KAY tiempopi aswan allin ruwayqa Diospa gobiernonmanta hukkunaman willasqanchismi. Chayta ruwaspaqa Jehová Diostan representashanchis chayqa ancha kusikunapaqmi. Mayninpin ichaqa manaña kusisqachu predicasunman. ¿Imanaqtin?

Runakunata wasinkupi mana tarispa, mana uyariwaqtinchis otaq k’amiwaqtinchis. Maynintaq pisikallpayanchis askha llaqtakunaraq predicanapaq faltasqanrayku. Yaqapaschá ninchis: “Manan llapankumanqa Bibliamanta yachachiyta atisaqchu”, nispa. Otaq askha watakunaña predicashanchis p’uchukaytaq mana chayamunchu.

Chaykunan llapanchistapas pisikallpayachiwasunman chayraykutaq manaña kusisqachu predicasunman. Hinaspapas Saqran kay pachata kamachishan chaymi sasa predicananchispaq (1 Juan 5:19).

Yaqapaschá qanpas sasachakuykunapi tarikuwaq predicanaykipaq. Ichaqa Jehová Diosmi yanapasunki chaykunawan ama atipachikunaykipaq. Chhaynaqa, ¿imakunatan ruwawaq kusisqalla predicanaykipaq? Chaykunata yachasun.

Watan-watanmi askha runakuna bautizakunku Jehová Diospa testigon kanankupaq. Sichus chayllaraq bautizakurqanki chayqa, unay watakuna testigo kaqkunaq predicasqanmanta yachay. Unayña bautizakurqanki chaytaq, chayllaraq bautizasqakunata yanapay. Chaymi yanapasunki kusisqa kanaykipaq.

Jesuspa qatikuqninkunaqa yanapanatan necesitarqanku allin yachachiq kanankupaq, chaymi Jesusqa yachachirqan (Luc. 8:1). Kay  tiempopipas chayllaraq testigo kaqkunan allin yachachiq kanankupaq yanapanata necesitanku, chaymi yanapananchis.

Chayllaraq testigo kaqkunaqa manan predicacionman rispallachu predicaytaqa yachanqaku. Paykunaqa pacienciawan munakuywan yanapanatan necesitanku. ¿Imaynatan yanapawaq? Ñawpaqtaqa yachachinaykin predicacionpaq preparakuspa practicananpaq. Chaymantataq yachachinayki runakunawan rimananpaq, qelqanchiskunata munachinanpaq, astawan yachay munaqkunaman kutinanpaq, estudiota qonanpaqpas. Chaykuna ruwasqanmantataq kusa ninayki ichaqa willanaykin imakunapi allinyananraq kasqanta (Ecl. 4:9, 10). Sichus chayllaraq predicashanki chayqa unayña predicaqkunaq ruwasqanman hina ruway, chhaynapin allin yachachiq kanki (Luc. 6:40). Hinaspapas manan manchakunkichu yanapaqniyki chaypi kasqanrayku.

Anchataña kallpachakusunman chaypas manapaschá pimanpas predicayta atirqanchischu runakuna mana munasqanrayku otaq mana chaypi kasqankurayku. Chhayna kaqtinqa predicaqmasinchiswan parlarisun. Jesuspas qatikuqninkunatan “iskay-iskaymanta” predicaq kacharqan, chay hinapi kallpachanakunankupaq yanapanakunankupaqwan (Luc. 10:1; Rom. 1:12).

Ichaqa, ¿imatan predicaqmasiykiwan parlariwaq? Yaqapaschá willawaq predicacionpi allinkuna pasasqasuykimanta, Biblia estudiasqaykipi yachasqaykimanta otaq huñunakuypi ima uyarisqaykichus kallpacharqasunki chaymanta. Chayllaraq reqsisqayki iñiqwan predicashanki chayqa, tapuwaqmi imaynapi testigo kapusqanta, imaraykun piensan cheqaq religionpi kashasqanta, maykunapi predicasqantapas. Hinaspapas parlariwaqchismi imakunachus predicacionpi pasasqasuykichismanta. Chay hinapin runakunaña mana uyarisuqtiykichispas kallpachanakunkichis (1 Tes. 5:11).

Kusisqalla predicanapaqqa sapa semananmi sapallanchispi Bibliata allinta estudiananchis. Chaypaqmi “hunt’aq kamachiqa” askha qelqakunata qowanchis (Mat. 24:45). Yaqapaschá astawan t’aqwiriwaq imaraykuchus predicananchispuni kasqanta. Chaypaq qhawariy  “ ¿Imaraykun predicananchispuni?” nisqa recuadrota.

