Diosmanta hap’ipakusun kay tukukuy tiempopi

“Suyakullaychispuni Señor Diospiqa.” (ISA. 26:4.)

1. ¿Imaynapin kay pacha runakuna tarikunku, Diosta serviqkunari?

ASKHA runakunan ñak’ariypi tarikuspa otaq engañasqa kaspa manaña imapipas nitaq pi runapipas confiankuchu. Diosta serviqkunan ichaqa mana chhaynapichu tarikunchis. Ñoqanchisqa yachanchismi ‘kamachikuqkunapi’ otaq kay pacha kaqkunaman hap’ipakuy yanqapaq kasqanta (Sal. 146:3). Chaymi kawsayninchista qhepa tiempoman imayna kananchistapas Jehová Diospa makinman saqenchis. Payqa munakuwanchismi hunt’anqataqmi rimasqantaqa (Rom. 3:4; 8:38, 39).

2. ¿Imanirqanmi Josué Diosmanta?

² Ñawpa tiempopin Josué sut’incharqan Jehová Dios hap’ipakunapaq hina kasqanta. Wañupunanpaqña kashaqtinmi llaqtamasinkunata nirqan: ‘Qankunaqa tukuy alman, tukuy sonqon Señor Diospa sumaq nisqasuykichista llapanta hunt’asqanta reqsinkichis, payqa llapantapunin rimarisqantaqa hunt’arqan’, nispa (Jos. 23:14).

3. ¿Imatan Jehová Diosmanta sutin yachachiwanchis?

³ Jehová Diosqa pay serviqkunata munakuspan prometesqanta hunt’an. Ichaqa sutinraykun astawanqa chayta ruwan (Éxo. 3:14; 1 Sam. 12:22). Inglés simipi huk allin reqsisqa Bibliaq qallariyninpin Diospa sutinmanta nin: “Huk sumaq suyakuytan qowanchis: Diosqa imamanpas tukunqan imapas kasqanman hina,  sasachakuykuna kasqanman hina, imapas necesitakusqanman hina [...]. Prometesqanmi, [...] willasqanmi, yuyarichisqanmi, compromiso ruwasqan ima. Diosqa manan hayk’aqpas chay sutinta cambianqachu manataqmi p’enqakunqachu chay sutinmanta”, nispa (The Emphasized Bible, de J. B. Rotherham).

4. a) ¿Imanispan Isaías 26:4 texto kallpachawanchis? b) ¿Imamantan yachasun kay estudiopi?

⁴ Kaykunata tapukusun: “¿Tukuy sonqoywan hap’ipakunaypaq hinachu Jehová Diosta reqsini? ¿Diospa makinmanchu saqeni ima llakikuyniytapas?” nispa. Isaías 26:4 texton kallpachawanchis: “Suyakullaychispuni Señor Diospiqa, paypunin Wiñay Qaqaqa”, nispa. Jehová Diosqa manañan ñawpa tiempopi hinañachu ima milagrotapas ruwan runakunata yanapananpaq. Chaywanpas ‘Wiñay Qaqanchista’ hinan paytaqa ‘suyakushanallanchis’. ¿Imaynatan Dios Taytanchis yanapan hunt’aq sonqowan serviqninkunata? Tentacionkuna kaqtin kallpachawaspanchis, predicasqanchista mana uyarikuqtinku otaq qatiykachasqa kaqtinchis yanapawaspanchis, llakikuykuna kaqtin kallpachawaspanchis ima. Chay kinsantin sasachakuykunapi yanapawasqanchismanta yachasqanchisman hina, qhawarisun imaynatan astawan Diospi hap’ipakusunman chayta.

Tentacionkunapi tarikuspa

5. ¿Imata ruwananchis kaqtinmi sasa kanman Diospi hap’ipakuy?

