GARY waway 1958 watapi naceqtinmi onqosqata hina qhawarirqani. Chaymi medicokuna examenkunata ruwaspa chunka killamanta tarirqanku ima onqoyniyoq kasqanta, phisqa watamantataq Londres llaqtamanta especialistakuna sut’incharqanku chay onqoyninta. Ichaqa astawanmi llakikurqani isqon wata qhepaman Louise waway aswan millay onqoywan nacesqanta yacharuspa.

Medicokunan sumaqllata niwarqanku: “Iskaynin wawaykikunan síndrome LMBB nisqa onqoyniyoq kanku *, manataqmi chaypaq hampi kanchu”, nispa. Chay tiempopiqa manan chay onqoymanta ancha uyarikuqchu. Chay onqoyniyoqkunaqa ñawinkun laqhayan, otaq ñawsayapunku, nishuta wirayanku, makinpin otaq chakinpi huk dedokuna wiñan, sasatan imatapas entiendenku, sasatan imatapas ruwanku, riñonninkun mana allintachu llank’an, diabetes, artritis nisqa onqoykunataqmi hap’in. Chaymi wawaykuna uywayta ancha sasapaq qhawarirqani. Chayllaraq estudiokuna ruwakusqanpin yachakun Gran Bretaña nacionpi sapa 125.000 runakunamanta huk runa chay onqoywan kasqanta. Aswan askha runakunas chay onqoywan kanku ichaqa pisitas reparakun.

Casarakusqay qhepallamanmi huk Testigo Bibliamanta rimapayawarqan, chaypin repararqani cheqaqllata yachachisqankuta. Qosaymi ichaqa mana yachayta munarqanchu. Qosaypa llank’ananraykun sapa kutilla huk-huk llaqtaman astakuq kayku, chaymi mana huñunakuykunaman riqchu kani. Chaywanpas sapa kutillanmi Bibliata leeq kani Jehová Diosmantapas mañakuq kani. Maytan kallpachawaq ‘Diosqa sarunchasqakuna hark’aykusqanta, [...] llaki-phutiy p’unchaykunapi waqaychaykusqanta’, maskhaqninkunatapas mana saqerparisqanta yachaspa (Sal. 9:9, 10).

Gary wawayqa ñawsayapusharqanmi, chaymi soqta watanpi kashaqtin huk llaqtaman apapurqanku paykunapaq kaq escuelaman. Sapa kutillanmi waqyamuwaq imamantapas tapuwananpaq, chaypin Bibliamanta yachachiq kani. Louise nacesqan qhepamanmi llapa cuerpoy nanayta qallarirqan nervioykunapas punkiyta qallarirqan. Gary 16 watanpi kashaqtinmi wasiman kutimpurqan, ichaqa astawanmi ñawin laqhayapurqan, chaymi 1975 watapi ñawsa hinaña kapurqan. Chhaynapi kashaqtiykun 1977 watapi qosay wikch’uwarqanku.

Wasiman Gary kutimpusqan qhepamanmi huk iñiq t’aqapi huñunakuyta qallarirqayku, 1974 watapitaq bautizakurqani. Anchatan huk umallita agradecekuni wawayta wayna kasqan tiempopi sasachakuykunata atipananpaq yanapasqanmanta; huk iñiqmasikunapas yanapawaqkun wasipi ruwanakunawan. Chay qhepamanmi autoridadkuna yanapawaq phisqa iñiqmasikunata contratarqan yanapawanankupaq. ¡Maytan chay hina yanapayta necesitarqani!

Diosmanta astawan yachasqanman hinan Garypas 1982 watapi bautizakurqan. Payqa Diosta astawan serviyta munaspan precursor auxiliar karqan, chaymi ñoqapas paywan kuska unay tiempo llank’arqani. Huk kutinmi iñiq t’aqata watukamuwaqniyku nirqan: “Gary, ¿manachu precursor regular kayta munawaq?”, nispa. Chayta  uyarispan payqa anchata kusikurqan; chhayna kallpacharinatan suyasharqan, chaymi 1990 watamanta precursor regular kapurqan.

