosqa pay manchakuqkunawanmi sonqota tupachin”, nispa (Sal. 25:14). ¡Ancha sumaqmi runalla kashaspa Dioswan amigontin kayqa! Ichaqa sapa p’unchay imaymana ruwanayoq kasqanchisraykun qonqapusunman hanaq pacha Taytanchiswan rimayta. Chayta ruwaspaqa mana allinkunapin rikukusunman. Amigonchis kasqanraykun Jehová Dios munan  payman hap’ipakunanchista, munanmi ima manchakusqanchistapas, llakikusqanchistapas, ima munasqanchistapas willananchista (Pro. 3:5, 6; Fili. 4:6, 7). Chaymi qhawarinanchis imaynatachus mañakusqanchista.

Paul waynan imayna mañakusqanpi yuyaymanaspa repararqan hawa sonqolla mañakushasqanta. * Paymi nirqan: “Mañakuspan sapa kuti kaqllata rimaq kani”, nispa. Chaymi Índice de las publicaciones Watch Tower nisqa libropi mañakuymanta maskhaqtin yacharqan 180 kutita Bibliapi mañakuymanta rimasqanta. Chaypin yacharqan ñawpa tiempopi Diosta serviqkuna sonqomantapacha mañakusqankuta. Paulmi nirqan: “Chaykunamanta yachaspan ñoqapas imachus munasqayta Jehová Diosman willaq kani, chaymi yanapawarqan tukuy sonqoywan mañakunaypaq. Kunanqa sapa kutillanmi Diosman asuykuni”, nispa.

‘Tiempollanpi [...] mikhuna’

Askhanpi espiritual mikhuna chaskisqanchispas Diospa saminchayninmi, chaykunaqa cheqaq yachachikuykunan. Chaymi ‘kusisqa sonqontin takinchis’ (Isa. 65:13, 14). Ichaqa cuidakunanchismi ima mana allin yuyaykuypas waqllichiwananchismanta. Sichus Diospa llaqtanmanta t’aqakapuq runakunata uyarisunman chayqa, waqllipusunmanmi hinaspa manaña Diospa apachimusqanta hinañachu qhawarisunman ‘allin yuyayniyoq hunt’aq kamachiwan [...] tiempollanpi kamachinkunaman mikhuna’ apachimusqanta (Mat. 24:45-47).

André cristianota imachus sucedesqanmanta yachasun. Payqa unayñan Diosta servisharqan, ichaqa Diospa llaqtanmanta t’aqakuqkunaq qelqamusqankutan Internetpi leeyta qallarirqan. Paymi nin: “Yachaytan munarqani imatan paykuna ninku ‘cheqaq yachay’ nispa. Ichaqa chaykunata astawan leesqayman hinan Diospa llaqtanmanta t’aqakapuyta munarqani. Qhepamanmi ichaqa Testigokunaq contranpi qelqamusqankuta aswan allinta t’aqwirirqani, chaypin repararqani chay runakunaqa pantasqa yachachikuqkuna, q’otukuq runakuna kasqankuta. Paykunaqa qelqanchiskunamanta iskay kinsa simikunata horqomuspan munasqankuman hina yachachispa nisqaku ‘cheqaq yachay’ nispa. Chaymi yapamanta qelqanchiskunata leepurqani huñunakuykunamanpas kutipurqani. Chayraqmi repararqani Diospa llaqtallan allin kasqanta”, nispa. Arí, Andreqa yaqallan Diospa llaqtanmanta t’aqakapurqan.

‘Iñiq-masinchiskuna’

Teqsimuyuntinpi huk familia hinalla iñiqmasinchiskunawan kawsaypas Diospa saminchayninmi (Sal. 133:1). Chaychá Pedro kayta qelqarqan: “Munakuychis iñiq-masiykichiskunata”, nispa (1 Ped. 2:17). Diospa llaqtallanpin tayta-mamakunamanta, wawqe-panakunamantawan munakuyta yanapaytapas chaskinchis (Mar. 10:29, 30).