⁵ Cristianokunapaqqa manapaschá sasachu Diospa prometesqan Paraisopi otaq wañupuqkunaq kawsarimpunan suyakuypi hap’ipakuy. Ichaqa, sasan kanman kamachikusqanta kasukuy. Chaypaqqa allintan yachananchis kamachikuynin allinninchispaq kasqanta kusisqa kawsanapaq kasqantawan. Yaqapaschá chayqa sasa kanman. Rey Salomonmi kayta niwanchis: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu. Tukuy ruwasqaykikunapi Señor Diosta yuyariy, paymi cheqan ñanninta pusasunki”, nispa (Pro. 3:5, 6). ¿Imaraykun Diospi hap’ipakunamanta rimaspa ‘ñanmanta’ riman? Sapa p’unchay tukuy ruwasqanchispi Diospi iñisqanchista rikuchinanchis kasqanraykun. Arí, iñiyqa manan qhepa tiempopaq Diospa prometesqanta suyakuyllachu. Chaymi kunan yachasun imaynatan tentacionkuna kaqtin Diospi hap’ipakusqanchista rikuchisunman.

6. ¿Imatan ruwasunman millay yuyaykuykuna sonqonchispi mana saphichakunanpaq?

⁶ Sonqonchispi mana allin yuyaykuykunan tanqawanchis millay ruwaykunaman, chaymi ñawpaqtaqa sonqonchista allinta cuidananchis (leey Romanos 8:5; Efesios 2:3). ¿Imatan ruwasunman chay millay yuyaykuykuna sonqonchispi mana saphichakunanpaq? Phisqa yanapaykunan kashan. 1) Diospa yanapayninta mañakuna (Mat. 6:9, 13). 2) Diosta kasukuspa allin kawsaq runakunamanta, hinallataq mana kasukuspa mana allinpi tarikuq runakunamantawan yachaspan yuyaymanana  (1 Cor. 10:8-11). * 3) Yuyaykunan huchallikuspaqa ñoqanchispas familianchispas ñak’ariykunapi rikukunanchista. 4) Yuyaykunan hatun huchaman urmaqtinchis Jehová Dios imayna sientekusqanpi (leey Salmo 78:40, 41). 5) Yuyaymananan mana allin kaqmanta karunchakuspa allin kaqta wasinchispi runakuna ukhupipas ruwaqtinchis Jehová Dios kusikusqanpi (Sal. 15:1, 2; Pro. 27:11). Chaykunata ruwasun chayqa astawanmi Diospi hap’ipakusun.

Mana uyarikuqtinku otaq qatiykachasqa kaqtinchis

7. ¿Ima sasachakuypin Jeremías tarikurqan? ¿Imaynatan mayninpi sientikuq?

⁷ Askha iñiqmasinchiskunan runakunaq mana uyarikusqanku llaqtakunapi predicashanku. Jeremiaspas chhayna tiempopin predicarqan, chay tiempopaqqa Judá llaqtan atipasqa kananpaqña kasharqan. Sapa p’unchay Diospa phiñakuy p’unchaymanta chay runakunaman willaspan iñiyniyoq kasqanta rikuchinan karqan. Huk kutinmi yanapaqnin Barucpas sasachakuykunapi tarikuspa nirqan: “¡Ay, imaraqmi, ikiraqmi!”, nispa (Jer. 45:2, 3). ¿Pisi kallpayarqanchu Jeremías chaykunawan? Huk kutinmi sinchita llakikuspa nirqan: “¡Paqarisqay p’unchayqa ñakasqa kachun! [...] ¿Imapaqraqmi mamaypa wiksanmantaqa lloqsimurqani, nanayllata phutikuyllatawan rikunaypaq, p’enqayllapi ch’isiyanaypaq?” nispa (Jer. 20:14, 15, 18).

8, 9. Jeremías 17:7, 8, Salmo 1:1-3 textokunaq nisqan hina, ¿imatan ruwananchis rurushanallanchispaq?

