Familiantin otaq sapallanchispi estudianapaq yanapaykuna

ENERO killamanta 2009 watamantapachan teqsimuyuntinpi Jehová Diospa testigonkuna manaña kinsa p’unchaytañachu huñunakunchis aswanmi iskay p’unchayllataña. Chaymi Umalliq T’aqa kallpachawarqanchis manaña huñunakusqanchis p’unchaypi Familiantin Diosta Yupaychanapaq otaq sapallanchispi estudianapaq. ¿Kasukushanchischu chayta?

Askha iñiqmasinchiskunan tapukurqanku ima qelqakunatan estudiankuman chay p’unchaypi chayta. Chaytaqa familiapi sapanka umallikunan otaq solterokunan necesitasqankuman hina akllarinanku.

¿Imakunatan ruwakunman chay ch’isipi? Wakinqa huñunakuykunapaqmi preparakunku, ichaqa manan chayllatachu ruwananku. Leesunmanmi Bibliata, huk qelqapi yachasqanchismanta parlasunman otaq wawakuna kaqtinqa huk “dramata” ruwakunman. Manan huñunakuypi hinaraqchu tapuywan kutichiywan estudiana kanqa. Chay estudioqa kusisqa kanankupaq, llapallanku rimarinankupaq hinan kanan. Chhayna kaqtinqa sapankan yuyaykusqanta willarikunqaku kusisqataqmi chay huñunakuypi kanqaku.

Kinsa wawayoq cristianon willan: “Familiaypiqa Bibliata leespan qallariyku. Ñawpaqmantan tupawasqanku capitulota leeyku, wawaykunataq akllakusqankuman hina wakin willakuykunamanta astawan t’aqwirinku. Huñunakusqaykupin sapankanku willanku yachamusqankuta. Mayninmi Michael (7 watayoq) huk dibujota pintamun maynintaq pisillapi qelqan leemusqanta. David, Kaitlyn (13, 15 watayoq) wawaykunan leesqankuta qelqanku paykunapas chaypi kashankuman hinata. Huk kutinmi Génesis 40 capitulopi leerqayku faraonpa t’anta ruwaqninpa copa haywaqninpa mosqokusqankumanta, chaytan Kaitlyn qelqarqan paypas Josewan carcelpi kashanman hinata”, nispa.

Yachasqanchis hina sapanka familiapas hukniraymi kanku, chaymi wakinqa huk hinamantañataq ruwankuman. Qatimuq paginapin askha yanapaykuna kashan familiapi otaq sapallankupi estudiota aparinankupaq. Yaqapaschá qanpas huknirayta ruwawaq.

[6, 7 paginakunapi foto recuadropiwan]

 Wayna-sipas wawayoq familiakunapaq:

• Los jóvenes preguntan librota leespan chaymanta parlarina.

• Bibliapi huk willakuyta leespan tapuna: “¿Imatan qan ruwawaq karqan?” (qhaway La Atalaya 1996 wata, 15 mayo revistata, 14 paginata, 17, 18 parrafokunata).

• Parlariychis imakunatan kunanpas qhepamanpas aypayta munanman.

• Bibliamanta peliculata qhawaspa parlariychis.

• T’aqwiriychis Qhawaq revistapi “Wayna sipaskunapaq” nisqa temata.

Mana wawayoq casarasqakunapaq:

• T’aqwiriychis Familiaykiwan sumaqta kawsay librota, 1, 3, 11-16 capitulokunata.

• Bibliata leespa textokunata maskhaychis, chayta t’aqwirispataq chaymanta parlariychis.

• Preparakuychis Biblia Estudiana Huñunakuypaq, Qhawaq Revistata Estudiana Huñunakuypaqwan.

• Qhawariychis imaynatan astawan kuska predicawaqchis.

Solterokunapaq otaq familiankupi sapallanku kaq Testigokunapaq:

• Kinsa p’unchay hatun huñunakuypi lloqsimuq qelqakunata estudiay.

• Kay watapi otaq ñawpa watakunapi lloqsimuq Anuario librota leey.

• Predicacionpi tapukusqankumanta t’aqwiriy.

• Ñawpaqmanta ensayay predicacionpi imayna rimanaykipaq.

Huch’uy wawayoq familiakunapaq:

• Bibliamanta dramakunata ruwaychis.

• ¡Despertad! revistapi 30, 31 paginakunapi lloqsimuq pukllaykunapi pukllaychis.

• Huk ruwaykunata ruwaychis (qhaway 1996 watapi 8 de marzo ¡Despertad! revistapi, 16-19 paginakunapi “Estudiamos la Biblia en el zoológico” nisqa temata).

• T’aqwiriychis Qhawaq revistapi “Wawaykikunata Yachachiy” nisqa temata.