Bibliaqa manan hark’anchu chay ruwayta.

Biblian riman ñawpa tiempopi wañuqkunaq cuerponta tullunkutapas mayninpi kanasqankuta (Jos. 7:25; 2 Crón. 34:4, 5). Chay hinata wañuqkunaq cuerponwan ruwasqankuqa, yaqapaschá rikuchinman chay runakunaqa huchapakusqankurayku mana p’ampasqa kasqankuta. Ichaqa manan chayraykupunichu kanasqa karqanku.

Chaypaq qhawarisun Saulmanta kinsantin churinkunamantapas. Paykunaqa Filistea runakunawan maqanakuspan wañupurqanku. Chaypin Davidpa amigon Jonatanpas wañupurqan. Chayta yacharqospan Jabes llaqtamanta kallpasapa Israel runakunaqa, Saulpa cuerponta kinsantin churinkunaq cuerponkutawan apamuq rirqanku. Chay qhepamantaq ruphachipuspa tullunkunata p’ampapurqanku. Chay ruwasqankuta yachaspan Davidqa chay runakunata alabarqan (1 Sam. 31:2, 8-13; 2 Sam. 2:4-6).

Biblian nin wañuqkunaq kawsarimpunanta. Jehová Diosqa tukuy atiyniyoq kasqanraykun mosoq cuerpowan wañuqkunata kawsarichimpunqa, cuerponkuña ninaq ruphasqan karqan chaypas. Chaypaq yachasun ñawpa tiempopi kinsantin hebreo waynakunamanta. Paykunaqa Diospa kawsarichimpunanpin iñirqanku, chaymi mana manchakurqankuchu kanasqa kayta (Dan. 3:16-18). Kay tiempokunapipas askha cristianokunan ninaq ruphasqan wañupurqanku. Wakinmi iñiyninkurayku hatun carcelkunapi tarikurqanku, chaypin kanasqa wañupurqanku. Wakinqa wasinku ruphaqtin otaq imapipas tarikuspan ninaq ruphasqan wañupurqanku. Ichaqa Jehová Diosmi hunt’aq kasqankurayku paykunata kawsarichimpunqa (Apo. 20:13).

Jehová Dios kawsarichinanpaqqa manan wañuqpa cuerpontaraqchu necesitan. Chaymi rikukun hanaq pachapaq suyakuyniyoqkunaq kawsarichisqa kasqankupi. Paykunaqa Jesús hinan espíritu cuerpoyoq kawsarichisqa kanku, manan aycha cuerpopichu (1 Ped. 3:18). Chaywanpas manan huk runachu kanku, aswanpas cuerpollankun cambiapun. Kaqllan yuyayninkupas, munakuyninkupas kashanqa, kay tiempopi kawsasqankutapas manan qonqanqakuchu (1 Cor. 15:42-53; 1 Juan 3:2).

Wañupuqtinchis ruphachisqaña cuerponchis kanman chaypas kawsarimpusunmi. Chaytan Jehová Dios prometerqan, chayraykun hunt’anqapuni (Hech. 24:15). Manaña lliwtachu yachanchis imaynatachus Jehová Dios wañuqkunata kawsarichimpunanta chaypas, Jehová Diospin confianchis. Paymi Jesusta kawsarichisqanwan lliw runaman rikuchiwarqanchis chay ruway atisqanta (Hech. 17:31; Luc. 24:2, 3).

Chhaynaqa, sapanka familian otaq sapanka cristianon decidinan wañuqpa cuerponwan imatachus ruwakunanta. Ichaqa yuyaykunankun chay ruwayta imaynata runakuna qhawarisqankuta. Hinaspapas chay nacionpi leykunatan qhawarinanku (2 Cor. 6:3, 4).