¿Imapaqmi Dios Mariata akllaran?

HUK kutinmi Jesusqa askha runakunaman predicasharan, chayllamanmi runakuna ukhumanta huk warmi kunkayoqta nimuran: “Kusisamiyoqmi wachakuqniyki, ñuñuqniyki warmiqa”, nispa. Sichus Jesús munanman karan qatikuqninkuna mamitan Mariata hatunchanankuta chayqa, chaypichá yachachinman karan chayta ruwanankupaq. Ichaqa manan chaytachu ruwaran, aswanmi niran: “Aswan kusisamiyoqqa Diospa siminta uyarispa hunt’aqkunan”, nispa (Lucas 11:27, 28).

Jesusqa manan hayk’aqpas mamitanta hatunchaq hinaqa imatapas ruwaranchu, nitaqmi qatikuqninkunatapas yachachiranchu chayta ruwanankupaq. Chhaynaqa, ¿imaraykutaq askha runakunari Mariata adoranku? Chaykunata allinta yachanapaq Bibliawanpuni qhawarisun allintachus runakuna paymanta yachachishanku icha manachus chayta.

“Diospa gracianwan hunt’asqa”, “warmikunamanta qollana”

Ángel Gabrielmi Mariaman willaran imapaqchus Dios akllasqanmanta, chay kutipin khaynata napaykuran: “¡Diospa ancha saminchasqan warmi, napaykuykin! Señor Diosmi qanwan kashan”, nispa (Lucas 1:28). Wakin Bibliakunapin khaynata nin: “Diospa gracianwan hunt’asqan kanki, Diosninchismi qanwan, warmikunamanta qollanan kanki”, nispa. Huk kutinmi María riran Elisabetpa wasinta, chaypipas paytaqa Elisabetmi nillarantaq: “Bendecisqan kanki warmikuna ukhupi, bendecisqataqmi qanmanta naceqpas”, nispa (Lucas 1:42, Mosoq rimanakuy). ¿Chhaynata rimapayasqankuraykuchu nisunman: “Adorananchismi Mariataqa”, nispa?

Manan. Iglesia Católica nisqapiña chay angelpa napaykusqanmanta hinallataq Elisabetpa rimasqanmantawan Mariaman huk  rezota ruwanku chaypas, Bibliaqa manan yachachinchu Mariamanta mañakuytaqa. Ángel Gabrielwan Elisabetwan Mariata chhaynata rimapayasqankuwanqa respetasqallankutan rikuchisharanku, chaywanqa manan paymanta mañakuytachu yachachisharanku. Mariamanta mañakuytaqa manapunin Bibliaqa yachachinchu. Aswanmi Jesusqa qatikuqninkunata yachachiran Yayanmanta otaq Papanmanta mañakunankupaq, chaymi niran: “Yayayku hanaq pachapi kaq, sutiyki yupaychasqa kachun”, nispa (Mateo 6:9).

Hukkunawan kuskan gobiernanqa

Askha runakunan Mariata ninku: “Hanaq pachapi reina”, nispa. Biblian ichaqa mana maypipas chhaynata ninchu. Ichaqa willanmi hanaq pachapi kananpaq Dios akllasqanta. ¿Imatan chaypi ruwanqa?

Chaypaq yuyarisunchis huk kutipi Jesuspa ima nisqanta. Paymi wakin qatikuqninkunaman prometeran hanaq pachaman rispa paywan kuska kamachimunankupaq (Lucas 22:28-30). Jesusmi paykunata allinta yachachiran Diospa sacerdotenkuna kanankupaq, “chaymi kay pacha[ta] kamachikunqaku” (Apocalipsis 5:10). Mariapas hanaq pachatan rinqa paykunawan kuska kamachimunanpaq. ¿Imaynapin chayta yachanchis? Chaypaq allinta Bibliaq nisqanta qhawarisun.

Ñawpaqpi yachasqanchis hina, Cristoq wañupusqan qhepallatan Mariaqa Jesuspa wayqenkunawan hinallataq qatikuqninkunawan kuska “huk sonqolla Diosmanta mañakunankupaq huñukuqku”. Llapankun karanku pachak iskay chunka runakuna, paykunamanta wakinmi karan ‘warmikuna’ (Hechos 1:12-15). “Pentecostés Fiesta p’unchay chayamuqtin[taqmi] llapallanku huk sonqolla huñunasqa kasharqanku”, chayllamanmi Diosqa santo espiritunta paykunaman kachayamuran, hinan paykunaqa huk simikunapi rimayta qallariranku (Hechos 2:1-4).

Mariapas huk warmikuna hina Jesuspa qatikuqninkunawan kuska santo espirituta chaskisqanmi allinta rikuchin Jesuswan kuska kamachikamunanpaq akllasqa kasqanta. Chhaynaqa ñachá kunanqa Jesuswan kuskaña hanaq pachapi kashan (Romanos 8:14-17). ¿Imatan hanaq pachapi ruwanqaku Mariapas wakin akllasqakunapas?

Runakunaq allinninpaqmi imaymanata ruwanqa

Bibliaq nisqan hina, 144.000 runakunan hanaq pachaman rinqaku, chaypin Jesuswan kuska sacerdotekuna, juezkuna, reykuna ima kanqaku (Apocalipsis 14:1, 4; 20:6). Sacerdote hinan paykunaqa llapa Dios serviqkunata yanapanqaku Diosta mana pantaspa servinankupaq, paykunamanta huchata chinkachinankupaq, qhalilla kanankupaq ima. Chhaynapin Jesuspa wañusqan llapa runakunaq allinninpaq kanqa (Apocalipsis 21:1-4). Jehová Diosta serviqkunaqa maytapunin munashanchis chay p’unchay chayamunanta. *

Ñawpa tiempopin Mariaqa allinta yanapakuran Diospa munaynin hunt’akunanpaq, kunanpas chaytan ruwashan. Payqa allin ejemplon llapanchispaq. Allintan wawankunata uywaran, huch’uyaykukuqmi karan, Dios sonqon karan, kasukuqtaq karanpas. Chaymantapas imaymana pruebakunatan aguantaran. Chayraykun kallpachakunanchis pay hina kananchispaq. Ichaqa manan chayllatachu ruwana, aswanmi respetananchis Cristoq mamitan kasqanrayku, runakuna yanapaypi yanapakunanpaq akllasqa kasqanraykupiwan.

Llapa Diosta serviqkuna hinan Mariapas Jehová Diosllata servin hatunchan ima, manan wak dioskunatachu, chaytan Mariamantaqa astawan yuyarinanchis. Payqa Cristowan kuska kamachinankupaq akllasqakuna ukhupin kashan, paykunawan kuskataq ninku: “Tiyanapi tiyaqpaq [Jehová Diospaq] Corderopaqwan [Cristopaqwan] kachun alabay, yupaychay, hatunchay, atiypas wiñay-wiñaypaq”, nispa (Apocalipsis 5:13; 19:10).

[Uranpi willakuy]

[31 paginapi willakuy]

María hinan kananchis huch’uyaykukuq, allin iñiq, kasukuq ima