1. a) ¿Imata ruwananchispaqmi apóstol Juan niwarqanchis? b) ¿Imaraykun piensananchis Diospa sinchi munakuwasqanchispi?

APÓSTOL Juanmi nirqan: “Qhawariychis, may hinatachus Dios Yayaq munakuwasqanchista”, nispa (1 Juan 3:1). Chaywanmi apóstol Juanqa niwasharqanchis Diospa sinchi munakuwasqanchispi piensananchista, imaynata munakuyninta rikuchiwanchis chaypi piensananchistapas. Chaykunata ruwaspaqa Jehová Dioswanmi aswan amigontin kasun, astawantaq munakusunpas.

2. ¿Imaraykun wakin runakuna ninku “Diosqa manan munakuwanchischu” nispa?

² Wakin runakunan ichaqa piensanku: “Diosqa manan munakuwanchischu, Diosmanqa runakunaqa manan imapas qokunchu”, nispa. Paykunaqa ninku: “Kamachikuykunallata qoq Diosmi, mana kasukuqkunatataq castigan”, nispa. Religionninkupipas yachachinkun “Diosqa mana khuyapayakuqmi” nispa, chaymi Diosta mana munakunkuchu.  Wakintaq ninku imataña runakuna ruwaqtinpas Diosqa munakushallasqanta. Ñoqanchismi ichaqa Bibliata estudiaspa yachanchis cheqaq kaqta. Biblian nin Diosqa munakuq kasqanta, chayraykun churinta kay pachaman kachamurqan ñoqanchisrayku wañunanpaq (Juan 3:16; 1 Juan 4:8). Chaywanpas yaqapaschá wakin iñiqmasikunaqa mana creenkuchu Dios paykunata munakusqanta, yaqapaschá chayta piensanku vidankupi imapas pasasqanrayku.

3. ¿Imaraykun nisunman “Diosqa munakuwanchismi” nispa?

³ ¿Imaraykun nisunman “Diosqa munakuwanchismi” nispa? Kamawasqanchisraykun (leey Salmo 100:3-5). Chaymi Bibliaqa Adanmanta nin Diospa churin kasqanta (Luc. 3:38, MR). Hinaspapas Jesusmi yachachiwarqanchis Jehová Diosqa taytanchis kasqanta (Mat. 6:9). Diosqa wawankunata munakuq tayta hinan munakuwanchis.

4. a) ¿Ima clase taytan Jehová Dios? b) ¿Imamantan yachasun kay estudiopi qatimuq estudiopipas?

⁴ Wakintaqa wawallaraq kashaqtinkun taytanku sinchita maqarqan, chaymi mana creenkuchu taytaqa munakuq kananpaq. Jehová Diosmi ichaqa mana hayk’aqpas ñak’arichiwasunchu, payqa llapa taytamantapas aswan munay taytan (Sal. 27:10). Payqa sinchitan munakuwanchis, tukuy imatataq ruwan cuidawananchispaq. Sichus munakuwasqanchispi piensasun chayqa, astawanmi payta munakusun (Sant. 4:8). Kay estudiopin yachasun imaynatan Jehová Dios munakuwasqanchista rikuchiwanchis chayta. Qatimuq estudiopitaq yachasun imaynatan ñoqanchis Dios munakusqanchista rikuchisunman chayta.

5. ¿Imatan Jehová Dios llapanchisman qowanchis?

⁵ Atenas llaqtapi kashaspan Pabloqa askha idolokunata rikurqan, runakunataq chay idolokuna kawsay qonanpi creeqku. Chaymi Pabloqa paykunata nirqan: “Diosmi kay pachata chaypi tukuy imaymana kaqtapas kamaqqa”, nispa. Nillarqantaqmi: “Payqa llapanchistan kawsachiwanchis, samaytapas, tukuy imatapas qowanchis”, “paypin kawsanchispas, purinchispas, kashanchispas”, nispa (Hech. 17:24, 25, 28). Arí, Jehová Diosqa tukuy necesitasqanchistan qowanchis kusisqa kawsananchispaq. ¿Imakunatan qowarqanchis munakuwasqanchisrayku? Yachasun.

