Diosta allinta reqsiy

Diosqa chanin Juezmi

Números 20:2-13

ASKHA juezkunan mana chanin kaywan, mana khuyapayakuspa juzganku. Jehová Diosmi ichaqa mana chhaynachu, payqa chanin kaqtan munakun (Isaías 61:8). Payqa pacienciakuqña chaypas, manan hinallataqa qhawanmanchu mana chanin kaqta; chaynin kaywanpunin juzgan. Chaypaq qhawasunchis Números libropi 20 capitulopi huk willakuyta.

Israel runakunaqa tawa chunka wata hinañan ch’inneq pampapi tiyasharanku; pisillañan faltasharan Prometesqa Hallp’aman haykunankupaq. * Hinan unu mana kasqanmanta Moisés contra Aarón contra rimapakuranku: “¿Imapaqmi qankuna [...] kay ch’inneqman pusamu[wa]nkichis? ¿Ñoqaykutapas uywaykutapas wañunaykutachu munankichis?” nispa (4 versículo). Nillarankutaqmi: ‘Kaypi tiyayqa millaymi, manan wiñanchu higospas, uvaspas, granadapas, manan unullapas ukyanapaq kanchu’, nispa. Chhayna frutakunatan ñawpa watakunapiraq wakin Israel runakuna apamusqaku Prometesqa Hallp’amanta (5 versículo; Números 13:23). Chay kutipiqa Israel runakunan mana munasqakuchu chay sumaq hallp’aman haykuyta. Kunantaqmi Moisesta Aarontawan tumpasharanku chay hallp’api mana tiyasqankumanta.

Jehová Diosqa manan chay rimapakuqkunata castigaranpachachu, aswanmi Moisesta kamachiran: “Tawnata hoqariy, hinaspa [...] runakunata [huñuy]. Chaymantataq llapa runakunaq qayllanpi qaqata rimaykunki unuta phawachinanpaq”, nispa (8 versículo). Moisestaq rispa tawnanta hoqariran, hinaspa runakunata huñumuran, ichaqa manan qaqata rimaykuranchu, aswanmi runakunata phiñarikuran: “Uyariwaychis, k’ullu runakuna, ¿kay qaqamantachu unuta horqosaqku qankunaman ukyachinaykupaq?” nispa (10 versículo; Salmo 106:32, 33). Hinaspan iskay kutita tawnanwan qaqata waqtaran, “hinan qaqamanta askha unu phawarqan” (11 versículo).

Chay hinapin Moiseswan Aaronpiwan Dios contra huchallikuranku, chaymi Jehová Diosqa niran: ‘Qankunaqa manan kasuwarankichischu”, nispa (24 versículo). Arí, paykunan Diosta mana kasukurankuchu, uyankupas kasqaraqtaq Israel runakunata: “K’ullu runakuna”, ninankupaq. Chaymi Diosqa iskayninkuta niran: “Manan qankunachu Israel llaqtata Prometesqa Hallp’amanqa haykuchinkichis”, nispa. Chhaynata nispaqa chanin kaywanmi Diosqa paykunata juzgasharan, ¿imaraykun chayta ninchis?

Manayá Diosqa Moisesta kamachiranchu runakunata rimaykunanpaq nitaq “k’ullu runakuna” nispa phiñaykunanpaq. Chaymantapas Moiseswan Aaronwanqa manan Diosta hatuncharankuchu, chaymi Jehová Diosqa paykunata phiñarikuran (12 versículo). Paykunaqa atiyninkuwanpas unuta horqonkuman karan: “¿Kay qaqamantachu unuta horqosaqku?” nispan niranku. Chaymantapas Diosqa ñawpaqpiqa ñan huchachasqaña chhayna mana kasukuqkunata, chaymi mana Canaán hallp’amanpas haykuchisqachu mana kasukuq Israel runakunata (Números 14:22, 23). Hinaspapas, Moiseswan Aaronwanqa llaqta umalliqkunan karanku, chaymi Diosqa aswan kasukuq kanankuta mañaran (Lucas 12:48).

Jehová Diosqa chanin kaqtataq munakun chayqa, manan pimanpas sayapakunchu; aswanpas chanin kaywanpunin juzgan. Chhaynaqa confianapaq respetanapaq hina Juezmi payqa.

[Uranpi willakuy]