⁸ Jeremiasqa manan pisiparqanchu, aswanmi Jehová Diospi hap’ipakurqan. Chaymi payqa Jeremías 17:7, 8 textopi Diospa promesan hunt’akusqanta rikurqan, chaypin nin: “Saminchasqa kachun ñoqaman hap’ipakuq runaqa, ñoqa Señor Diospi suyakuqqa. Mayu patapi wiñaq sach’a hinan kashan, unu ukhumanmi saphiykunpas. Ruphay tiempo chayamuqtinpas manan manchakunchu, raphinpas q’omerllapunin kashan, chiraw mitapipas manan naq’enchu, tukuy tiempotaq rurushallanpuni”, nispa.

⁹ “Mayu patapi wiñaq sach’a hinan” Jeremiasqa ‘rurushallarqan’. Payqa manan runakunaq asipayasqanta kasurqanchu, aswanmi Kawsay qoq Diosman k’askakurqan kasukurqantaqmi kanpas (leey Salmo 1:1-3; Jer. 20:9). Jeremiaspa ruwasqanqa anchatan kallpachawanchis, astawanqa runakunaq mana uyarikusqan llaqtakunapi predicaqkunata. Chhaynapi tarikushanchis chayqa Jehová Diosmantan hap’ipakunanchis. Paymi kallpachawasun ‘sutinta sut’ita siminchiswan rimananchispaq’ (Heb. 13:15).

10. ¿Ima saminchaykunatan chaskinchis? ¿Imatan tapukunanchis?

¹⁰ Kay tukukuy p’unchaykunapi sasachakuykunata atipanapaqmi Jehová Dios imaymana yanapaykunata qowanchis. Hukninqa Biblian, chaypaqmi aswan askha simikunaman k’apakta t’ikrakushan. Chaymantapas ‘hunt’aq kamachiwanmi’ espiritual mikhunata tiempollanpi apachimuwashanchis. Hinaspapas llaqtanpin huk sumaq familiata qowanchis, paykunawanmi huñunakuykunapi hatun huñunakuykunapipas kusikunchis. ¿Chaskikushanchischu chay saminchaykunata? Chaskikuqkunaqa ‘kusisqa sonqowanmi takinqaku’, Diosta mana kasukuqkunan ichaqa ‘llakisqa sonqontin waqanqaku, llakiq ñit’isqan sonqontin qaparinqaku’ (Isa. 65:13, 14).

Llakikuykuna kaqtin

11, 12. ¿Imatan ruwanku allin yuyaywan kawsaqkuna?

¹¹ Kay pachapi runakunaqa profetakunaq willasqan hinan imaymana sasachakuykunapi astawan tarikushanku (Mat. 24:6-8; Apo. 12:12). Llaqtaman unu hunt’aykuqtinqa llapa runakunan wasi patakunaman otaq orqo patakunaman phawarinku. Chhaynatan kay p’unchaypi runakunapas ima sasachakuypi tarikuspapas  yanapayta maskhaspa imaymanaman phawarinku: yachaysapa runakunaq imaymana ruwamusqankuman, política nisqaman, religionman, qolqeman ima (Jer. 17:5, 6). Diosta serviqkunan ichaqa ‘Wiñay Qaqanchispi’ hap’ipakunchis (Isa. 26:4). Salmistan nirqan: “[Jehová Diosmi] hatun Qaqayqa, paymi qespichiwanpas pakaykuwanpas, manan kuyurichisqachu kasaq”, nispa (leey Salmo 62:6-9). ¿Imatan ruwananchis hatun Qaqanchispi pakakunapaq?