6. ¿Imayna hallp’atan Jehová Dios qowarqanchis tiyananchispaq? (21 paginapi fotota qhaway.)

⁶ Jehová Diosmi tiyasqanchis pachata sumaqta kamarqan (Sal. 115:15, 16). Llapa planetakunamantapas hallp’anchismi aswan munayqa. Askha planetakunataña cientificokuna tarirqanku chaypas, manan hallp’anchista hinaqa tarirqankuchu, kayllapin kawsayqa kan. Jehová Diosmi hallp’anchista kamarqan tukuy necesitasqanchistataq chaypi churarqan, chay hinapi kawsay kananpaq. Ichaqa manan chayllachu, munaytan kamarqan, maypas tiyakunapaq hinata (Is. 45:18). Chaykunapi piensaspan reparanchis Jehová Dios sinchita munakuwasqanchista (leey Job 38:4, 7; Salmo 8:3-5).

7. ¿Imatawanmi Jehová Dios ruwarqan munakuwasqanchista rikuchinanpaq?

⁷ Hinaspapas Jehová Diosqa munakuwasqanchisraykun  payman rikch’akuqta kamawarqanchis (Gén. 1:27). Chaymi munakuwasqanchista rikuspa paytapas munakunchis. Diosqa yachanmi munakuynin kusichiwasqanchista imaynan wawakunaqa taytanku munakuqtin kusikunku hinata. Hinaspapas Jesusmi yachachiwarqanchis Diosman achhuykuspaqa kusisqa kananchista (Mat. 5:3). Biblian nin: “Payllan kusikunanchispaq tukuy imaymanatapas askhatapuni qowanchis”, nispa (1 Tim. 6:17). Rikusqanchis hina Jehová Diosqa tukuy imatan qowanchis, sinchitataq munakuwanchis (Sal. 145:16).

8. ¿Imaraykun Jehová Diospa yachachiwananchista munanchis?

⁸ Allin taytaqa wawankunata munakuspan qhepaman allin kanankupaq yachachin. Ichaqa askha taytakunan mana respetankuchu Bibliaq nisqanta, chaymi  mana yachankuchu allin mana allin kasqanmanta wawanku yachachiyta. Wawakunataq mana imata ruwayta yachaspa ñak’arinku (Prov. 14:12). Jehová Diosmi ichaqa wawankunata allinta yachachin, “cheqaqtaqmi payqa” (Deut. 32:4). Payllan cheqaq kaqta paymanta yachachiwanchis, willawanchistaqmi imaynata adorananchista. Chaymantapas willawanchismi kusisqa kananchispaq imaynatachus kawsananchista (leey Salmo 43:3). ¿Imakunatan yachachiwarqanchis munakuwasqanchista rikuchinanpaq?

9, 10. a) ¿Imaraykun Jehová Dios willawanchis paymanta? b) ¿Imatan Jehová Dios willawanchis ñoqanchismanta?

⁹ Jehová Diosqa munakuwasqanchista rikuchinanpaqmi reqsinanchista munan, chayraykun paymanta willawanchis (Sant. 4:8). Chaymi sutinta yachachiwanchis, chay sutiqa ima sutimantapas askha kutitan Bibliapi rikhurin. Jehová Diosqa willawallanchistaqmi imayna Dios kasqanta. Payqa ancha yachayniyoqmi sinchi atiyniyoqtaq kanpas, chaytan reparanchis kamasqankunata qhawarispa (Rom. 1:20). Bibliata leespataqmi yachanchis chanin, munakuq Dios kasqanta. Jehová Diosta astawan reqsispaqa astawanmi payman achhuykusun.