Chay recuadroq nisqanpi yuyaymanay, chaymi yanapasunki astawan predicanaykipaq. Hinaspapas Bibliapi maskhay imaraykupiwan predicana kasqanta. Sichus tiempota hap’inki chaykunapi yuyaymananaykipaq chayqa, kusisqan predicanki.

Manan wasin-wasinta rispallachu predicananchis, kanmi huk hinamanta predicacionkunapas. Hunt’aq kamachin niwanchis cartata ruwaspa predicananchista, telefononta, callekunapi, askha runaq kasqanpi, runakunaq llank’anankunapipas. Hinaspapas pisi predicaqkunaq kasqanmanmi risunman otaq testigokunaq mana kasqanpi predicasunman.

¿Munawaqchu chay hina predicayta? Askha iñiqkunan chhayna predicasqankuwan kusisqa tarikunku. Wakinmanta yachasun.

Huk cristianan Diosmanta Willasunchis hojanchispi kaq yanapayman hina estudiota maskharqan. Chaymi 3 llank’aqmasinkunaman estudiota munachirqan, hinan kinsantinku estudiayta munarqanku hinamantaq huñunakuykunaman riyta qallarirqanku.

Hinaspapas allintan qhawarinanchis pikunapaq revistakuna ruwasqa kasqanta, chayman hina rakinanchispaq. Chaytan ruwarqan Estados Unidos nacionpi watukuq umalli. Paymi leerqan ¡Rikch’ariy! revistapi carrokunaq llantanmanta. Hinan chay revistata rakimurqan llantakunata vendeq tiendakunaman. Hinaspapas esposanwan kuskan 100  medicokunaman hina rakimurqanku revistakunapi lloqsimuq “Kunan tiempopi medicokunaq sasachakuyninku” nisqa temata. Chhaynapis runakunaqa llank’ayninchista astawan reqsinku qelqanchiskunatapas. Nillantaqmi chay ruwasqankuwan predicasqanku territoriopi runakunata astawan reqsisqankuta, chhaynapi astawan yachay munaqkunaman kutinankupaq.

Huk cristianan umalli t’aqaq oficinanman qelqarqan telefononta predicanapaq yanapaykunamanta agradecekuspa. Mamansi 86 watanpiña onqosqallataqsi tarikunpas. Chaywanpas chay yanapaykunawansi telefononta predicayta qallarirqan hinaspa 92 watayoq warmiman estudiota qorqan.

Rikusqanchis hina, predicananchispaq qelqanchiskunapi lloqsimuq yanapaykunaqa ancha allinpunin. Qanpas chaykunawan yanapachikuy chhaynapin kusisqalla predicanki.

Askha iñiqmasikunan piensanku kusisqalla predicanapaqqa askha qelqakunata rakina kasqanta, askha estudiokunayoq kana kasqanta otaq askha runata bautizakunanpaq yanapana kasqanta. Ichaqa manan chhaynachu. Aswanpas kusisqalla predicanapaqqa Jehová Diosmanmi hunt’aq sonqo kananchis (1 Cor. 4:2). Chaytan Noepas ruwarqan. Payqa askha runakunamanmi predicarqan ichaqa familiallanmi Diospi iñirqan.

Predicacionpi kusisqalla kanapaqqa hunt’ananchispaq hina ruwaykunatan churakunanchis. ¿Mayqenkunan chaykuna? Wakinmanta yachay “ Hunt’anaykipaq hina ruwaykunata churakuy” nisqa recuadropi.

Chaykunata hunt’aspaqa kusisqan tarikunki tukuy atisqaykita ruwasqaykirayku. Hinaspapas Jehová Diosmanta mañakuy predicacionpi kusisqalla kanaykipaq.

Predicayqa manan facilchu ichaqa Jehová Diosmi yanapasunki kusisqalla predicanaykipaq. Chaypaqqa predicaqmasiykiwanmi parlarinayki, sapa semananmi sapallaykipi Bibliata allinta estudianayki, huk hinakunamantan predicanayki, hunt’anaykipaq hina ruwaykunallatan churakunayki, yuyarinaykitaqmi Jehová Dios chay llank’ay qosusqaykita paypa testigon kasqaykitapas (Is. 43:10). Chhaynaqa, atiwaqmi kusisqalla predicayta.