¹² Diospa Siminta kasukuspan rikuchinchis Diospi hap’ipakusqanchista, kay tiempopi runakuna manaña allinpaqchu chayta qhawarinku chaypas (Sal. 73:23, 24). Yaqapaschá runakuna khaynata niwasunman: “Manan wiñay kawsaqchu kanchis, chaymi kawsashaspa tukuytapas ruwananchis”. “Allin estudioyoqmi kananchis”. “Askha qolqeyoq kaymi allinqa”. “Tukuy atisqaykita rantikuy”. “Huk llaqtakunata reqsiy”, nispa. Yachaywan kawsaqkunan ichaqa kay yuyaykuyta hap’ikunku: “Kay pachapi kaqkunata usachispa, kusikuqkunapas manapas usachinkumanchu hina kawsachunku. Kay pachaq imaynachus kasqan rikusqanchisqa tukukapuqllan” (1 Cor. 7:31). Hinaspapas Jesuspa nisqanta kasukuspan Diospa munayninta ñawpaqta ruwanku, chhaynapin ‘qhapaq kaykunata hanaq pachapi huñunku’, chaypin qhapaq kayninkuqa allin waqaychasqa kashan (Mat. 6:19, 20).

13. 1 Juan 2:15-17 textopi nisqan hina, ¿imakunatan tapukunanchis?

¹³ Kaytan tapukunanchis: “¿‘Kay pacha’ kaqkunamanchu hap’ipakushani icha Jehová Diosmanchu? (1 Juan 2:15-17.) ¿Diospa munaynin ruwaytachu aswan allinpaq qhawarini icha kay pachapi imaymana kaqkunatachu? (Fili. 3:8.) ¿Kallpachakunichu allin ‘ñawiyoq’ kanaypaq?” nispa (Mat. 6:22). Ichaqa manan chaywanqa niwashanchischu: “Amaña llank’aychischu, familiaykichistapas saqerpariychis”, nispachu (1 Tim. 5:8). Jehová Diosqa manan munanchu Satanaspa kamachisqan pachapi hap’ipakunanchista, aswanmi paypi hap’ipakunanchista munan (Heb. 13:5).

14-16. ¿Ima saminchaykunatan wakin iñiqmasinchiskuna chaskirqanku allin ‘ñawiyoq’ kasqankumanta, Diospa munayninta ñawpaqta ruwasqankumantapas?

¹⁴ Yachasun Richardmanta Ruthmantawan, paykunaqa kinsa wawakunayoqmi kanku. Richardmi nin: “Sonqoymi sapa kutilla tanqawaq Jehová Diosta astawan servinaypaq. Hunt’asqan imaykupas kaq, ichaqa puchullatañapas Diosman qoshayman hinan sientekurqani. Chaymi Jehová Diosmanta mañakuspa imakunapi gastokuna kanantawan qhawarispa warmiywan deciderqayku pisillataña llank’anaypaq. Sasaña chay tiempopi llank’ana tariy karqan chaypas, jefeytan nirqani semanapi tawa p’unchayllataña llank’anaypaq. Huk killa qhepamantaq tawa p’unchayllataña llank’arqani”, nispa. ¿Imaynan kunan kashan?

 ¹⁵ Paymi nin: “Pisitaña ganani chaypas, kunanqa watapin phisqa chunka p’unchay puchuwan familiaywan kanaypaq wawaykunata yachachinaypaqpas. Astawanmi predicani, estudioykunatapas yaparunin, aswan allintan iñiqmasiykunatapas yanapashani. Ruthpas wawakunawan qhepakushanaykaman wakin killakuna precursora auxiliar hina llank’an. Kallpachakusaqmi Diosta astawan servishanallaypaq”, nispa.

¹⁶ Roy, Petina cristianokunapas precursor kanankuraykun pisillataña llank’ashanku, huk wawankutaqmi paykunawanraq kashan. Roymi nin: “Semanapin kinsa p’unchaylla llank’ani, warmiytaq iskay p’unchaylla. Hinaspapas wasiykuta saqepuspan huch’uy wasillamanña astakurqayku ima gastopas pisillaña kananpaq. Ñawpaqqa iskayniykun precursor karqayku wawakunayoq kaspañan saqepurqayku, chaywanpas munashallaqmi kayku precursor kayta. Chaymi wawaykuna wiñaruqtin yapamanta precursor karqayku. Saminchaykuna chaskisqaykuqa manan imayna hina qoriwanpas tupanmanchu”, nispa.