¹⁰ Hinaspapas Jehová Diosqa ñoqanchismantan willawanchis. Willawanchismi familianmanta kasqanchista, chayraykun munan llapa familianwan huk nisqalla llank’ananchista. Hinaspapas willawarqanchismi mana paywanqa mana allinpi tarikunanchista, ñoqallanchismantaqa manan atisunmanchu allin kaqta mana allin kaqta reqsiyta (Jer. 10:23). Payllan yachan imas ñoqanchispaq allin kasqanta. Chaymi payta kasukuspalla, payta respetaspalla kusisqa thakpi kawsasun. Chaykunatan Diosqa willawarqanchis munakuwasqanchisrayku.

11. ¿Imatan Jehová Dios prometewarqanchis?

¹¹ Allin taytaqa wawankuna qhepa tiempoman allin tarikunankutan munan, kusisqa kanankutapas. Ichaqa askha runakunan mana yachankuchu qhepaman imapi tarikunankuta. Paykunaqa sinchitan llank’anku tukukuq kaqkunallapaq, manataqmi kusisqachu kawsanku (Sal. 90:10). Jehová Diosmi ichaqa yachachiwarqanchis kusisqa kananchispaq imatachus ruwananchista, paymi prometewarqanchis qhepaman ancha sumaq kawsananchista.

12. ¿Imaynatan Jehová Dios yanaparqan Caintapas, Baructapas?

¹² Jehová Diosqa Caín manaraq huchapakushaqtinmi yanapaykurqan. Nirqanmi: “¿Imamantataq phiñakunki? ¿Imanaqtintaq uyaykipas millaymanraq tukun? Allinkaqta ruwaqtiykiqa, chaskisqan kanki”, nispa. Nillarqantaqmi: “Huchan suyapashasunki hap’irqonasuykipaq, chaypas qanmi huchataqa atipanayki”, nispa (Gén. 4:6, 7). Caintaq mana kasukurqanchu,  chaymi ñak’arirqan (Gén. 4:11-13). Huk kutipitaq Baruc sutiyoq siervon mana allin piensaykuna umanman hamusqanrayku sayk’usqa pisi kallpa kasharqan. Chaymi Jehová Diosqa nirqan piensayninta cambiananpaq, Baructaq kasukurqan chaymi mana wañurqanchu (Jer. 45:2-5).

13. ¿Imapaqmi yanaparqan Joseta, Moisesta, Davidta sasachakuykunapi tarikusqanku?

¹³ Jehová Diosqa munakuwasqanchisraykun anyawanchis wanachiwanchispas. Payqa necesitasqanchis ratopin corregiwanchis, allin runa kananchispaqtaq yanapawanchis (Heb. 12:6). Diosqa ñawpa tiempopi siervonkunatan yanaparqan aswan allin runakuna kanankupaq. Chaymi dejallarqan Josepas, Moisespas, Davidpas sasachakuykunapi tarikunankuta. Chaykunapi tarikusqankun yanaparqan hatun ruwaykunata qhepaman ruwanankupaq. Bibliata leespan yachanchis Jehová Diosqa siervonkunata yanapasqanta, chaykunan rikuchiwanchis munakuwasqanchista (leey Proverbios 3:11, 12).

14. ¿Imaynatan Jehová Dios munakuyninta rikuchiwanchis huchapakuqtinchis?

¹⁴ Jehová Diosqa huchapakuqtinchispas munakuynintan rikuchiwanchis. Sichus wanachiyninta chaskikuspa pesapakunchis chayqa, perdonaykuwanchismi (Is. 55:7). Rey Davidmi nirqan: “Paymi lliw mana chanin ruwasqaykunatapas pampachaykuwaqqa, paymi lliw onqoyniytapas qhaliyachiwaqqa. Paymi aya p’ampanamanta kawsayniyta qespichiwaqqa, paymi munakuwaspa khuyakuwaspa saminchaykuwaqqa”, nispa (Sal. 103:3, 4, 12). Rikusqanchis hina Jehová Diosqa perdonaykuqpunin. Chaypaqmi ichaqa anyawasqanchista, wanachiwasqanchistapas chaskikunanchis hinaspa cambiananchis, manataqmi qonqananchischu munakuwasqanchisrayku wanachiwasqanchista (Sal. 30:5).