Garytan iskaynin teqninta operaspa hukwan churarqanku, hukta 1999 watapi huknintataq 2008 watapi. Louise wawaymi ichaqa aswan onqosqa karqan. Payqa ñawsan nacerqan, chakinpi soqta dedoyoqta rikuspataq repararqani paypas síndrome LMBB nisqa onqoyniyoq kasqanta. Análisis ruwasqankupin yachakurqan riñonnin, higadon hukkunapas mana allin kasqanta. Qhepamanmi paypas askha kutita operasqa karqan, riñonnintapas phisqa kutitan operarqanku, Gary hinataq diabetes onqoyniyoq kashan.

Louise wawayqa sapa kutillan medicokunawan hinallataq llapa atiendeqninkunawan parlan qhepaman operananku kaqtin yawarwan mana churanankupaq. Chaymi llapa cuidaqninkuna sumaqta qhawarinku.

Ñoqaykuqa tukuy imaymanatan ruwayku wasiykupi Diosta yupaychanaykupaq. Ñawpaqqa unaymi Bibliata leeq kani iskaynin wawaykunapaq, kunanqa discokunawan videokunawanmi otaq Internetpi www.ps8318.com direccionman haykuspa chaykunawan yanapachikuyku. Chaykunawanmi sapa semana Bibliata estudiayku huñunakuykunapi kutichinaykupaqpas preparakuyku.

Gary wawayqa umallanpin hap’in ima kutichinantapas, Escuelapi discurso tupaqtinpas umallanmantan qon. 1995 watapin yanapakuq qhari kananpaq churasqa karqan. Payqa imaymanapin yanapakun Huñunakuna Wasipi, makillan kashan llapa chayamuqkunata napaykunanpaq, sonido nisqapi yanapakunanpaqpas.

Iñiqmasikunan Gary wawayta sapa kutilla predicacionman apanku sillanpi tanqarikuspa artritis onqoywan mana puriyta atisqanrayku, huk iñiqmasitaq estudiachisqan runaman riysin. Hinaspapas 25 wataña Diosmanta karunchakuq iñiqmasitan waway yanaparqan. Kunanqa chay iskaynin yanapasqan runakunan huñunakuyman rishanku.

Louise waway isqon watanpi kashaqtinmi abuelan yachachirqan tejeyta, ñoqataq enfermeranwan kuska yachachirqayku bordayta. Payqa kusatan chaykunata ruwan chaymi wawakunapaq kurak iñiqmasikunapaqpas imaymana color frazadillakunata ruwan. Hinaspapas dibujokunata k’askachispan tarjetakunata hukkunaman apachin, chaykunata chaskikuqkunataq ancha sumaqpaq chay tarjetakunata qhawarinku. Payqa sipaschallaraq kashaspan maquinapi allinta qelqayta yacharqan, chaymi kunanqa rimaq computadorawan yanapachikuspa amigankunawan parlan. Payqa 17 watanpin bautizakurqan, chaymantapachan paywanpas mayninpi precursora auxiliar kayku. Gary hinan umallanpi textokunata hap’in chaywantaq runakunaman yachachin hamuq tiempopi ‘ñawsakuna qhawarinanmanta’ chay tiempopi ‘mana mayqellanpas: “Onqosqan kani”, ninankumantawan’ (Isa. 33:24; 35:5).

¡Anchatan Jehová Diosta agradecekuyku Bibliapi sumaq yachaykuna qelqachisqanmanta! Iñiq t’aqaykupi iñiqkunatapas agradecekuykun Diosta serviypi yanapawasqankumanta. Astawanqa Jehová Diostan “gracias” niyku kawsasqayku mana yanqapaqchu kasqanmanta.