Diospa Siminmanta yachachikuykuna

¿Imaynatan allin amigokunata akllasunman?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imaraykun allin yuyaywan amigonchiskunata akllananchis?

Yaqa llapanchismi runakunawan kuska kayta munanchis chaymi paykuna hina kanchis. Chhaynaqa, amigonchiskunaq imachus ruwasqankun sonqonchispi saphichakun, chaymi imayna amigokuna akllasqanchiswan rikuchisun imayna runa kasqanchista. (Leey Proverbios 4:23; 13:20.)

Bibliamanta huk libro qelqaq Davidpas allin yuyaywanmi amigokunata akllarqan, chaymi yanaparqan Diospaq hunt’aq kananpaq (Salmo 26:4, 5, 11, 12). Jonatanmi amigon karqan, paymi Diospi confiananpaq yanaparqan. (Leey 1 Samuel 23:16-18.)

2. ¿Imaynapin Diospa amigon kasunman?

Jehová Dios Tukuy atiyniyoqña chaypas, atisunmanmi amigon kayta. Bibliaq nisqan hina Diosqa Abrahamta amigonta hina qhawarirqan. ¿Imarayku? Payqa kasukuqmi karqan confiarqantaq (Génesis 22:2, 9-12; Santiago 2:21-23). Sichus ñoqanchispas Jehová Diospi confiasun paypa munasqantataq ruwasun chayqa, atisunmi amigon kayta. (Leey Salmo 15:1, 2.)

  3. ¿Imaynatan allin amigokuna yanapawanchis?

Allin amigokunaqa allin kaqta ruwananchispaqmi yanapawanchis (Proverbios 17:17; 18:24). Davidpa amigon Jonatanqa 30 wata kurakninmi karqan, payqa qhepaman rey kananpaqmi akllasqaña karqan. Diosmi ichaqa Davidta rey kananpaq akllarqan, Jonatantaq yanaparqan. Allin amigokunapas mana manchakuspan anyawanchis mana allinta imatapas ruwaqtinchisqa (Salmo 141:5). Diosta munakuq kaqtinkuqa yanapawasunmi allin runa kananchispaq. (Leey 1 Corintios 15:33.)

Jehová Diospa testigonkunaq huñunakunanku wasipin allin amigokunata tariwaq, paykunan qan hina allin kaqta ruwanankupaq kallpachakunku. Paykunawan huñukuymi yanapasunki Diosta kusichinaykipaq. (Leey Hebreos 10:24, 25.)

Mayninpiqa Diosta munakuq amigonchiskunapas mana allin kaqtan ruwankuman. Chhayna kaqtinqa manan usqhayllachu phiñakunanchis (Eclesiastés 7:9, 20-22). Mana pantaq amigoqa manan kanchu ichaqa Diosta munakuq amigokunatan necesitanchis. Diospa Simin qelqan kallpachawanchis iñiqmasinchiskunata pampachananchispaq. (Leey Colosenses 3:13.)

4. ¿Imatan ruwawaq amigoykikuna Diospa amigon kanaykita mana munaqtinku?

Askha runakunan Biblia estudiayta qallariqtinku amigonkuna hark’anku. Yaqapaschá mana entiendenkuchu Bibliapi yuyaychaykunata ima suyakuytas qon chaytapas. Chhayna kaqtinqa willawaqmi imachus yachasqaykimanta. (Leey Colosenses 4:6.)

Chaymantapas yaqapaschá amigoykikuna burlakunqaku allin willakuykunata willasqaykimanta (2 Pedro 3:3, 4). Hukkunataq asipayasunkiku allin kaqta ruwanaykipaq kallpachakusqaykimanta (1 Pedro 4:4). Chhayna kaqtinqa, akllanaykin pikunas amigoyki kanqa, Dioschu icha paykunachu chayta. Sichus Diosta amigoykipaq akllakunki chayqa allin kaqtan ruwashanki. (Leey Santiago 4:4, 8.)

Astawan yachayta munanki chayqa ¿Imatapunin Biblia yachachin? nisqa librota qhaway 12, 19 capitulokunata, chaytaqa Jehová Diospa testigonkunan ruwan.