Leeqkunan yachayta munanku

Jehová Diospa testigonkuna, ¿qhaliyachinkuchu onqosqakunata?

▪ Jehová Diospa testigokunaqa manan hayk’aqpas milagrota ruwaspa onqosqakunata qhaliyachinkuchu. Paykunaqa Jesús hinan Diospa Gobiernonmanta allin willakuykunata astawanqa predicanku. Hinaspapas paykunaqa manan onqosqakunata hampiypichu reqsichikunku aswanpas munanakuyninkupin chaypin cheqaq cristianokunaqa reqsichikunku.

Jesusqa runakunata khuyapayaspan onqoyninkumanta qhaliyachirqan. Chaykunata ruwasqanpitaqmi yachanchis kamachikamuyta qallariqtin “manan mayqellanpas: ‘Onqosqan kani’, ninqachu” nisqa promesa hunt’akunanta (Isaías 33:24).

Ichaqa, ¿imanisunmanmi kay tiempopi runakunata qhaliyachisqankumanta? Cristianon kayku niq religionkunapas huk religionkunapas ninkun: “Milagrota ruwaspan qhaliyachiyku”, nispa. Jesusmi ichaqa willarqan paypa ‘sutinpi askha milagrokunata ruwaqkuna’ rikhurimunanta, paykunatan ninqa: “Manapunin reqsiykichischu, qayllaymanta anchhuriychis mana allin ruwaqkuna”, nispa (Mateo 7:22, 23). Chhaynaqa, ¿allinpaqchu Dios qhawarin chay ruwasqankuta?

Tupanachisun Jesuspa milagrokuna ruwasqanta kay tiempopi milagrokuna ruwasqankuwan. Chhaynapin reparasun Diosmantachus hamun icha manachus chayta.

Jesusqa manan askha runakuna qatikunanraykuchu milagrokunata ruwarqan. Askha milagrokuna ruwasqantapas pakallapin ruwarqan. Chaymi qhaliyachisqan runakunata askha kutipi kamachirqan ama pimanpas willananpaq (Lucas 5:13, 14).

Jesusqa manan hayk’aqpas qolqepaqchu runakunata qhaliyachirqan (Mateo 10:8). Hinaspapas llapa payman riq onqosqa runakunatan qhaliyachirqan. Payqa manan imayna iñiyniyoq kasqankuman hinachu hampiq (Lucas 6:19; Juan 5:5-9, 13). Wañupuqkunata imaraqmi kawsarichirqan (Lucas 7:11-17; 8:40-56; Juan 11:38-44).

Askha milagrokunataña ruwarqan chaypas manan chayta qhawarispa payman askha runakuna rinankupaqchu ruwarqan. Payqa allin willakuykunata willaqmi hamurqan. Chaymi qatikuqninkunata kacharqan runakunaman yachachimunankupaq, llapa kay pachapi tiyaq runakuna qhalilla Diospa Gobiernonpi tiyanankumanta willamunankupaqwan (Mateo 28:19, 20).

Yaqa llapa runakunan yachanchis ñawpa tiempopi wakin cristianokuna milagrokuna ruwasqankumanta, ichaqa tukukapurqanmi chay atiy chaskisqankuqa (1 Corintios 12:29, 30; 13:8, 13). Kay tiempopi cheqaq cristianokunaqa manan milagrokunata ruwaspa hampisqankupichu reqsichikunku aswanpas munanakusqankupin (Juan 13:35). Manan milagrokunachu cristianokunata hukllachan munanakuspa huk familia hinalla kawsanankupaq.

Jehová Diospa testigonkunaqa huk familia hinan munanakunku, sinchi ch’aqway ukhupiña tarikushaspapas manan iñiqmasinkutapas nitaq huk runakunatapas ima dañotapas ruwankuchu. Teqsimuyuntinpin Cristo hina munakuq kasqankuta rikuchinku. ¿Imallan runakunata yanapanman huk llaqtayoq, huk rimayninyoq, huk costumbreyoq huk nisqalla kawsanankupaq? Jehová Diospa santo espiritullanmi. Chayraykun qan kikiyki rikunaykipaq invitaykiku Jehová Diospa testigonkunaq huñunakuyninman.

[11 paginapi foto]

¿Dioschu yanapan chay milagro ruwaqkunata?