 Mayninpin ichaqa iñiqmasinchiskunawan imamantapas phiñachinakuy kanman. Yaqapaschá ima pantasqankumantapas phiñakuspa paykunamanta rimakusunman. Sichus sonqonchispi chaykuna rikhurinman chayqa, kaytan yuyarinanchis: Jehová Diosqa llapallanchistan munakuwanchis pantaqña kanchis chaypas. Hinaspapas Bibliapi kay nisqantan mana qonqananchischu: “‘Manan huchayoqchu kani’ ninchis chayqa, ñoqanchis kikinchistan q’otukunchis, manataqmi Diospa cheqaq-kayninqa sonqonchispi kanchu”, nispa (1 Juan 1:8). Chaymi aswanpas kay textoq nisqanta kasukunanchis: “Qankunapura paciencianakuychis, [...] pampachaykunakuychis”, nispa (Col. 3:13).

Ana sipasmi sasachakuykunapi tarikuspaña yacharqan iñiqmasinchiskuna may allin kasqanta. Chinkasqa churimanta Jesuspa willasqanpi hinan paypas Diospa llaqtanmanta karunchakapurqan, qhepamanmi ichaqa mana allin ruwasqanta reparakuspa kutimpurqan (Luc. 15:11-24). ¿Imanirqanmi? “Kunanqa llapa iñiqmasiykunatan munakuni imapiña pantanku chaypas. Ñawpaqqa qhawashallaqmi kani ima pantasqankutapas, kunanmi ichaqa kallpachakusaq paykunawan kusisqa kawsanaypaq. Diospa llaqtanpiqa paraisopi hinañan sumaqta kawsashanchis. Manan imapas chay hina kawsaywanqa tupanmanchu”, nispan nin.

Agradecekusun saminchaykuna chaskisqanchismanta

Diospa prometesqan suyakuytapas ancha valorniyoq qorita hinan hap’ikunanchis. Diospa Gobiernon lliw sasachakuykuna allichananmanta chayllaraq yachashaspaqa anchatan agradecekurqanchis. ‘Sinchi chaniyoq perlata tarirqospa, llapan kaqninkunata vendespa chay perlata rantiq’ runa ruwasqanta hinan ruwarqanchis (Mat. 13:45, 46). ¿Pisipaqchu chay runa qhepaman qhawarirqan chay perla rantikusqanta? Jesusqa manan chhayna kasqanmanta rimarqanchu. Chaymi ñoqanchispas agradecekushanallanchis Diospa promesanmanta (1 Tes. 5:8; Heb. 6:19).

Jean cristianan 60 wata masña Diosta servishan, paymi nin: “Runakunaman Diospa Gobiernonmanta willasqaymi yanapawan Diospa promesanta mana qonqanaypaq. Anchatan kusikuni Diospa Gobiernonmanta yachaspa ñawinku kusikuymanta k’anchariqtin. Bibliata estudiaspa sumaq kawsakapusqankuta rikuspataq nini: ‘¡May sumaq yachaytan runakunaman apashayku!’ nispa”, nispa.

Kunan yachasqanchis hina, tukuy sonqowanmi Diosta agradecekunanchis payta servinapaq imaymana qowasqanchismanta. Yaqapaschá ñak’arishanchis onqoywan, machuyaywan, llakikuy onqoywan, qatiykachasqa kashanchis, qolqe mana aypawanchischu otaq munakusqanchis runa wañupun. Ichaqa tukukapullanqan chaykunaqa. Diospa Gobiernonmi ñak’ariykunata chinkachipunqa, chaypitaqmi ancha sumaq saminchaykunata chaskishallasun (Apo. 21:4).

Agradecekusun kay tiempopi saminchaykuna chaskisqanchismanta, David hinataq ñoqanchispas nisun: “Diosnilláy Señor Dios, askhallañan musphana ruwasqaykikunaqa, askhallañan yuyarikuwasqaykikunaqa. ¡Manan pipas qan hinaqa kanchu! Chaykunamanta rimariyman chaypas, manan yupayta atiymanchu”, nispa (Sal. 40:5).

[Uranpi willakuy]

[18 paginapi foto]

Jehová Diosmi sasachakuykunapi tarikuqtinchis yanapawanchis