15. ¿Imatawanmi Jehová Dios ruwan munakuyninta rikuchiwananchispaq?

¹⁵ Allin taytaqa peligrokunamantan wawankunata pakaykun. Chaytan Jehová Diospas ruwan. Biblian Diosmanta nin: “Paymi payman sonqollikuqkunata waqaychan, millay runakunaq makinman urmaykunanmanta qespichin”, nispa (Sal. 97:10). Chaytan ñawinchiswan comparasunman. Manan hayk’aqpas dejanchischu ñawi rurunchista imapas tupaykunantaqa, chay pasaqtinqa usqhayllan ch’illmirunchis. Chay hinallatataqmi Jehová Diospas peligrokunamanta usqhaylla pakaykuwanchis. Chaytan munakuwasqanchisrayku ruwan (leey Zacarías 2:8).

16, 17. ¿Imaynatan Jehová Dios siervonkunata cuidan?

¹⁶ Jehová Diosqa angelninkunawanmi serviqninkunata pakaykuq (Sal. 91:11). Huk kutinmi 185.000 soldadokunata huk angel-lla wañuchirqan, chhaynapin Diospa llaqtan salvasqa karqan (2 Rey. 19:35).  Ñawpa cristianokunaq tiemponpipas angelkunan Pedrota hukkunatapas carcelmanta horqorqanku (Hech. 5:18-20; 12:6-11). Qayna-qaynakunallan África ladomanta huk llaqtapi guerra karqan. Chaymi maqanakuykuna, suwanakuy, violacionkuna wañuchinakuykuna llaqtantinpi karqan. Manaña Testigokunamanta ch’ullapas wañurqanchu chaypas, askhan mana imayoq tarikapurqan. Chhaynaña kaqtinpas, Jehová Diospa cuidasqantan rikurqanku. Sinchitaña ñak’arishaspankupas kusisqan kasharqanku. Umalli t’aqata representaq tapuqtinmi, paykunaqa nirqanku allin kashasqankuta, Jehová Diospa cuidasqan tarikushasqankuta.

¹⁷ Chaywanpas mayninpiqa wañuchirqankun Diosta serviq wakin hunt’aq sonqo runakunata. Chaymi pasarqan Estebanwan. Chaypin yachanchis Jehová Diosqa mana tukuy tiempochu siervonkunata wañuymanta librasqanta, ichaqa pakaykuwanchismi Saqraq trampankunamanta willawaspanchis (Efes. 6:10-12). Chaykunan Bibliapi kashan, qelqanchiskunapipas. Chaykunapin willawanchis internetpi peligrokunamanta cuidakunanchispaq. Niwallanchistaqmi qolqe sonqo kaymanta, mana allin librokunamanta, computadorapi qhelli ruwaykunawan maqanakuykunawan pukllaykunamanta cuidakunanchispaq. Chhaynata willawasqanchispin yachanchis munakuwasqanchista cuidawasqanchistapas.

18. ¿Imaynan sientekunchis Jehová Diospa munakuwasqanchista entiendespa?

¹⁸ Unayña Diosta servisqanta yuyarispan Moisesqa entienderqan Jehová Diospa sinchi munasqan kasqanta. Chaymi nirqan: “Munakuyniykiwan sapa paqar hunt’aykuwayku, chaymi tukuy kawsasqayku p’unchay kusisqa q’ochukusaqku”, nispa (Sal. 90:14). Ñoqanchispas anchatan kusikunchis Jehová Diospa sinchi munakuwasqanchista entiendespa. Chaymi apóstol Juan hina nisunman: “Qhawariychis, may hinatachus Dios Yayaq munakuwasqanchista”, nispa (1 Juan 3:1).