Diosmi “thak-kayta” qowasun

17. ¿Imaynatan Biblia qanta yanaparqasunki llakisqa kashaqtiyki?

¹⁷ Manan yachanchischu qhepaman imakunapi rikukunanchista qonqaylla ‘sapanka imaynapipas rikukusqanchisrayku’ (Ecl. 9:11). Ichaqa manan chayraykuchu manchasqa kawsananchis imaynan Diosmanta karunchakuq runakuna kawsanku hinataqa (Mat. 6:34). Aswanmi apóstol Pabloq nisqanta uyarikunanchis, nirqanmi: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis. Hinan Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas [...] waqaychanqa”, nispa (Fili. 4:6, 7).

18, 19. ¿Imaynatan Jehová Dios yanapawanchis? Huk experienciata willay.

¹⁸ Wakin iñiqmasinchiskunaqa sinchi sasachakuykunapi tarikushaspan Diospa thak-kayninta chaskirqanku. Huk cristianan nin: “Sapa kutinmi operaq doctor imaymanawan manchachiwaq yawarta chaskinayrayku. Chayllaraq salaman haykumuspan niwarqan: “¿Ima sonseraskunawantaq hamushanki chaytaq yawarta mana churachikuyta munashankichu?” nispa. Sapa kutilla chhaynakunata niwaqtinmi sonqollaypi Diosmanta mañakuq kani, hinan sonqoy “thak” niq. Manaña kallpay karqanchu chaypas, hatun qaqa hinaraqmi sientekuq kani, mana manchakuspataqmi kutichiq kani imaraykun yawarta mana churachikunichu chayta”, nispa.

¹⁹ Jehová Diosninchisqa iñiqmasinchiskunawan otaq qelqakuna apachimusqanwanmi mayninqa yanapawanchis. Yaqapaschá uyarirqanchis kayta: “¡Kayqa ñoqapaq hinapunin, kaytaqa ñoqapaqpunin ruwarqamusqaku!”, nispa. Ñoqanchisqa Diospa ‘ovejankunan’ kanchis, sutinwan sutichasqa llaqta. Sichus paypa makinpi ima necesitasqanchistapas saqesun chayqa munakuwasqanchistan rikuchiwasun (Sal. 100:3; Juan 10:16; Hech. 15:14, 17).

20. ¿Imaraykun Saqraq kamachikusqan pacha chinkapuqtin Diosta serviqkuna mana imamantapas manchakunqakuchu?

²⁰ “Diospa k’arak phiñakusqan p’unchaypiqa” Satanaspa tukuy paqarichisqanmi chinkapunqa. Chay p’unchaypiqa manan qolqepas qoripas imapas valenqachu (Sof. 1:18; Pro. 11:4). ‘Wiñay Qaqanchis’ Jehová Diosllan pakaykuqninchis kanqa (Isa. 26:4). Chaymi payllapi hap’ipakunanchis kamachikuyninkunata kasukuspa, manaña uyarikuqtinkupas otaq qatiykachasqa kaspapas Diospa Gobiernonmanta predicaspa, tukuy llakikuyninchiskunata paypa makinman saqespa ima. Chayta ruwaqqa “mana imanasqalla tiyanqa, mana imatapas manchakuspalla kawsanqa” (Pro. 1:33).

[Uranpi willakuy]

¿Kutichiwaqchu?

Imaynatan Diospi hap’ipakusqanchista rikuchinchis:

• tentacionkunapi tarikuspa

• mana uyarikuqtinku otaq qatiykachasqa kaqtinchis

• llakikuykuna kaqtin

[Tapuykuna]

[13 paginapi foto]

Diosta kasukusun chayqa kusisqan kawsasun

[15 paginapi dibujo]

Jehová Diosmi “Wiñay Qaqaqa”